Sértækur húsnæðisstuðningur við Grindvíkinga framlengdur um þrjá mánuði

Alþingi samþykkti í gær lagafrumvarp sem velferðarnefnd mælti fyrir um að framlengja því úrræði að veita Grindvíkingum sértækan húsnæðisstuðning. Úrræðið var síðast framlengt til loka þessa árs en með þessum breytingum gildir úrræðið til 31. mars 2025.

Í greinargerð með lagafrumvarpinu telur velferðarnefnd þó mikilvægt að sem fyrst eftir að nýtt þing kemur saman verði ráðist í vinnu við að gera breytingar á úrræðinu. Þar sem fjölmargir Grindvíkingar hafa þegar selt Þórkötlu fasteignir sínar má ætla að þörf fyrir úrræðið minnki þar sem færri beri tvöfaldan húsnæðiskostnað en áður.

Lög um sértækan húsnæðisstuðning vegna náttúruhamfara í Grindavíkurbæ nr. 94/2023 voru fyrst samþykkt á Alþingi í desember 2023. Markmið þeirra þá var að lækka húsnæðiskostnað þeirra Grindvíkinga sem þurftu að leigja húsnæði til íbúðar utan Grindavíkurbæjar vegna jarðhræringanna á Reykjanesskaga, en bera á sama tíma kostnað af eignum sínum í Grindavík sem þau geta ekki nýtt.

• Frétt þegar sértækur húsnæðisstuðningur var fyrst kynntur (24. nóvember 2023)
• Frétt um fyrstu framlengingu á sértækum húsnæðisstuðningi (22. janúar 2024)
• Frétt um aðra framlengingu á sértækum húsnæðisstuðningi (17. maí 2024)