Árétting um reglugerð um bókhald, fjárhagsáætlanir og ársreikninga sveitarfélaga

Sveitarfélögum er nú gert að færa byggðasamlög, sameignarfélög, sameignarfyrirtæki og önnur félagaform með ótakmarkaðri ábyrgð sveitarfélags í samantekin reikningsskil miðað við hlutfallslega ábyrgð. Þær breytingar tóku í gildi frá og með rekstrarárinu 2021 með gildistöku reglugerðar nr. 230/2021 um breytingu á reglugerð nr. 1212/2015 um bókhald, fjárhagsáætlanir og ársreikninga sveitarfélaga þann 15. febrúar 2021.

Heimild til frestunar

Álitamál hafa komið upp varðandi það hvernig bæri að útfæra þær breytingar á reikningsskilum sem fram komu í reglugerð nr. 230/2021. Til að mynda þótti fyrirséð að ef útfæra þyrfti þessar breytingar í ársreikningi ársins 2021 myndi það tefja ársuppgjör sveitarfélaga fyrir það ár. Ráðherra hefur því með nýrri reglugerð nr. 14/2022 (um breytingu á reglugerð nr. 1212/2015 um bókhald, fjárhagsáætlanir og ársreikninga sveitarfélaga) veitt sveitarfélögum heimild til þess að beita ekki þeirri aðferð sem lýst er í 3. mgr. 20. gr. reglugerðar nr. 1212/2015 við gerð ársreiknings fyrir árið 2021.

Velji sveitarfélög að nýta sér þessa heimild skulu þau hafa lokið við gerð viðauka við fjárhagsáætlun vegna áranna 2022-2025 í síðasta lagi fyrir 1. júní 2022. Við gerð viðaukans skulu þau beita þeirri aðferð sem lýst er í 3. mgr. 20. gr. reglugerðar nr. 1212/2015.

Reglugerðin með heimildinni hefur þegar öðlast gildi.

• Reglugerð nr. 14/2022