03 júlí 2026
/
Heilbrigðisráðuneytið
Aðgerðaáætlun um mönnun heilbrigðisþjónustu
Birt hefur verið aðgerðaáætlun til tveggja ára, um framkvæmd Mönnunarstefnu í heilbrigðisþjónustu til ársins 2030. Mönnunarstefnan tekur mið af dreifingu og nýtingu mannafla heilbrigðisþjónustunnar og mannaflaþörf til framtíðar. Í aðgerðaáætluninni er fjallað um áherslur og verkefni sem unnið verður að árin 2026 og 2027 í samræmi við markmið stefnunnar.
Í áætluninni eru tilgreindar aðgerðir á sjö sviðum sem eru:
- Mönnun og aðgengi að heilbrigðisþjónustu
- Gögn og greiningar um mönnun
- Menntun og þjálfun
- Löggiltar heilbrigðisstéttir, starfsleyfi og sérfræðileyfi
- Starfsumhverfi, ráðningar og nýliðun
- Öryggi, réttindi og heilsa heilbrigðisstarfsfólks
- Tækni og nýsköpun
Áhersla er lögð á mikilvægi þess að horfa til allra þátta sem hafa áhrif á mönnunarþörf til að tryggja áframhaldandi eflingu menntunar og mönnunar í heilbrigðisþjónustu hér á landi með það að markmiði að tryggja sjálfbærni mönnunar. Ekki síst þarf að leggja aukna áherslu á starfsumhverfið í heild, þverfaglega teymisvinnu, verkaskiptingu og mögulegar tilfærslur verkefna í þágu bættrar þjónustu við notendur. Er þá sérstaklega horft til þess að mönnun sé í samræmi við þjónustuþörf á hverjum stað.
Vönduð gögn um mannafla heilbrigðisþjónustunnar og greiningar byggðar á þeim eru mikilvæg forsenda fyrir raunhæfum mönnunarspám og markvissum aðgerðum á sviði mönnunar og menntunar í heilbrigðisþjónustu. Unnið er að því að byggja upp stafrænt mælaborð sem veitir á einum stað yfirsýn yfir mönnun á öllum opinberum heilbrigðisstofnunum. Mikilvægt er að einnig séu fyrir hendi greinagóð gögn og upplýsingar um starfandi heilbrigðisstarfsmenn eftir fagstéttum og sérfræðigreinum á einkareknum starfsstöðvum sem sinna heilbrigðisþjónustu á grundvelli samninga og gert ráð fyrir að hefja þá vinnu á tíma aðgerðaáætlunarinnar. Sömuleiðis er í áætluninni gert ráð fyrir því að greina mannaflaþörf á hjúkrunarheimilum.