Sýslumenn hljóta Nýsköpunarverðlaun hins opinbera

Sýslumenn hlutu Nýsköpunarverðlaun hins opinbera fyrir brautryðjendastarf við sjálfvirknivæðingu opinberrar þjónustu, og sérstaklega stafræna málsmeðferð dánarbúa. Alls voru 92% útgefinna dánarvottorða í lok árs 2023 stafræn en til samanburðar voru þau aðeins 26% í byrjun þess árs. Auk móttöku stafrænna dánarvottorða fá sýslumenn helstu lykilupplýsingar á borð við skattframtöl og ökutækjaeignir sjálfkrafa í ferlinu í tengslum við skipti á dánarbúum. Aðstandendur geta fyllt allar yfirlýsingar og umsóknir út stafrænt, sem hefur gert umsóknarferlið einfaldara og fljótlegra.

Stafræn vegferð sýslumanna hefur staðið yfir í nokkur ár í góðu samstarfi við dómsmálaráðuneytið, haghafa og aðrar stofnanir. Stafrænar umbætur eru liður í eftirfylgni stefnu málaflokksins um bætta þjónustu, sem birtist í skýrslu sem dómsmálaráðuneytið gaf út í mars 2021 og ber heitið „Sýslumenn – framtíðarsýn; umbætur á þjónustu og rekstri. Fjölmargar nýjungar hafa litið dagsins ljós og margir handvirkir ferlar sem áður kölluðu á bílferðir og símtöl eru nú leystir með handhægum stafrænum hætti.

Árangur sýslumanna í stafrænni vegferð þykir að mati ráðuneytisins eftirtektarverður og vel til þess fallinn að styðja við markmið málaflokksins, sem birtast meðal annars í fjármálaáætlunum undanfarinna ára.