Fréttatilkynning frá ráðherra sjávarútvegs- og landbúnaðarmála – Ný reglugerð um bann við hvalveiðum á tilteknum svæðum

Í dag var gefin út reglugerð sem færir bannsvæði hvalveiða í Faxaflóa til fyrra horfs, til samræmis við þá ráðgjöf sem fyrir liggur.

Þessi breyting fellir úr gildi ákvörðun sem fyrrverandi ráðherra tók í maí sl.  Sigurður Ingi, sjávarútvegs- og landbúnaðaráðherra hefur farið yfir grundvöll framangreindrar ákvörðunar og er niðurstaðan sú að hún hafi ekki verið tekin á málefnalegum forsendum.

Nær 80% allra hrefna sem veiddar hafa verið í Faxaflóa undanfarin ár eru fengnar á svæði sem með ákvörðuninni frá því í maí s.l. var bannað að stunda hrefnuveiðar á. Með henni var verulega að hagsmunum veiðanna vegið. Sjá myndir að neðan er sýna hrefnuveiðar í Faxaflóa 2010-2012.

Í fréttatilkynningu sem fylgdi þessari ákvörðun í maí s.l. kemur fram að við ákvörðun um afmörkun griðasvæðisins í Faxaflóa hafði þáverandi ráðherra að leiðarljósi hagsmuni hvalaskoðunar- og hrefnuveiðimanna og að jafnframt væri stuðst við tillögur meirihluta nefndar sem hafði verið falið að fjalla um það hvernig mörk milli hvalaskoðunar og hvalveiða skyldu afmörkuð í Faxaflóa. Tiltekið var að ákvörðun ráðherrans um nýtt griðasvæði hvalveiða í Faxaflóa gengi skemmra en tillögur meirihluta nefndarinnar. Nýtt griðasvæði hvala í Faxaflóa skyldi nú afmarkast frá Garðskagavita og beina línu norður að Skógarnesi.

Ákvörðunin í maí s.l. var ekki í samræmi við tillögur Hafrannsóknastofnunar um afmörkun svæða til hvalaskoðunar frá mars 2009. Eins lá fyrir álit stofnunarinnar frá 2012 um að ekki hafi verið sýnt fram á að meint aukin fælni hrefnu í Faxaflóa stafi af hvalveiðum  á veiðisvæðinu.

Það er mat ráðherra að með þessari ákvörðun frá því í maí s.l. hafi hvorki verið horft til vísindalegra sjónarmiða né hagsmuna hrefnuveiða á svæðinu.

Sem fyrr er mikilvægt að stunda rannsóknir á hrefnu og að þær ákvarðanir sem teknar eru varðandi nýtingu þeirra, líkt og annarra sjávardýra, byggi á vísindalegum grunni.

Hrefnuveiði í Faxaflóa 2010. Bláa línan markar svæði skv. reglugerð 469/2013, en sú rauða markar svæði eins og það var fyrir setningu hennar og eins og það verður með nýrri reglugerð. Svörtu punktarnir sýna hvar hrefnan hefur veiðst.

 

Hrefnuveiði í Faxaflóa 2011. Bláa línan markar svæði skv. reglugerð 469/2013, en sú rauða markar svæði eins og það var fyrir setningu hennar og eins og það verður með nýrri reglugerð. Svörtu punktarnir sýna hvar hrefnan hefur veiðst.

 

Hrefnuveiði í Faxaflóa 2012. Bláa línan markar svæði skv. reglugerð 469/2013, en sú rauða markar svæði eins og það var fyrir setningu hennar og eins og það verður með nýrri reglugerð. Svörtu punktarnir sýna hvar hrefnan hefur veiðst.

Sjá nánar hér