Þingsályktun um borgarstefnu samþykkt á Alþingi

Þingsályktun um borgarstefnu fyrir árin 2025-2040 var samþykkt á Alþingi síðdegis í gær. Stefnan markar tímamót í byggðastefnu stjórnvalda en þetta er í fyrsta skipti sem samþykkt er heildstæð stefna um borgir og borgarsvæði á Íslandi og þróun þeirra. Samráðsvettvangur ríkis og borgarsvæðanna verður settur á fót til að innleiða stefnuna.

Í stefnunni felst annars vegar að styrkja höfuðborgarhlutverk Reykjavíkur, höfuðborgarsvæðið og borgarsvæðið í heild og hins vegar að festa Akureyri í sessi sem svæðisborg og skilgreina og efla hlutverk hennar og borgarsvæði.

Markmið borgarstefnu er jafnframt að styrkja stöðu Íslands í alþjóðlegri samkeppni. OECD hefur lagt mikla áherslu á að ríki móti sér sérstaka borgarstefnu sem stuðli að sjálfbærum vexti borga og borgarsvæða og aukinni skilvirkni, sem lið í að efla samkeppnishæfni viðkomandi svæða.

„Ég fagna því að þingsályktun um borgarstefnu hafi nú verið samþykkt. Borgarsvæðin okkar eru fyrst og fremst í samkeppni við borgir í þeim löndum sem við berum okkur saman við. Alþjóðleg samkeppnishæfni landsins veltur því að miklu leyti á því að borgarsvæðin hafi sterka stöðu í samkeppni við borgarsvæði erlendis,“ segir Eyjólfur Ármannsson innviðaráðherra.

Samstarfsvettvangur ríkis og borgarsvæða

Í samræmi við nýsamþykkta borgarstefnu verður nú unnið því á næstu vikum að koma á fót formlegum samstarfsvettvangi ríkisins og borgarsvæðanna . Á þeim vettvangi verður inntak borgarstefnu þróað sameiginlega með ríki og viðkomandi sveitarfélögum þannig að þær áherslur sem eru settar fram leiði til aðgerða og styðji þannig við framtíðarsýn stefnunnar.

Mótun borgarstefnu er liður í framkvæmd stefnumótandi byggðaáætlunar sem samþykkt var einróma á Alþingi í júní 2022. Ein af áherslum byggðaáætlunar er að unnið verði með styrkleika einstakra svæða en aðgerð C.4. sem fjallar um mótun borgarstefnu byggist á þessari áherslu.

• Nánar um efnistök borgarstefnu (tilkynning ráðuneytisins 14. mars 2025)