Ríki og borg semja um stórfellda uppbyggingu íbúða - 1.200-1.400 nýjar íbúðir byggðar á ríkislóðum

Ragnar Þór Ingólfsson, félags- og húsnæðismálaráðherra, Daði Már Kristófersson, fjármála- og efnahagsráðherra, og Heiða Björg Hilmisdóttir, borgarstjóri, kynntu í dag stórfellda íbúðauppbyggingu á ríkislóðum og í ríkiseignum í Reykjavík. Byggðar verða 1.200-1.400 nýjar íbúðir á næstu árum á lóðum ríkisins og í húsnæði í eigu ríkisins sem breytt verður í íbúðir. 

Íbúðirnar verða á eftirfarandi stöðum og áætlaður fjöldi þeirra er:

Borgartún: 220 íbúðir 
Grensásvegur: 90 íbúðir 
Efri hluta Laugavegar: 100 íbúðir 
Laugarnesvegur: 300 íbúðir 
Seljavegur: 90 íbúðir
Á landi austan Korpúlfsstaða, á mörkum Reykjavíkur og Mosfellsbæjar: Á bilinu 400-600 íbúðir

Alls eru íbúðirnar því um 1.200-1.400 talsins. Verkefnin eru mislangt á veg komin og íbúðum getur fjölgað enn frekar eftir því sem líður á skipulagsferlið.

Annars vegar verða þetta nýbyggingar og hins vegar umbreyting á húsnæði sem ríkið nýtti áður undir stofnanir og margvíslega aðra starfsemi.

20-30% íbúðanna verða hagkvæmar íbúðir, það er almennar íbúðir og íbúðir sem uppfylla skilyrði hlutdeildarlána, aðrar leiguíbúðir (til dæmis stúdentaíbúðir, leiguíbúðir Félagsbústaða og íbúðir fyrir eldra fólk) og búseturéttaríbúðir. 

Á næstunni verða verkefnin auglýst og þá gefst uppbyggingaraðilum kostur á að sækja um að taka þátt í þeim. Í framhaldinu verða lóðirnar og eignirnar seldar til þeirra sem verða fyrir valinu og verkefnin fara svo áfram í frekara skipulagsferli.

Næsta skref er að vinna markvisst að uppbyggingu á ríkislóðum og ríkiseignum í fleiri sveitarfélögum. 

Nýju íbúðirnar á ríkisreitunum eru kjölfestan í öðrum húsnæðispakka ríkisstjórnarinnar.

• Glærur af blaðamannafundinum: Aðgerðir í húsnæðismálum
  

Glærur af blaðamannafundinum. Ef smellt er á myndina opnast kynningin..

Ragnar Þór Ingólfsson, félags- og húsnæðismálaráðherra: Byggjum meira og jöfnum leikinn

„Ég er uppalinn í Breiðholtinu og þegar uppbygging hófst þar á sínum tíma voru kynnt áform um að reisa 1.250 íbúðir. Hér erum við með 1.200-1.400 íbúðir og uppbyggingu af stærðargráðu sem munar um. Við erum að koma inn á markaðinn með lóðir sem hefur sárlega vantað því við verðum að byggja meira. Um leið erum við að jafna leikinn og styðja bæði við leigjendur og fyrstu kaupendur. Í ofanálag erum við að setja rækilega á dagskrá að breyta atvinnuhúsnæði í hentugar og góðar íbúðir. Við gerum þetta í góðu samstarfi við Reykjavíkurborg og samvinnan sýnir hversu miklu stjórnvöld geta áorkað þegar þau taka höndum saman.“

Daði Már Kristófersson, fjármála- og efnahagsráðherra:

„Það er mikilvægt að tryggja að þróunarreitir ríkisins séu nýttir til uppbyggingar. Það hefur verið kyrrstaða í þessum málum sem hefur valdið því að uppbygging hefur ekki verið jafn hröð og ákjósanlegt hefði verið. Við einsettum okkur að bæta samskipti ríkisins og sveitarfélaga. Þetta er enn eitt dæmi um árangurinn af því. Með þessum samningnum fjölgum við íbúðum í borginni, bæði með umbreytingu á eldra húsnæði í eigu ríkisins og betri nýtingu lóða.“

Heiða Björg Hilmisdóttir, borgarstjóri:

„Þessir samningar sýna hverju við getum áorkað þegar ríki og borg vinna saman af alvöru að  húsnæðismálum. Við í meirihlutanum í borginni höfum lagt áherslu á fjölbreytt framboð húsnæðis, hraðari uppbyggingu og að nýta það landrými sem fyrir hendi er, í samræmi við húsnæðisáætlun Reykjavíkurborgar. Hér erum við að leggja drög að yfir þúsund nýjum heimilum  fyrir íbúa og tryggja um leið að hluti þeirra verði hagkvæmar íbúðir fyrir þá íbúa sem þurfa á því að halda. Þetta samstarf skilar fleiri heimilum , sterkara samfélagi og öflugri húsnæðismarkaði.“

Fjölbreyttar aðgerðir þar sem heimili fólks eru sett í forgang

Fleiri aðgerðir eru í öðrum húsnæðispakka ríkisstjórnarinnar og hafa sumar þegar verið kynntar:

Málefni leigjenda tekin föstum tökum

Ráðist hefur verið í umfangsmiklar aðgerðir til að styrkja stöðu leigjenda og bæta leigumarkaðinn. Aðgerðirnar ganga út frá því að bæta réttarstöðu leigjenda, tryggja leigjendum öflug réttarúrræði, auka þekkingu á réttindum og skyldum á leigumarkaði og bæta húsnæðisstuðning við leigjendur. Þá hefur stuðningur við leigendur í gegnum Leigjendaaðstoð Neytendasamtakanna verið stóraukinn.

Stuðlað að frekari umbreytingu atvinnuhúsnæðis í almennar íbúðir

Komið verður á nýjum viðbótarframlögum í almenna íbúðakerfinu vegna atvinnuhúsnæðis sem verður umbreytt í íbúðir. Framlögin munu nema allt að 5% af stofnkostnaði almennra íbúða (leiguíbúðir sem eru fyrir tekju- og eignalægra fólk) og koma til viðbótar við hefðbundin stofnframlög ríkis og sveitarfélaga.

Greining á húsnæðislánakerfinu og mögulegum breytingum

Starfshópi um nýtt húsnæðislánakerfi hefur verið falið að kortleggja nýlegar breytingar á lánaframboði og áhrif þeirra á neytendur og greina hvort gera þurfi breytingar á löggjöf um fasteignalán til neytenda. Einnig verður skoðað hvort og þá hvernig taka megi upp nýtt húsnæðislánakerfi, með hliðsjón af erlendum fyrirmyndum, til að tryggja meira gagnsæi, sveigjanleika og fyrirsjáanleika fyrir neytendur.

Áhersla á húsnæðismál fatlaðs fólks 

Sértæk búsetuúrræði fyrir fatlað fólk hafa verið tekin sérstaklega til skoðunar með það að markmiði að skoða hvernig hægt sé að mæta margvíslegum þjónustuþörfum fatlaðs fólks með sveigjanlegri og fjölbreyttari hætti. Áhersla er lögð á heimili sem styðja sjálfstætt líf.

„Húsnæði fyrst“: Landsstefna um málefni þeirra sem búa við heimilisleysi

Sett verður stefna á landsvísu um málefni þeirra sem búa við heimilisleysi eða aðrar óviðunandi húsnæðisaðstæður. Stefnan mun fylgja hugmyndafræðinni um húsnæði fyrst (e. Housing first) sem byggir á þeirri hugmynd að það að eiga öruggt heimili sé forsenda þess að fólk geti náð frekari árangri á öðrum sviðum.

Stutt við húsnæðisuppbyggingu á landsbyggðinni

Viljayfirlýsing hefur verið undirrituð um húsnæðisuppbyggingu á landsbyggðinni. Markmiðið er að styðja við fjölbreyttar húsnæðislausnir í byggðakjörnum utan höfuðborgarsvæðisins.

Aðgerðirnar byggja á stefnuyfirlýsingu ríkisstjórnarinnar þar sem kveðið er á um að ríkislóðir verði nýttar til uppbyggingar, atvinnuhúsnæði verði breytt í íbúðir og staða leigjenda verði styrkt.

Ragnar Þór Ingólfsson, félags- og húsnæðismálaráðherra, Heiða Björg Hilmisdóttir, borgarstjóri, og Daði Már Kristófersson, fjármála- og efnahagsráðherra.