Stafræn auðkenning milli landa til umræðu á fundi samstarfsráðherra Norðurlanda

Fundur samstarfsráðherra Norðurlanda fór fram á Álandseyjum 11. september sl. Á fundinum kom fram sterkur pólitískur stuðningur við vinnu sem miðar að því að gera rafræna auðkenningu þvert á landamæri Norðurlanda, að veruleika. Liðkun á aðgengi að stafrænni þjónustu Norðurlanda er mikilvægur hluti af afnámi stjórnsýsluhindrana samkvæmt áætlun um frjálsa för á Norðurlöndum 2025-2030 sem tók gildi í byrjun árs og á að einfalda borgurum að flytja, vinna, stunda nám og reka fyrirtæki á Norðurlöndum. Markmiðið er að hægt verði að nota rafræn skilríki frá heimalandi til að fá þjónustu í öðru landi. Á fundinum kynntu fulltrúar frá ráðherranefnd um stafvæðingu (MR-DIGITAL) tilraunaverkefnið NOBID (Nordic-Baltic eID) og framkvæmdu sýnikennslu um mögulega útfærslu sem mundi gera þetta framkvæmanlegt.

Einnig var rætt um lýðræðislegar áskoranir í breyttum heimi og hvernig efla megi lýðræðislega þátttöku borgara á Norðurlöndum. Umræðan tengist náið samfélagsöryggi og viðbúnaði sem er einnig ofarlega á baugi á vettvangi Norrænu ráðherranefndarinnar. Rætt var um eftirfylgni innan ráðherranefndarinnar við yfirlýsingu forsætisráðherra Norðurlanda frá 26. maí 2025 um samfélagslegt öryggi og viðbúnað. Samþykkt var að kortleggja vinnu um efnið á þeim sviðum sem falla undir umboð Norrænu ráðherranefndarinnar og snertir það vinnu allra tólf ráðherranefndanna. Á fundinum var einnig gerð grein fyrir yfirstandandi vinnu við úttekt á endurskoðun Helsingforssamningsins.

Í tengslum við fundinn stóð formennskan í samstarfinu á árinu 2025, Finnland og Álandseyjar, fyrir málþingi um framtíð norrænnar samvinnu. Þar var m.a. rætt hvernig haga beri norrænu samstarfi í framtíðinni til þess að áfram verði styrkur í því. Voru þar margir þátttakendur og líflegar umræður. Nálgast má upptökur af málþinginu á heimasíðu Norrænu ráðherranefndarinnar.

Um Norrænu ráðherranefndina

Samstarfsráðherrar Norðurlanda annast samræmingu norræna ríkisstjórnarsamstarfsins á vettvangi Norrænu ráðherranefndarinnar, í umboði forsætisráðherra landanna. Starfið fer fram í 12 ráðherranefndum á mismunandi málefnasviðum og nefndum embættismanna og vinnuhópa undir þeim. Unnið er að sameiginlegum lausnum á þeim sviðum þar sem Norðurlöndin geta náð betri árangri með því að vinna saman með norrænt notagildi (nordisk nytte) að leiðarljósi. Unnið er eftir pólitísku stefnumótuninni ,,framtíðarsýn okkar 2030“ um að Norðurlöndin verði samþættasta og sjálfbærasta svæði heims árið 2030 með áherslu á græn, samkeppnishæf og félagslega sjálfbær Norðurlönd. Í upphafi árs 2025 tóku gildi fjórtán samstarfsáætlanir ráðherranefnda  sem munu gilda fyrir árin 2025-2030, þar sem tilgreind eru markmið og undirmarkmið starfsins á næstu árum eftir málaflokkum.