Ísland tilkynnir loftslagsmarkmið til ársins 2035 til Parísarsamningsins

Ísland hefur tilkynnt uppfært landsákvarðað framlag sitt til Parísarsamningsins til ársins 2035. Aðildarríkjum samningsins ber að skila inn uppfærðum landsákvörðuðum framlögum (e. nationally determined contribution; NDC) um samdrátt í losun á fimm ára fresti.

Landsframlag Íslands er þrískipt. Sett eru fram tvö töluleg markmið sem ná annars vegar til samfélagslosunar (ESR) og hins vegar til losunar frá landi (LULUCF). Þá lýsa stjórnvöld áherslum til þess að ná fram samdrætti í losun frá staðbundnum iðnaði í svokölluðu ETS-kerfi.  

Landsframlagið er eftirfarandi:

1. Ísland skuldbindur sig til að ná fram 50-55% samdrætti í nettólosun gróðurhúsalofttegunda árið 2035 miðað við árið 2005, í þeim geirum sem eru nú skilgreindir í reglugerð um samfélagslosun (ESR), þar á meðal losun frá vegasamgöngum, orkuvinnslu, sjávarútvegi, landbúnaði og úrgangsstjórnun.
2. Ísland skuldbindur sig til að ná fram árlegum samdrætti í losun frá landi (LULUCF) um 400-500 kt CO₂ íg. árið 2035 miðað við árið 2025.
3. Auk þeirra tölulegu markmiða sem sett eru fram hér að framan, verður unnið að samdrætti í losun frá staðbundnum iðnaði sem fellur undir viðskiptakerfi Evrópusambandsins með losunarheimildir (ETS), með því að styðja við tæknilausnir til föngunar, hagnýtingar og niðurdælingar.

Þetta er í fyrsta sinn sem Ísland skilar inn tölulegu markmiði vegna Parísarsamningsins um losun frá landi, og í fyrsta sinn sem sérstaklega er tilgreint hvernig Ísland ætli að stuðla að samdrætti í ETS-kerfinu. Landsframlag Íslands nær yfir hagkerfi landsins í heild (e. economy-wide) sbr. 4. grein Parísarsamningsins, þar sem þessar þrjár meginstoðir loftslagssamstarfs við ESB (ESR, LULUCF, ETS) taka til losunar allra geira og gróðurhúsalofttegunda.

Jóhann Páll Jóhannsson, umhverfis-, orku- og loftslagsráðherra:„Við erum raunsæ og höldum jarðtengingunni en setjum markið hátt. Nýtt landsframlag Íslands gagnvart Parísarsamningnum tekur mið af sérstöðu Íslands að því er varðar heildarsamsetningu losunar og þann árangur sem við höfum náð í nýtingu endurnýjanlegra orkuauðlinda. Þetta eru krefjandi markmið en framkvæmanleg, og þannig á það að vera. Við ætlum að byggja á styrkleikum okkar og  fylgja markmiðunum eftir með aðgerðum sem fela í sér margþættan ávinning, styðja við samdrátt í losun en um leið við verndun náttúru og líffræðilegrar fjölbreytni og ýta undir spennandi atvinnuþróun og verðmætasköpun um allt land.“

Sjá má upplýsingar um landsframlagið í heild sinni hér.