Aðgangsviðmið háskóla

Aðgangsviðmið eru leiðarljós við skipulagningu náms og nýtast t.d. nemendum við undirbúning undir háskólanám í einstökum háskóladeildum

Aðgangsviðmið háskóla eru leiðarljós um hæfni nemenda sem hefja nám á grunnstigi (fyrsta háskólaþrepi) í einstökum háskóladeildum. Í samningum ráðuneytisins við íslenska háskóla er kveðið á um að þeir muni í síðasta lagi skólaárið 2014/2015 birta aðgangsviðmið allra námsleiða sinna.

Aðgangsviðmiðin skulu:

vísa í þrepaskipt hæfniviðmið skv. aðalnámskrá framhaldsskóla,
tiltaka þá hæfni sem gagnleg er fyrir nemanda þegar hann hefur nám á háskólastigi,
styðja við kröfur sem gerðar eru á inntökuprófum þar sem þau eru notuð,
vera skýr og auðskiljanleg fyrir framhaldsskólanemendur,
vera aðgengileg á heimasíðum háskóla.

Aðgangsviðmiðum er ætlað að vera leiðarljós við skipulagningu náms og eiga að:

nýtast sem skýr skilaboð til nemenda um hvernig þeir undirbúi sig best undir háskólanám,
nýtast framhaldsskólum við skipulag stúdentsprófs,
vera leiðbeinandi við styttingu náms til stúdentsprófs,
draga úr skilum milli skólastiga.

Með þessu móti stuðla aðgangsviðmið að markvissu námsvali til undirbúnings fyrir tiltekið háskólanám. Háskólarnir gera skýran greinarmun á aðgangskröfum/inntökuskilyrðum í einstaka námsbrautir og aðgangsviðmiðunum, sem eru einkum leiðbeinandi viðmið. Einnig er áhersla lögð á að aðgangsviðmið séu í takt við kröfur sem fram koma í inntökuprófum eða vinnumöppum, þar sem það á við. Viðmiðin eru undirrituð af fulltrúum deilda og rektor viðkomandi skóla.