Námsframboð eykst í Vestmannaeyjum: íþróttafræði á háskólastigi

Samstarfssamningur Vestmannaeyjabæjar, Háskólans í Reykjavík og mennta- og menningarmálaráðuneytis um íþróttafræðinám var undirritaður á dögunum í heimsókn ráðherra til Vestmannaeyja. Námið hefst næsta haust og nýtist sem grunnur að áframhaldandi námi í íþróttafræði.

„Við viljum efla háskólanám á landsbyggðinni og auka samstarf menntastofnana vítt og breitt um landið. Þetta framtak er liður í því. Samningurinn nú nær til næstu tveggja skólaára og ég bind vonir við að nemendur sjái tækifæri í þessari nýju námsleið og nýti sér hana. Það er öflugt íþróttalíf í Vestmannaeyjum og íþróttafræðin er spennandi fag og starfsvettvangur,“ sagði Lilja Alfreðsdóttir mennta- og menningarmálaráðherra.

Háskólinn í Reykjavík ber ábyrgð á skipulagningu og framkvæmd námsins en Vestmannaeyjabær mun leggja til íþróttamannvirki til kennslu í verklegum greinum, svo sem handknattleik, knattspyrnu og sundi, og jafnframt leggja til aðstöðu fyrir nemendur til að stunda fjarnám gegnum Þekkingarsetur Vestmannaeyja. Nánar má fræðast um nám í íþróttafræði á vef Háskólans í Reykjavík.