Frumvarpsdrög um breyttan útivistartíma barna kynnt til samráðs

Mennta- og barnamálaráðuneytið hefur birt í Samráðsgátt stjórnvalda drög að frumvarpi um breytingu á barnaverndarlögum, nr. 80/2002, sem varðar útivistartíma barna.

Efni frumvarpsins var áður kynnt sem hluti af drögum að frumvarpi til nýrra heildarlaga um barnavernd sem lagt var fram á 157. löggjafarþingi en náði ekki fram að ganga. Í samræmi við nefndarálit meiri hluta velferðarnefndar Alþingis er efnið nú kynnt í sérstöku frumvarpi og óskað eftir frekara samráði við börn og aðra hlutaðeigandi aðila um þennan afmarkaða en mikilvæga málaflokk sem snertir daglegt líf fjölskyldna í landinu.

Í frumvarpsdrögunum er lagt til að útivistartími barna á aldrinum 10–12 ára verði lengdur um eina klukkustund yfir vetrartímann. Samkvæmt tillögunni verður þeim heimilt að vera á almannafæri til klukkan 21.00 án fylgdar fullorðinna, í stað klukkan 20.00 samkvæmt gildandi lagareglum.

Jafnframt er lagt til að börn níu ára og yngri megi vera úti til klukkan 20.00 og að reglur fyrir börn á aldrinum 13–16 ára verði áfram miðaðar við klukkan 22.00. Undantekning gildir meðal annars þegar börn eru á heimferð úr skóla-, íþrótta- eða frístundastarfi.

Einnig er lagt til að sumartími reglnanna gildi frá 1. júní til 1. september í stað þess að hefjast 1. maí. Markmiðið er að tengja reglurnar betur við skólaárið.

Reglur um útivistartíma barna hafa að meginstefnu til staðið óbreyttar frá árinu 1992. Við undirbúning frumvarpsins hefur meðal annars verið tekið mið af sjónarmiðum barna um aukinn sveigjanleika, þroska og möguleika til útiveru og samveru, samhliða verndar- og forvarnarsjónarmiðum.

Börn, foreldrar, fagfólk, hagaðilar og aðrir áhugasamir eru hvattir til að kynna sér frumvarpsdrögin og senda inn umsögn í Samráðsgátt stjórnvalda. Umsagnarfrestur er til og með 28. ágúst.

• Senda inn umsögn í Samráðsgátt stjórnvalda