Ísland tekur þátt í sameiginlegri yfirlýsingu um tveggja ríkja lausnina

Þorgerður Katrín Gunnarsdóttir utanríkisráðherra er meðal tólf utanríkisráðherra sem gefið hafa út sameiginlega yfirlýsingu er varðar áform um upptöku viðskiptaþvingana eða annarra aðgerða vegna ólöglegra landtökubyggða Ísraela í Palestínu sem grafi undan tveggja ríkja lausninni svokölluðu.

Í yfirlýsingunni er áréttaður stuðningur ríkjanna við tveggja ríkja lausnina og mikilvægi þess að koma á varanlegum og réttlátum friði. Skorað er á Ísraelsstjórn að láta tafarlaust af útþenslu landtökubyggða í Palestínu, að tryggja að landtökufólk verði dregið til ábyrgðar vegna ofbeldisverka og að ásakanir í garð ísraelskra hermanna verði rannsakaðar.

Í yfirlýsingunni viðurkenna ríkin jafnframt lögmæta öryggishagsmuni Ísrael og ítreka fordæmingu sína á hryðjuverkaárás Hamas þann 7. október árið 2023. Árásin hafi verið sú blóðugasta gagnvart samfélagi gyðinga síðan í helförinni, og taka verði á gyðingahatri hvar sem það fyrirfinnst.

Rikin sem taka undir yfirlýsinguna auk Íslands eru Bretland, Danmörk, Finnland, Frakkland, Írland, Kanada, Noregur, Pólland, Portúgal, Spánn og Svíþjóð.