Ytra mat á grunnskólum

Efnt hefur verið til tveggja ára þróunarverkefnis um ytra mat á grunnskólum.

Árið 2011 tóku mennta- og menningarmálaráðuneyti og Samband íslenskra sveitarfélaga þá ákvörðun að standa sameiginlega að verkefni um ytra mat á grunnskólum með tilstyrk Jöfnunarsjóðs sveitarfélaga. Framkvæmd ytra mats á grunnskólum er samkvæmt lögum um grunnskóla nr. 91/2008 bæði á ábyrgð sveitarfélaga og mennta- og menningarmálaráðuneytis.

Miklir fjármunir eru veittir til grunnskóla og mikilvægt er að vel takist við ráðstöfun þeirra. Eftirlit sveitarfélaga með grunnskólum hefur verið takmarkað og lítið samræmi í aðferðum. Þá hefur mennta- og menningarmálaráðuneyti einungis látið meta um sex grunnskóla á ári. Markmið með samstarfi um ytra mat er að þróa samræmd viðmið og aðferðir þar sem áhersla er lögð á faglega þáttinn í skólastarfi. Einnig er stefnt að því að fjölga þeim skólum sem metnir eru ár hvert.

Samstarfsverkefnið

Sex grunnskólar voru metnir í tilraunaverkefni um ytra mat árið 2012. Um árangur þess verkefnis og tilhögun má lesa í heildarskýrslu um verkefnið.  Í ljósi góðrar reynslu af tilraunaverkefninu var tveggja ára þróunarverkefni um ytra mat ýtt úr vör í janúar 2013. Unnið verður áfram samkvæmt þeirri aðferðafræði sem þróuð var í tilraunaverkefninu. Stefnt er að því að meta átta skóla árið 2013 og 10 skóla árið 2014. Gert er ráð fyrir að árlegum úttektum muni áfram fjölga þegar þróunarverkefninu lýkur.

• Gefinn hefur verið út bæklingur um verkefnið:  Ytra mat á grunnskólum - Þróunarverkefni 2013–2014