Veiðiheimildir á bláuggatúnfiski aukast um 13%

Samkvæmt úthlutun sem ákveðin var á 29. ársfundi Atlantshafs túnfiskveiðiráðsins (ICCAT) hefur veiðiheimild Íslands á bláuggatúnfiski verið aukin úr 224 tonnum í 254,13 tonn eða um 13%.

Bláuggatúnfiskur er einn verðmætasti fiskur hafsins og geta talsverð því verðmæti verið fólgin í íslenskum veiðiheimildum.

Um veiðar á bláuggatúnfiski gilda töluvert strangar reglur. Sem stendur er nauðsynlegt að vera með skip sem siglir undir íslenskum fána til að nýta veiðiheimildir Íslands. Íslenskar útgerðir hafa ekki stundað beinar veiðar á Austur-Atlantshafs bláuggatúnfiski síðan árið 2016 en bláuggatúnsfiskur sem veiðist sem meðafli hefur verið skráður. Ef veiðiheimildir Íslands væru nýttar gæfist tækifæri á að sækja auknar veiðiheimildir innan ICCAT en sem stendur nemur aukningin tæplega 30 tonnum á ári.

Innan ICCAT hefur Ísland bent á nauðsyn þess að endurskoða reglur sem banna erlend leiguskip en þær reglur gilda einungis um stofn bláuggatúnfisks. Sú umræða verður endurvakin og óskað eftir vísindalegum rökum fyrir banninu.

Staða Austur-Atlantshafs bláuggatúnfisks er talin sterk og er talið að stjórnun og verndun á þessum stofni sé eitt besta dæmið um endurheimt fiskistofns á síðustu áratugum.

Sjá nánar reglugerð um veiðar á Austur-Atlantshafs bláuggatúnfiski.