Skipan starfshóps um skattlagningu ökutækja og eldsneytis

Fjármálaráðuneytið, fréttatilkynning nr. 8/2007

Fjármálaráðherra hefur ákveðið að skipa starfshóp sem gera á tillögur um heildarstefnu að því er varðar skattlagningu ökutækja og eldsneytis.

Ökutæki falla í ýmsum tilvikum í mismunandi gjaldaflokka eftir eðli ökutækis eða notkun. Þá hafa á undanförnum árum verið gerðar ýmsar tímabundnar ráðstafanir til þess að hvetja til notkunar vistvænna ökutækja og orkugjafa. Með heildarendurskoðun löggjafar á þessu sviði gefst tækifæri til þess að móta stefnu til frambúðar í þessum málaflokki.

Hlutverk starfshópsins verður að gera tillögur um samræmda skattlagningu ökutækja og eldsneytis sem hafi það að markmiði að hvetja til  notkunar vistvænna ökutækja, orkusparnaðar, minnkunar á losun gróðurhúsalofttegunda frá samgöngum, aukinnar notkunar innlendra orkugjafa og að fjármagna uppbyggingu og viðhald vegakerfisins, auk þess að þjóna áfram sem almenn tekjuöflun fyrir ríkissjóð.

Reykjavík 10. maí 2007