Ný þjóðhagsspá fjármálaráðuneytisins

Úr Vefriti fjármálaráðuneytisins 4. október 2007 - þú getur gerst áskrifandi að vefritinu.

Fyrr í þessari viku kom út ný þjóðhagsspá fjármálaráðuneytisins.

Helstu niðurstöður eru:

• Umsvif í efnahagslífinu voru meiri árið 2006 en fyrri tölur gáfu til kynna, en hagvöxtur nam 4,2% í stað 2,6%.
• Samneysla sveitarfélaga og fjármunamyndun jukust meira en einkaneysla minna.
• Árið 2007 er áætlað að þjóðarútgjöld dragist saman um 5,2% vegna loka mikilla stóriðjuframkvæmda.
• Samt er reiknað með áframhaldandi vexti einkaneyslu og annarrar fjárfestingar en í stóriðju.
• Spáð er að hagvöxtur verði 0,7% á árinu í krafti stóraukins útflutnings áls og samdráttar innflutnings.
• Áframhaldandi viðsnúningur í utanríkisverslun leiðir til þess að hagvöxtur verður 1,2% árið 2008 þrátt fyrir samdrátt í útflutningi sjávarafurða, einkaneyslu og fjárfestingu.
• Árið 2009 er gert ráð fyrir áframhaldandi samdrætti í einkaneyslu en að fjármunamyndun taki að aukast á ný og vöruskiptahallinn haldi áfram að dragast saman og hagvöxtur verði 2,1%.
• Spáð er að viðskiptahallinn dragist hratt saman á næstu árum og verði 8,8% af landsframleiðslu árið 2008 og 7,6% árið 2009.
• Áætlað er að spenna á vinnumarkaði verði í hámarki í ár en slaki myndist á næstu árum með auknu atvinnuleysi.
• Spáð er að verðbólga minnki í 3,3% árið 2008 og að hún verði 2,8% að meðaltali á árinu 2009.
• Helstu óvissuþættir í þjóðhagsspánni varða frekari stóriðjuframkvæmdir, ástand á alþjóðlegum mörkuðum, gengi krónunnar og endurnýjun kjarasamninga á næsta ári. Í skýrslunni er jafnframt að finna útreikninga á fráviksdæmum. Annars vegar eru metin áhrif af 20% veikingu á gengi krónunnar og hinsvegar af byggingu nýs álvers og tengdra orkuvera.

Yfirlit þjóðhagsspár 2006-2009

Magnbreytingar frá fyrra ári, %

Flokkur	Brb. 2006	Spá 2007	Spá 2008	Spá 2009
Einkaneysla	4,4	2,1	-0,9	-1,8
Samneysla	3,9	2,8	2,0	2,5
Fjármunamyndun	19,8	-22,2	-19,8	4,6
Þjóðarútgjöld alls	9,2	-5,2	-4,8	0,4
Útflutningur vöru og þjónustu	-5,1	8,7	9,2	3,9
Innflutningur vöru og þjónustu	10,1	-9,8	-7,0	-0,5
Verg landsframleiðsla	4,2	0,7	1,2	2,1