Grundaskóli áfram leiðtogaskóli í umferðarfræðslu

Fulltrúar Grundaskóla á Akranesi og Umferðarstofu skrifuðu í dag undir áframhaldandi samning um umferðarfræðslu í skólum. Grundaskóli hefur með starfi sínu verið öðrum grunnskólum á Íslandi til fyrirmyndar og ráðgjafar á þessu sviði allt frá árinu 2005.

Samninginn undirrituðu Hrönn Ríkharðsdóttir, fyrir hönd Grundaskóla, Ögmundur Jónasson innanríkisráðherra, sem staðfesti samninginn, og Gunnar Geir Gunnarsson, fyrir hönd Umferðarstofu.

Markmið fræðslunnar er að:

1. Koma umferðarfræðslu inn í skólanámskrár allra grunnskóla.
2. Halda námskeið í umferðarfræðslu fyrir grunnskólakennara í grunnskólum landsins þeim að kostnaðarlausu.
3. Vera öðrum grunnskólum í landinu til fyrirmyndar og ráðgjafar á sviði umferðarfræðslu.
4. Efla námsefnisgerð í umferðarfræðslu og stuðla að þróun náms- og fræðsluvefs um umferðarmál.

Grundaskóli hefur unnið að gerð fræðsluvefsins umferd.is samvinnu við Umferðarstofu og Námsgagnastofnun og var hann formlega opnaður í janúar 2006. Á vefnum er hægt að nálgast leiðbeiningar og fræðslu fyrir börn, foreldra og kennara sem annast umferðarfræðslu. Skólayfirvöld geta haft samband við Grundaskóla um allt er varðar umferðarfræðslu grunnskólabarna.