Undirritun skólasamnings við Fjölbrautaskóla Suðurlands

Katrín Jakobsdóttir mennta- og menningarmálaráðherra heimsótti Fjölbrautaskóla Suðurlands, ræddi við nemendur og starfsfólk, og skrifaði undir skólasamning um starf skólans ásamt Olgu Lísu Garðarsdóttur skólameistara.

Katrín Jakobsdóttir mennta- og menningarmálaráðherra heimsótti Fjölbrautaskóla Suðurlands, ræddi við nemendur og starfsfólk, og skrifaði undir skólasamning um starf skólans ásamt Olgu Lísu Garðarsdóttur skólameistara. Samkvæmt lögum skal gera samninga við framhaldsskóla til 3-5 ára. Í þeim skal koma fram helstu áherslur í starfsemi skóla og fara skal yfir framkvæmd þeirra árlega. Samningarnir eru grundvöllur samstarfs og samskipta, fjalla um gagnkvæmar skyldur og ábyrgð, endurspegla forgangsröðun og sameiginlegar áherslur um helstu verkefni skóla.

Í heimsókn sinni kynnti ráðherrann sér sérstaklega hestabraut skólans og heimsótti Votmúla þar sem kennsla í verklegum hestabrautargreinum fer fram. Einnig skoðaði ráðherra Odda, Iðu og Hamar og hitti starfsfólk og ræddi við það um margvísleg málefni tengd skólastarfi.