62 milljónum króna varið til umferðaröryggisfræðslu í grunnskólum

Ein af megin aðgerðum umferðaröryggisáætlunar samgönguráðuneytisins er komin til framkvæmda.

Samningur Umferðarstofu og Grundaskóla á Akranesi, sem undirritaður var í gær, er liður í því að ná markmiði ráðuneytisins um fækkun alvarlegra slasaðra og látinna um að jafnaði 5% á ári.

Væntur ávinningur af umferðaröryggisfræðslu í grunnskólum er fækkun látinna um 0,2 að meðaltali á ári og fækkun alvarlegra slasaðra um 1,0 að meðaltali á ári.

Samningurinn felur í sér að Grundaskóli verður móðurskóli umferðarfræðslu á grunnskólastigi og öðrum skólum til ráðgjafar á því sviði. Við skólann mun starfa verkefnisstjóri og teymi kennara sem sinnir umferðarfræðslu sérstaklega. Í störfum þeirra felst meðal annars að skipuleggja og stjórna námskeiðum og fræðslufundum fyrir kennara grunnskóla á landinu öllu. Að auki munu samningsaðilar, í samstarfi við Námsgagnastofnun, fylgja eftir og kynna nýjan umferðarvef fyrir öðrum skólum.

Samkomulag þetta er til reynslu skólaárið 2005-2006 og mun Umferðarstofa standa straum af þeim kostnaði sem hlýst af þessu verkefni og vera skólanum til ráðgjafar. Í lok tímabilsins munu fulltrúar Grundaskóla, Umferðarstofu og samgönguráðuneytis leggja mat á ávinning samstarfsins og endurskoða það með hugsanlegt framhald í huga.

Eftirfarandi tafla sýnir hvernig umferðaröryggisaðgerðum hefur verið forgangsraðað með tilliti til ávinnings:

Umferðaröryggisaðgerðir	Fækkun látinna	Fækkun alvarlegra slasaðra	Fjármögnun 2005-2008
Hraðakstur og bílbeltanotkun	2,5	4,8	687
Leiðbeinandi hraðamerkingar	0,3	0,9	17
Eyðing svartbletta	0,5	2,3	312
Ölvun/fíkniefni við akstur	0,5	2,7	228
Umferðaröryggi í öryggisstjórnun fyrirtækja	0,1	0,6	15
Umferðaröryggi í námsskrá grunnskóla	0,2	1,0	62
Öryggisbeltanotkun í hópbifreiðum	0,0	0,3	16
Forvarnir erlendra ökumanna	0,2	1,2	47
Slysum og óhöppum v. lausagöngu búfjár fækkað með girðingum	0,1	0,7	156
Samtals	4,2	14,5	1.540 m.