64 ný hjúkrunarrými á Hrafnistu í Kópavogi

Félags- og húsnæðismálaráðherra, heilbrigðisráðherra, bæjarstjóri Kópavogs og forráðamenn Hrafnistu opnuðu í dag nýtt 64 rýma hjúkrunarheimili í Boðaþingi í Kópavogi. Fyrir eru 44 rými í Boðaþingi og eru hjúkrunarrýmin þannig orðin 108 talsins. Óhætt er að segja að um mikilvægan áfanga sé að ræða í uppbyggingu hjúkrunarheimila hér á landi, enda eru biðlistar langir, ekki síst á höfuðborgarsvæðinu. Eignarhald er sameiginlega á hendi ríkisins og Kópavogsbæjar en Hrafnista annast reksturinn.  

Nýja byggingin í Boðaþingi er alls 4.160 m2 að stærð og býður upp á vandað þjónusturými. Fullbúinn lífsgæðakjarni er þar með risinn í Boðaþingi þar sem Hrafnista og Kópavogsbær munu reka saman blöndu af leiguíbúðum DAS, þjónustumiðstöð og nú stóru og góðu hjúkrunarheimili. María Fjóla Harðardóttir, forstjóri Hrafnistu, segir nýja húsnæðið einstaklega fallegt og hlýlegt: „Við hlökkum til að bjóða nýja íbúa velkomna en þeirra bíður meðal annars stórkostlegt útsýni af svölum og úr borðsal heimilisins, sem breytir um svip með veðri og árstíðum. Þetta er eins og lifandi málverk sem náttúran málar á hverjum degi.“

Meðal þeirra sem héldu erindi á opnunarhátíðinni í dag voru Inga Sæland, félags- og húsnæðismálaráðherra, Alma D. Möller, heilbrigðisráðherra, Ásdís Kristjánsdóttir, bæjarstjóri Kópavogs, Aríel Pétursson, stjórnarformaður Sjómannadagsráðs, María Fjóla Harðardóttir, forstjóri Hrafnistu og Óskar Jósefsson, forstjóri Framkvæmdasýslunnar - Ríkiseigna.

Inga Sæland félags- og húsnæðismálaráðherra:

„Þessi áfangi er mikilvægur fyrir samfélagið okkar. Með opnun nýrra hjúkrunarrýma í Boðaþingi getum við tryggt fleiri eldri borgurum öruggt og fallegt heimili. Opnunin í dag er enn einn áfangi í stórsókn stjórnvalda í uppbyggingu hjúkrunarheimila á landinu.“

Alma D. Möller heilbrigðisráðherra:

„Opnun nýs Boðaþings er langþráður áfangi og upptakturinn að því sem koma skal. Veruleg fjölgun hjúkrunarrýma á næstu misserum er á áætlun, samhliða eflingu þjónustu við aldraða sem geta búið heima fái þeir til þess góðan stuðning. Þetta er stór dagur og gleðilegur, fyrir íbúana hér, aðstandendur þeirra og samfélagið allt.“

Ásdís Kristjánsdóttir bæjarstjóri Kópavogsbæjar:

„Það er ánægjulegt að 64 hjúkrunarrými bætist við í Boðaþingi við þau sem fyrir eru enda mikil þörf á fleiri hjúkrunarrýmum í Kópavogi eins og annars staðar. Hér í Boðaþingi er mjög fallegt umhverfi og lífsgæðakjarninn sem hér er og rekinn er í samstarfi Hrafnistu og Kópavogsbæjar þjónar fjölbreyttum hópi eldri borgara.“ 

Íbúar gengu rauða dregilinn í tilefni dagsins.

 

Hönnun og bygging

Á vormánuðum 2022 var efnt til samkeppni um hönnun og byggingu heimilisins. Tillaga THG Arkitekta og ÍSTAK hlaut brautargengi. Hönnun á grundvelli vinningstillögunnar hófst strax að lokinni samkeppni og jarðvegsframkvæmdir hófust í maí 2023. Verkið hefur gengið hratt fyrir sig og nú er framkvæmdum lokið að fullu. Framkvæmdasýsla ríkisins (FSRE) annaðist útboðsmál og verkefnastjórn fyrir hönd verkkaupa.

Hrafnista er stærsti rekstraraðili öldrunarþjónustu á landinu og rekur alls átta dvalarheimili í fimm sveitarfélögum. Félagið er óhagnaðardrifið dótturfélag Sjómannadagsráðs sem rekið hefur dvalarheimili Hrafnistu í tæp sjötíu ár. Meginmarkmið Hrafnistu er að veita framúrskarandi þjónustu til þess að íbúar, aðrir þjónustuþegar og aðstandendur upplifi öryggi, traust og vellíðan.

Ljósmynd: Sverrir H. Geirmundsson

Fjölgun hjúkrunarrýma

Í stefnuyfirlýsingu ríkisstjórnarinnar er áhersla lögð á málefni eldra fólks, þar á meðal fjölgun hjúkrunarrýma. Fjölmargir áfangar hafa náðst að undanförnu:

• Þann 19. mars síðastliðinn var tilkynnt að samkomulag væri í höfn milli ríkis og sveitarfélaga um ábyrgðarskiptingu á uppbyggingu hjúkrunarheimila.
• Í byrjun maí tók félags- og húsnæðismálaráðherra fyrstu skóflustunguna að nýju hjúkrunarheimili í Ási í Hveragerði.
• Nokkrum dögum síðar mundaði ráðherra sleggju við Nauthólsveg en þar verður ráðist í gagngerar endurbætur á húsnæði sem breytt verður í hjúkrunarheimili.
• Undir lok maímánaðar var ráðherra á Akureyri vegna samkomulags um nýtt hjúkrunarheimili í Þursaholti.
• Sama dag fór ráðherra á Húsavík en þar hefur kyrrstaða nú verið rofin um hjúkrunarheimili sem beðið hefur verið eftir svo árum skiptir.
• Þann 16. júní síðastliðinn var samkomulagið frá því í mars sem náðist milli ríkis og sveitarfélaga fest í lög.
• Þann 1. júlí var nýtt samkomulag undirritað um þreföldun hjúkrunarrýma í Mosfellsbæ.
• Þremur dögum síðar var skóflustunga tekin að stækkun hjúkrunarheimilisins í Sóltúni.

 

Inga Sæland, félags- og húsnæðismálaráðherra, heldur ávarp.

Alma Möller, heilbrigðisráðherra, heldur ávarp.

María Fjóla Harðardóttir, forstjóri Hrafnistu.