Fundur sjávarútvegsráðherra landa við Norður Atlantshaf

Sjávarútvegs- og landbúnaðarráðherra Sigurður Ingi Jóhannsson sat fund sjávarútvegsráðherra landa við Norður Atlantshaf (NAFMC-North Atlantic Fisheries Ministers Conference) dagana 23. - 25. júní í Brønnøysund í Noregi. Viðstaddir voru ráðherrar og embættismenn frá ESB, Færeyjum, Grænlandi, Íslandi, Kanada, Noregi og Rússlandi.

Megin umræðuefni fundarins var aukin sjálfbær framleiðsla á fæðu úr hafinu í ljósi þess að áætlanir gera ráð fyrir að jarðarbúum hafi fjölgað í níu milljarða árið 2050 og því muni eftirspurn eftir heilnæmri fæðu stöðugt aukast. Í viðræðum ráðherranna var lögð mikil áhersla á þátt fiskeldis.

Hver ráðherra kynnti stöðu fiskeldis í sínu landi og hér má sjá ræðu Sigurðar Inga Jóhannssonar.

Möguleikar þess að auka framleiðslu með fiskeldi eru víðast hvar miklir í þessum löndum, en lögð var áhersla á að sú aukning yrði að vera sjálfbær og ekki á kostnað umhverfisins og þá ekki síst villtra stofna. Um þetta var mikill samhljómur meðal ráðherranna í yfirlýsingu fundarins.

Sjávarútvegs- og landbúnaðarráðherra Sigurður Ingi Jóhannsson átti tvíhliða fundi með sjávarútvegsráðherrum Rússlands, Grænlands, Noregs og Færeyja.

Á fundinum með rússneska ráðherranum Hr. Andrey Krayniy var lögð áhersla á að Rússar tækju fullan þátt í samningi þjóðanna um veiðar á úthafskarfa og lögðu fram vísindaleg gögn til að tryggja aukið traust milli aðila. Ráðherrarnir voru sammála um að samskipti þjóðanna væru að öðru leyti góð á sviði  fiskveiða.

Fundur var haldinn með grænlenska sjávarútvegsráðherranum, Hr. Karl Lyberth sem nýverið tók við embætti. Fagnað var þeim áfanga að tekist hefur að koma á sameiginlegri fiskveiðinefnd milli þjóðanna og var lögð áhersla á að auka enn frekar samstarf Íslands og Grænlands á sjávarútvegssviðinu. Rætt var sérstaklega um mögulegan samning milli þjóðanna um sameiginlega nýtingu rækjustofnsins á Dohrnbanka.

Sigurður Ingi Jóhannsson sjávarútvegs- og landbúnaðarráðherra átti einnig fund með með gestgjafanum frú Lisbeth Berg-Hansen sjávarútvegsráðherra Noregs. Farið var yfir samstarf og samvinnu þjóðanna á sviði sjávarútvegs og voru ráðherrarnir sammála um að það væri til fyrirmyndar að undanskilinni makríldeilunni sem varpaði skugga á samstarf þjóðanna. Ráðherrarnir lögðu báðir mikla áherslu á að ná sem fyrst samingum milli strandríkjanna um mikilvæga nytjastofna en í máli norska ráðherrans kom þó fram að viðræður gætu ekki hafist fyrr en að loknum þingkosningum í Noregi nú í haust.

Á tvíhliða fundi með sjávarútvegsráðherra Færeyja, Hr. Jacob Vestergaard fór Sigurður Ingi yfir þá stöðu sem komin er upp í samningnum um norsk-íslensku síldina en Færeyingar settu sér einhliða kvóta fyrir þetta ár sem er þrefalt hærri en árið þar á undan. Sigurður Ingi benti á að síldarstofninn stæði illa og hefði hnignað undanfarin fjögur ár þar sem nýliðun hefði verið léleg og ekki væri útlit fyrir breytingu í þeim efnum á næstu árum. Ísland liti það alvarlegum augum að Færeyingar hefðu með einhliða ákvörðun stóraukið veiðar sínar án þess að hafa fært nokkur vísindaleg rök fyrir kröfu sinni um hærri aflahlutdeild.