Kostnaður við þriðja útboð ríkisins á hlutum í Íslandsbanka

Markaðssett útboð á hlutum ríkissjóðs í Íslandsbanka fór fram í maí síðastliðnum þar sem eftirstandandi 45,2% eignarhlutur ríkisins var seldur. Útboðið var haldið í samræmi við lög þar um með það að markmiði að tryggja gagnsæi, hagkvæmni, hlutlægni og jafnræði í útboðsferlinu.

Kostnaður ríkisins vegna söluferlisins skiptist í þrennt: umsjónarþóknun, söluþóknun og annan kostnað.

Umsjónarþóknun var 0,75% af heildarvirði útboðs, 679,3 m.kr., og var fest í samning við ráðningu umsjónaraðila í ágúst 2024. Þóknunin skiptist jafnt á milli Barclays, Citigroup Global Markets Europe AG og Kviku.

Söluþóknun var einnig 0,75% af heildarvirði útboðs, 679,3 m.kr., og rann til allra tíu söluráðgjafa sem ráðnir voru.Upphæð söluþóknunar var ákveðin í 4. gr. laga nr. 80/2024 um ráðstöfun eignarhlutar ríkisins í Íslandsbanka hf.

Í anda jafnræðis og hlutlægni var ákveðið að byggja söluþóknun á innsendum tilboðum frekar en seldum hlutabréfum, að teknu tilliti til markaðsþreifinga. Skiptingin var eftirfarandi:

ABN Amro	6.517 þ.kr.
Arctic Securities	32.868 þ.kr.
Arctica Finance	63.621 þ.kr.
Arion banki	102.981 þ.kr.
Barclays	87.370 þ.kr.
Citi	97.555 þ.kr.
JP Morgan	15.992 þ.kr.
Kvika banki	182.079 þ.kr.
Landsbankinn	82.540 þ.kr.
UBS Europe SE	7.797 þ.kr.

 

Undir annan kostnað fellur lögfræðikostnaður, kostnaður við endurskoðendur, fjármálaráðgjöf, ráðgjöf vegna kynningar á útboði, almennur kostnaður við útboðið og útlagður kostnaður söluaðila.

Í ráðningarsamningi við söluaðila var kveðið á um að söluaðilar gætu fengið útlagaðan kostnað greiddann af seljanda. Stærsti liðurinn í útlögðum kostnaði söluaðila snýr að sérhæfðum hugbúnaði fyrir útboð. Kvika lagði út fyrir ýmsum kostnaði sem viðkemur skráningu í kauphöll.

ABN Amro útl. kostn.	1.854 þ.kr.
Arctic Securities útl. kostn.	1.508 þ.kr.
Citi útl. kostn.	2.215 þ.kr.
JP Morgan útl.kostn	2.812 þ.kr.
Kvika útl. kostn.	25.851 þ.kr.

 

BBA Fjeldco og Milbank þjónustuðu seljanda. Logos og White&Case þjónustuðu umsjónaraðila. Lögfræðikostnaður var eftirfarandi:

LOGOS slf.	31.416 þ.kr.
Milbank	124.584 þ.kr.
White&Case	101.959 þ.kr.
BBA Fjeldco ehf.	74.379 þ.kr.

 

Aton veitti seljanda þjónustu vegna kynningarmála. Ratsjá var milliliður á milli auglýsenda og seljanda.

Aton ehf.	30.713 þ.kr.
Ratsjá ehf.	3.154 þ.kr.

 

Landsbankinn var fjármálaráðgjafi seljanda.

Landsbankinn hf. ráðgj.	120.280 þ.kr.

 

Fjármálaeftirlit Seðlabankans las yfir útboðsskjöl og Íslandsbanki og seljandi skiptu með sér endurskoðunar-, og lögfræðikostnað sem féll til vegna útboðslýsingar.

Seðlabanki Íslands	3.863 þ.kr.
Íslandsbanki hf.	120.815 þ.kr.

 

Samtals er kostnaðurinn 2.000.520 þ. kr., eða um 2,22% af heildarsöluvirði. 

Hafa verður í huga að söluferlið hófst haustið 2024 en var aflýst með stuttum fyrirvara. Um það bil helmingurþess sem fellur undir annan kostnað er tilkomið vegna undirbúnings og aflýsingar það ár.

Hér fylgir samantekt yfir allar þrjár sölurnar sem ríkið hefur staðið fyrir á hlut sínum í Íslandsbanka. Fyrri tvær sölurnar voru framkvæmdar af Bankasýslu ríkisins (BR) en síðasta salan af fjármála- og efnahagsráðuneytinu. Ef kostnaður sem greiddur var vegna hins aflýsta útboðs árið 2024 er dreginn frá lækkar hlutfall kostnaðar við útboðið 2025 í 1,9%.

 

Sala Íslandsbanka	Hlutfall	Fjöldi hluta	Gengi	Söluandvirði	Kostnaður	Hlutfall
Frumútboð	35,0%	699.999.993	79,0	55.299.999.447	1.674.606.581	3,03%
Tilboðsfyrirkomulag	22,5%	450.000.000	117,0	52.650.000.000	700.000.000	1,33%
Samtals selt af BR	57,5%	1.149.999.993	93,9	107.949.999.447	2.374.606.581	2,20%
Markaðssett útboð FJR	42,5%	850.000.007	106,6	90.576.000.746	2.010.519.730	2,22%
Samtals selt	100,0%	2.000.000.000	99,3	198.526.000.193	4.385.126.311	2,21%