Hátt eldsneytisverð?

Úr Vefriti fjármálaráðuneytisins 3. apríl 2008 - þú getur gerst áskrifandi að vefritinu.

Svo sem kunnugt er hefur heimsmarkaðsverð á olíu hækkað mjög að undanförnu.

Í ljósi umræðna um hátt eldsneytisverð hér á landi er áhugavert að skoða hvernig Ísland stendur í samanburði við nágrannalöndin þegar kemur að eldsneytisverði og hlut skattlagningar í því.

Notkun á olíu er víðast hvar skattlögð umfram aðrar vörur og er þeirri skattlagningu meðal annars ætlað að draga úr notkuninni. Á Norðurlöndunum er skattlagningin töluvert meiri en hér á landi eins og sjá má í töflunni hér fyrir neðan og gildir það bæði um bensín og díselolíu.

Nú skömmu fyrir síðustu mánaðarmót var bensínverðið lægst á Íslandi af þeim fjórum Norðurlöndum sem hér eru sýnd. Raunar var það einungis í Lúxemborg og á Írlandi sem bensín var ódýrara en hér á landi meðal V-Evrópuríkja meðan Hollendingar borga næstum því eins mikið og Norðmenn fyrir bensín. Díselolía var hins vegar ódýrari en hér á landi í nokkrum ríkjum V-Evrópu.

Hlutur íslenskra stjórnvalda er innan við helmingur af endanlegu söluverði bensíns meðan það er nær 60% af söluverðinu á hinum Norðurlöndunum. Hlutfall skattlagningar er nokkru lægra á díselolíu.

Söluverð á eldsneyti í lok mars 2008

95 okt. bensín	Ísland	Noregur	Danmörk	Svíþjóð
Söluverð	151,90	186,99	171,17	157,71
Vörugjald	42,23	62,43	62,29	37,89
CO2 gjald	.	11,98	3,56	30,05
VSK	29,89	37,40	34,23	31,54
Skattar alls	72,12	111,80	100,08	99,48
Verð án allra skatta	79,78	75,18	71,09	58,23
Hlutur stjórnvalda (%)	47,5	59,8	58,5	63,1
Dísilolía
Söluverð	161,90	188,34	170,04	166,70
Vörugjald	41,00	45,21	45,09	16,44
CO2 gjald	.	8,08	3,93	36,99
VSK	39,67	47,08	42,51	41,68
Skattar alls	80,67	100,38	91,53	95,10
Verð án allra skatta	81,23	87,95	78,51	71,60
Hlutur stjórnvalda (%)	49,8	53,3	53,8	57,0

Miklar verð- og gengissveiflur gera verðsamanburð milli landa erfiðan. Þessir útreikningar byggjast á verðupplýsingum frá FÍB um eldsneytisverð hér á landi og er miðað við fulla þjónustu.

Upplýsingar um verð á eldsneyti í Evrópu eru fengnar af vefsíðu vegagerðarinnar í Danmörku. Útreikningar á skattlagningu eldsneytis eru byggðir á upplýsingum frá fjármálaráðuneytum Norðurlandanna.