PMTO-miðstöð fyrir foreldra barna með hegðunarerfiðleika

Inga Sæland, mennta- og barnamálaráðherra, og Heiða Björg Hilmisdóttir borgarstjóri undirrituðu í gær samning um rekstur PMTO-miðstöðvar sem ætlað er að þjóna öllu landinu. PMTO-foreldrafærni er gagnreynt meðferðarúrræði fyrir foreldra barna með samskipta- eða hegðunarerfiðleika sem hefur reynst afar vel hér á landi.

Aðferðin hefur verið notuð hér á landi í 25 ár með góðum árangri. Í dag bjóða tíu sveitarfélag víðs vegar um landið foreldrum uppá PMTO-fræðslu. Árlega fá um 700 foreldrar þjónustu, auk þess að margir skólar njóta góðs af skólaútgáfu aðferðarinnar.

Rannsóknir sýna að foreldrar sem hafa fengið PMTO-þjónustu eru mjög ánægðir, þeir styrkjast í uppeldishlutverki sínu og finna jákvæðar breytingar sem geta skipt sköpum fyrir framtíð barnsins og fjölskyldunnar.

Í samningnum felst að Reykjavíkurborg tekur að sér að reka PMTO-miðstöð sem þjónar landinu öllu. Keðjan, sem er starfseining innan Reykjavíkurborgar sem veitir stuðningsþjónustu fyrir börn, veitir miðstöðinni faglega forystu, í samstarfi við rannsóknarstofu hjá Menntavísindasviði HÍ. Unnið verður að því á samningstímanum að finna miðstöðinni stað til framtíðar.

Foreldrar sem vilja sækja um þjónustuna sækja um hana í sínu sveitarfélagi, ýmist í gegnum skóla barnsins eða hjá velferðar- eða skólaþjónustu sveitarfélagsins.

Mennta- og barnamálaráðuneytið tryggir fjármögnun miðstöðvarinnar með 53 milljóna framlagi sem dreifist yfir gildistíma samningsins. Samningurinn gildir til 31. desember 2027.

„Við viljum valdefla foreldra og grípa snemma inn í þegar börn glíma við áskoranir. PMTO gerir bæði í senn með gagnreyndri lágþröskuldaþjónustu sem við viljum auka aðgengi að,“ segir Inga Sæland, mennta- og barnamálaráðherra.

„PMTO-fræðslan hjálpar foreldrum að styðja við jákvæða hegðun barna og takast á við krefjandi áskoranir. Með fræðslunni læra foreldrar að setja skýr mörk á uppbyggilegan hátt. Hún styrkir samskiptin og eykur öryggi og vellíðan barna og skilar öruggum og heilsteyptum einstaklingum til samfélagsins. Það bætir hag okkar allra,“ segir Heiða Björg Hilmisdóttir borgarstjóri.