Fundargerð fjármálastöðugleikaráðs 18. júní 2026

Reykjavík, 18. júní 2026                   

Efni: Fundargerð fjármálastöðugleikaráðs                                   
Fundur haldinn í fjármála- og efnahagsráðuneyti.

Ráðsmenn: Daði Már Kristófersson, fjármála- og efnahagsráðherra, formaður, og Ásgeir Jónsson, seðlabankastjóri.

Aðrir fundarmenn: Tómas Brynjólfsson, varaseðlabankastjóri fjármálastöðugleika, Flóki Halldórsson framkvæmdastjóri fjármálastöðugleikasviðs, Sigríður Dís Guðjónsdóttir, forstöðumaður á fjármálastöðugleikasviði Seðlabankans, Steinn Friðriksson, sérfræðingur á skrifstofu bankastjóra, Hermann Sæmundsson, ráðuneytisstjóri í fjármála- og efnahagsráðuneyti, Sigurður Páll Ólafsson, skrifstofustjóri á skrifstofu efnahagsmála, Gunnlaugur Helgason, staðgengill skrifstofustjóra á skrifstofu fjármálamarkaðar, Eggert Páll Ólason, sérfræðingur á skrifstofu fjármálamarkaðar, og Sigríður Rafnar Pétursdóttir, ritari fjármálastöðugleikaráðs.

Fundur hófst kl. 9:00.

1. Staða og horfur í fjármálakerfinu og hagkerfinu
Seðlabankinn fór yfir stöðu, horfur og helstu áhættuþætti í fjármála- og hagkerfinu. Alþjóðapólitísk áhætta hefur verið mikil og vaxandi síðustu mánuði. Skuldsetning ríkissjóðs er hófleg og ytri staða þjóðarbúsins sterk. Þegar á heildina er litið er viðnámsþróttur heimila, fyrirtækja og banka að mati Seðlabankans mikill. Vanskil í bankakerfinu eru enn lítil en aðeins á uppleið hjá ákveðnum atvinnugeirum. Verðbólguþrýstingur vegna orkuverðs er að minnka. Margar nýbyggingar eru óseldar og sala þeirra tekur langan tíma. Betur gengur að selja minni nýbyggðar íbúðir. Kaupendum fyrstu fasteignar hefur ekki fækkað og rýmkun lánþegaskilyrða hefur nýst hluta þeirra. Undanþáguheimild frá hámarki greiðslubyrðarhlutfalls er enn lítið nýtt. Vaxtaálag á erlendar útgáfur íslenskra banka er stöðugt; fjármögnunarkostnaður erlendis hefur lækkað.

2. Sérstök umræða
a) Vaxandi áhætta í rekstri fjármálainnviða
Netárásum fjölgar hvarvetna. Samkvæmt Evrópsku bankaeftirlitsstofnuninni (EBA) hefur einn af hverjum þremur evrópskum bönkum orðið fyrir a.m.k. einni árangursríkri netárás. Íslenskt fjármálakerfi stendur frammi fyrir ýmsum áskorunum í breyttum heimi. Það er um margt háð alþjóðlegum tæknilausnum, einsleitni gætir í greiðsluþjónustu, aðgengi og notkun reiðufjár eru takmörk sett og gefa verður aukinni áhættu sem tengist gervigreind gaum.

b) Viðbrögð Seðlabankans
Seðlabankinn er að grípa til fjölbreyttra aðgerða til að styrkja greiðslumiðlun, efla viðbúnað fyrir nauðsynlega fjármálaþjónustu og viðhafa betri yfirsýn og regluleg samskipti við ólíka haghafa. Samvinna er mikilvæg við önnur stjórnvöld, atvinnulíf og almenning. Heimili þurfa að vera viðbúin því að ein eða fleiri greiðsluleiðir séu tímabundið óaðgengilegar (kynna sér og virkja tiltækar staðgönguleiðir). Söluaðilar ættu með sama hætti að vera viðbúnir því að greiðslukort virki ekki og aðilar á fjármálamarkaði að viðhafa fullnægjandi áætlanir um viðbúnað og samfelldan rekstur nauðsynlegrar fjármálaþjónustu. 

3. Önnur mál
Á fundinum var gerð grein fyrir ákvörðunum skilavalds frá síðasta fundi ráðsins. Greint var frá því að Seðlabankinn myndi undirrita á næstu dögum samning við Seðlabanka Evrópu um þátttöku Íslands í TIPS, rauntímagreiðslukerfi Evrukerfisins (TARGET Instant Payment Settlement), sem felur í sér að frá árinu 2028 verður unnt að gera upp rauntímagreiðslur í íslenskum krónum í TIPS.

Drög að fréttatilkynningu voru samþykkt.

Fundi var slitið um kl. 9:40.

                                                                             

Daði Már Kristófersson, fjármála- og efnahagsráðherra, formaður fjármálastöðugleikaráðs

Fundargerðin á pdf-formi