Degi Norðurlanda er fagnað í dag

Dagur Norðurlanda er haldinn hátíðlegur í dag, mánudaginn 23. mars. Þá er fagnað elsta svæðisbundna pólitíska samstarfi heims, þ.e. milli Danmerkur, Finnlands, Íslands, Noregs, Svíþjóðar, Færeyja, Grænlands og Álandseyja. 

Af þessu tilefni verða ýmsir viðburðir haldnir víðsvegar á Norðurlöndunum og í Eystrasaltsríkjunum í vikunni. Yfirskrift þeirra er lýðræði og ungt fólk og er markmiðið að kanna afstöðu ungs fólks til lýðræðis og framtíð þess. 

Á Íslandi verður deginum fagnað með morgunfundi í Norræna húsinu í Reykjavík á morgun, þriðjudaginn 24. mars. Þar verður sjónum beint að forsendum lýðræðis á víðsjárverðum tímum. 

Nánari upplýsingar um dag Norðurlanda og viðburði má nálgast á vef norræns samstarfs.