Framkvæmd fjárlaga

Úr Vefriti fjármálaráðuneytisins 27. september 2007 - þú getur gerst áskrifandi að vefritinu.

Fjármálaráðuneytinu ber að hafa eftirlit með framkvæmd fjárlaga og veita leiðbeiningar þar um, á grundvelli sérstakrar reglugerðar nr. 1061/2004.

Ráðuneyti og forstöðumenn stofnana bera ábyrgð á að rekstrarútgjöld séu í samræmi við fjárlög og að fjármunir séu nýttir á árangursríkan hátt. Þeim ber skylda til að bregðast við ef útgjöld verða meira en 4% umfram heimildir hverju sinni.

Fjármálaráðuneytið hefur á undanförnum árum unnið að ýmsum umbótum til að styrkja framkvæmd fjárlaga. Sá grunnur sem byggt er á hvílir á skýrri verkaskiptingu einstakra aðila í ferlinu og að ábyrgðarskil séu skýr. Jafnframt þessu er lögð áhersla á að styrkja fjárhagsáætlanagerð stofnana og innleiða setningu markmiða og starfsáætlana í rekstri stofnana m.a. með samningum um árangursstjórnun.

Innan ársins fylgir fjármálaráðuneytið framkvæmd fjárlaga eftir á þann hátt að í kjölfar samþykktar fjárlaga á það fund með ráðuneytunum þar sem reynt er að leggja mat á þá veikleika sem kunna að vera í rekstri einstakra stofnana á grundvelli heimilda Alþingis og þeirra rekstraráætlana sem liggja fyrir af hálfu stofnana. Ráðuneytunum er síðan ætlað að bregðast sérstaklega við gagnvart þessum stofnunum til að hafa áhrif á framvindu útgjalda.

Samhliða þessu hefur upplýsingagjöf um framvindu útgjalda innan ársins verið aukin. Þannig er ríkistjórn og fjárlaganefnd Alþingis ársfjórðungslega gerð grein fyrir stöðu einstakra fjárlagaliða í samanburði við heimildir. Á sömu tímabilum hefur fjármálaráðuneytið skriflega farið þess á leit við einstök ráðuneyti að þau geri grein fyrir því til hvaða aðgerða þau hyggjast grípa gagnvart þeim liðum sem eru umfram 4% viðmiðunarmörk reglugerðarinnar.

Útgjöld ríkissjóðs janúar-júní 2007

Flokkur - milljónir króna	Gjöld	Fjár- heimild	Frávik m.kr.	Frávik %
Rekstrargjöld	88.043	87.090	-953	-1,1
Rekstrartilfærslur	68.208	74.019	5.811	7,9
Vaxtagjöld	8.850	8.843	-7	-0,1
Viðhald og stofnkostnaður	9.747	14.740	4.994	33,9
Samtals	174.848	184.692	9.844	5,3

Í meðfylgjandi töflu má sjá yfirlit um útgjöld stofnana fyrir fyrstu sex mánuði þessa árs. Þar er fjárlagaliðum skipt upp í fjóra flokka eftir svokallaðri hagrænni skiptingu útgjalda, þ.e. rekstrarútgjöld, rekstrartilfærslur, vaxtagjöld og viðhalds- og stofnkostnaðarliði. Rekstrargjöld sýna kostnað að frádregnum sértekjum stofnana. Tilfærslur eru ýmsar greiðslur og bætur úr ríkissjóði til einstaklinga svo sem tryggingabætur, barnabætur og greiðslur til bænda.