Djúpborun flýtt með pólitískum stuðningi

Ísland setur markið hátt þegar kemur að frekari djúpborun og nýtingu ofurheits jarðhita. Þetta kom fram á Superhot Summit, hliðarviðburði sem Jóhann Páll Jóhannsson, umhverfis-, orku- og loftslagsráðherra, bauð til á Hringborði Norðurslóða (Arctic Circle) í samvinnu við íslenska orkugeirann. Á fundinum var undirrituð samstarfsyfirlýsing vegna IDDP-3 djúpborunarverkefnisins milli umhverfis-, orku- og loftslagsráðuneytisins og Landsvirkjunar, Orkuveitu Reykjavíkur og HS Orku, sem að verkefninu standa.

Samstarfsyfirlýsingin endurspeglar vilja íslenskra stjórnvalda og orkufyrirtækja til að flýta þróun næstu kynslóðar jarðvarmakerfa sem hluta af langtímastefnu í orkumálum. Fram kom í máli ráðherra og Sigurðar H. Markússonar leiðtoga djúpnýtingar hjá Orkuveitu Reykjavíkur að ákveðið hefði verið að hraða djúpborunarverkefninu og að boranir hefjist strax á næsta ári. IDDP gengur út á að bora dýpra ofan í jarðhitakerfi á háhitasvæðum en áður hefur verið gert og virkja í kjölfarið varmaorku í dýpri lögum og stækka með því jarðhitakerfið niður á við.

Góð þátttaka var í viðburðinum sem haldinn var í Björtu loftum í Hörpu á föstudag. Auk ráðherra flutti Ólafur Ragnar Grímsson, fyrrverandi forseti og formaður Hringborðs Norðurslóða, opnunarávarp viðburðarins. Aðrir þátttakendur voru Bjarni Pálsson, framkvæmdastjóri vinds og jarðvarma hjá Landsvirkjun, Hera Grímsdóttir, framkvæmdastýra rannsókna og nýsköpunar hjá Orkuveitu Reykjavíkur, Lilja Magnúsdóttir, deildarstjóri auðlindastýringar hjá HS Orku, og Paolo Papale, framkvæmdastjóri rannsókna hjá ítölsku jarðfræði og eldfjallastofnuninni INGV. 

Jóhann Páll sagði jarðhita lengi hafa nýst íslenskum heimilum og iðnaði. Með nýtingu ofurhita gætu opnast nýir og áður óþekktir möguleikar. „Ef við getum virkjað svæði þar sem hitinn fer yfir 400°C getum við endurskilgreint hagfræði hreinnar, öruggrar orku,“ sagði ráðherra og kvað ofurhita geta skapað grunn að nýjum atvinnugreinum, nýsköpun og verðmætasköpun.

Góð þátttaka var í viðburðinum.

Vinna hafin við fyrsta jarðhitavegvísi Íslands

Jóhann Páll greindi einnig frá því að vinna sé nú hafin við gerð fyrsta jarðhitavegvísi Íslands. Með vegvísinum sem gilda á til ársins 2050 verði horft fram á við og sett skýr markmið varðandi jarðhitaleit, rannsóknir, nýsköpun og sjálfbærni. Þá muni vísirinn ná yfir allan jarðhitaskalann – allt frá lághita til háhita. „Vegvísirinn mun einnig styrkja alþjóðlegt samstarf okkar svo reynsla Íslands í jarðhitamálum geti nýst öðrum þjóðum.“

Ráðherra sagði íslensk stjórnvöld þá leggja aukinn þunga í að styðja við jarðhitaverkefni. Með styrkveitingum í gegnum Loftslags- og orkusjóð verði lögð áhersla á nýsköpun og tækniframfarir.  

„Ísland hefur náð ótrúlegum árangri á sviði jarðhitanýtingar, en það sem hefur vantað sárlega er er strategía og stefna, skýr áætlun fram veginn um hvernig við getum styrkt samkeppnishæfni okkar enn frekar.  Jarðvarmi er ekki bara uppspretta hita eða rafmagns, því að með aukinni nýtingu jarðhita getum við tryggt seiglu, byggt upp samkeppnishæfan iðnað og drega úr losun gróðurhúsalofttegunda á sama tíma,” sagði Jóhann Páll.