Málum hjá CERT-IS fjölgaði um 43% milli ára

Netöryggissveit íslenskra stjórnvalda CERT-IS bárust 5240 tilkynningar á síðasta ári, en þeim fjölgaði um 26 prósent milli ára. Eftir mat á umfangi og áhrifa urðu tilkynningarnar að 2312 ólíkum málum sem kölluðu á viðbrögð sveitarinnar, en slíkum málum fjölgaði um 43 prósent frá árinu áður. 

Þetta er á meðal þess sem kemur fram í nýju ársyfirliti CERT-IS fyrir árið 2025.

Líkt og fyrri ár tengdust flestar tilkynningarnar vefveiðum, e. phishing, eða í 1304 tilfellum, þar sem óprúttnir aðilar beita svindli til að komast yfir viðkvæmar upplýsingar, s.s. greiðslukortanúmer eða lykilorð. Slíkum tilfellum vefveiða fjölgaði um 47 prósent á síðasta ári. 

Þau vörumerki sem oftast voru notuð við vefveiðablekkingar á síðasta ári voru Pósturinn, Microsoft, Skatturinn, Veitur og Ísland.is.

Í 257 málum komu svokölluð spilliforrit við sögu, þar sem skaðlegum hugbúnaði var komið fyrir í kerfum, honum dreift í gegnum vefsíður eða hýstur á netþjónum innanlands. Markmið slíkra forrita er að hafa áhrif á rekstur, afla gagna með ólöglegum hætti eða nýta kerfi til óæskilegrar starfsemi.

Mesta aukningin var hins vegar í innbrotum og innbrotstilraunum, en þeim fjölgaði um heil 388 prósent á milli ára. Aukninguna má í mörgum tilfellum rekja til hnitmiðaðri vefveiðaherferða, þar sem aðferðir á borð við milligönguárásir voru notaðar til að komast inn í kerfi. Þá brjótast netþrjótar inn á vefpóst einstaklinga og senda svikapósta í þeirra nafni til þekktra tengiliða. Ólíkt hefðbundnum vefveiðapóstum eru umræddir póstar persónulegri og því e.t.v. líklegri til árangurs. 

Þetta er á meðal þess sem lesa má um í nýju ársyfirliti CERT-IS fyrir árið 2025, og er hægt að nálgast hér.