Umbra – þjónustumiðstöð Stjórnarráðsins

Umbra - þjónustumiðstöð Stjórnarráðsins, er ráðuneytisstofnun sem sinnir upplýsingatæknimálum og ýmsum sameiginlegum rekstrarþáttum ráðuneyta og ríkisstofnana, að hluta eða í heild, með það að markmiði að stuðla að hagkvæmni í rekstri.

Umbra heyrir undir fjármála- og efnahagsráðuneytið.
Framkvæmdastjóri Umbru er Viktor J. Vigfússon.

Hlutverk

Umbra er þjónustumiðstöð upplýsingatækni og samreksturs sem gerir ríkisaðilum kleift að einbeita sér að kjarnastarfsemi sinni.

Framtíðarsýn

Umbra veitir ríkisaðilum framúrskarandi þjónustu í upplýsingatækni og rekstri með áherslu á framsækni, öryggi og nýsköpun. Með faglegum innviðum og nýtingu gagna er stuðlað að skilvirkni, trausti og samvinnu til að skapa aukið virði fyrir ráðuneyti og ríkisstofnanir.

Almennir þjónustuþættir

Notenda- og tæknilausnir fyrir ríkisaðila
Hönnun, rekstur og þjónusta upplýsingatækniinnviða, -kerfa og -lausna. Kaup og leyfisumsýsla fyrir tölvubúnað og hugbúnaðarlausnir.
Samrekstur og samþætting
Sameiginleg rekstrarþjónusta fyrir ríkisaðila. Þróun og innleiðing samnýttra lausna. Samþætting lausna við sameiginlega auðkenningarþjónustu.
Sjálfvirkni og stafræn umbreyting
Sjálfvirkni í rekstri og ferlum til að auka skilvirkni. Innleiðing tækninýjunga sem styðja við skrifstofuumhverfi og samrekstur ríkisins.
Sérhæfð þjónusta og ráðgjöf
Leiðbeinandi ráðgjöf í gagnaöryggi, gagnastýringu og framþróun. Aðstoð við samningagerð á sviði upplýsingatækni og úthýsingu kerfa.
Öryggi og viðbragðsáætlanir
Sameiginleg vöktun kerfa ásamt viðbragðsáætlunum öryggisatvika. Örugg varðveisla og meðhöndlun gagna.
Innleiðing nýrra tæknilausna
Tækninýjungar sem styðja við skrifstofuumhverfi og samrekstur ríkisins.

Sérþjónusta fyrir ráðuneyti

Þjónustuver sem annast m.a. símsvörun, móttöku og almenna þjónustu við starfsfólk og almenning.
Þjálfun, fræðsla og annar stuðningur við að efla mannauð.
Viðhald miðla fyrir innri og ytri upplýsingagjöf og samskipti.
Rekstur og öryggi bygginga og annarra innviða.
Akstursþjónusta og öryggisgæsla fyrir ráðherra.
Þjónusta við fastanefndir ráðuneytanna og aðra tengda aðila.
Önnur virðisaukandi þjónusta í takt við þarfir á hverjum tíma.

Rekstur skýjageira fyrir ríkisaðila

Umbra og fjármála- og efnahagsráðuneytið hafa gert með sér samning sem hefur það að markmiði að koma á samstarfi milli opinberra aðila um nýtingu á tölvuskýjalausnum ríkisins. Í því felst að Umbra sér um rekstur og stjórnun á Microsoft 365 umhverfi og lausnum (skýjageira) fyrir hönd tiltekinna stofnana.

Opnunartími, símanúmer og helstu netföng

Símanúmer afgreiðslu er 545 8800. Opið er frá 8:30 – 16:00.

Afgreiðsla:	[email protected]
Stjórnarráðsskólinn:	[email protected]
Umsjón fasteigna:	[email protected]
Öryggismál:	[email protected]
Rekstur tölvukerfa:	[email protected]
Vefmál:	[email protected]

Listi yfir starfsfólk Umbru.

Skipulag