Ráðherra lagði áherslu á jarðhita og gervigreindariðnað

Jóhann Páll Jóhannsson umhverfis-, orku- og loftslagsráðherra hvatti til aukins samstarfs á sviði jarðhitanýtingar á fundi evrópskra orkumálaráðherra í Kaupmannahöfn 5. september og fagnaði því sérstaklega að Evrópusambandið ynni nú að aðgerðaáætlun um jarðhita. Jóhann lagði áherslu á að jarðhiti væri loftslagsvæn orkulind sem gæfi stöðuga orkuframleiðslu og hentaði þannig vel í samspili við sveiflugjarna orkugjafa á borð við vind- og sólarorku. Mikilvægt væri að hafa augun á jarðhita þegar Evrópuregluverk um orkumál og leyfisveitingar er þróað. Áréttaði Jóhann Páll þetta sérstaklega á tvíhliða fundi sem hann átti með Timmy Dooley, sem fór fyrir sendinefnd Írlands á fundinum, en Írar taka við formennsku í ráðherraráði ESB á seinni hluta næsta árs .

Þá fjallaði ráðherra um mikilvægi þess að gagnaversiðnaður á tímum gervigreindarbyltingar yrði knúinn endurnýjanlegri orku. Fram kom í máli Jóhanns að lönd eins og Ísland – með gnótt stöðugrar grænnar orku, köldu loftslagi og vel menntuðu vinnuafli – ættu að geta boðið upp á sérstaklega hagstæðar aðstæður fyrir slíka starfsemi. „Verkefnið er að sjá til þess að gervigreindardrifinn hagvöxtur haldist í hendur við útfösun jarðefnaeldsneytis. Þá þurfa gagnaverin að vera knúin grænni orku,“ sagði Jóhann Pál.

Ráðherra benti á að Ísland hefði þegar náð því markmiði að um 100% rafmagnsframleiðslu væri knúin hreinni og endurnýjanlegri orku. Stór hluti raforkunnar stæði undir málmframleiðslu sem hefði eitthvert minnsta kolefnisfótspor heims. Ísland væri samstíga öðrum Evrópuríkjum hvað varðar áherslu á orkuskipti og að leita hagkvæmustu leiða til að draga úr losun og auka orkuöryggi.

Jóhann lagði áherslu á jarðhitanýtingu sem uppsprettu nýsköpunar, hagvaxtar og loftslagslausna. Á Íslandi hefði verið þróuð árangursrík aðferð til niðurdælingar og bindingar kolefnis í tengslum við jarðhitavirkjanir. Þá væru gríðarleg tækifæri fólgin í rannsóknum og þróun djúpborunar eftir ofurheitum jarðhita þar sem markmiðið væri að hver hola og hvert jarðhitasvæði skili margfalt meiri orku en áður. Íslendingar hefðu þegar stigið spennandi skref í þessum efnum og hér væri samstarf við aðrar Evrópuþjóðir af hinu góða.