Guterres hrósar Afríkuríkjum fyrir að hafa landamæri opin fyrir flóttafólk

António Guterres aðalframkvæmdastjóri Sameinuðu þjóðanna hrósar Afríkuríkjum fyrir að opna landamæri sín fyrir flóttafólki og öðrum sem flýja ofbeldi á sama tíma og skellt er í lás og byggðir múrar í öðrum heimshlutum, þar á meðal í þróuðum ríkjum Vesturlanda.

Guterres lét þessi orð falla á mánudag í Addis Ababa þar sem tugir þjóðarleiðtoga Afríkuríkja eru saman komnir á leiðtogafundi Afríkusambandsins, að því er fram kemur í  frétt  frá AP.

"Afríkuþjóðir eru meðal þeirra þjóða í heiminum sem taka við flestum flóttamönnum og sýna mestu gestrisni," sagði Guteeres en hann sækir leiðtogafundinn í Eþíópíu í fyrsta sinn sem yfirmaður Sameinuðu þjóðanna. "Landamæri Afríkuþjóða standa opin fyrir þá sem þurfa á vernd að halda á sama tíma og mörgum landamærum hefur verið lokað, jafnvel meðal þróuðustu þjóða í heiminum."  

Fram kemur í fréttinni að Guterres hafi ekki með beinum hætti vísað í tilskipun Bandaríkjaforseta um byggingu múrs á landamærunum við Mexíkó né ferðabannsins gegn fólki frá sjö múslimaríkjum, þeirra á meðal þremur í Afríku. Ummælunum var hins vegar afar vel tekið af þeim 2,500 þátttakendum sem sóttu leiðtogafundinum.

Rúmlega fjórðungur allra flóttamanna í Afríku

Á blaðamannafundi kvaðst Guterres vonast til þess að ferðabannið til Bandaríkjanna yrði aðeins tímabundið. "Það er alveg ljóst í mínum huga að vernd flóttamanna er eitthvað sem er algerlega ómissandi... og  það er löng hefð í Bandaríkjunum fyrir flóttamannavernd."  

Fjölmennustu flóttamannabúðir í heiminum eru  í Dadaab í Kenía með álíka marga íbúa og á öllu Íslandi, rúmlega 300 þúsund manns, flestir frá nágrannaríkinu Sómalíu. Í sunnanverðri Afríku eru rúmlega 18 milljónir flóttamanna eða um 26% allra flóttamanna í heiminum, samkvæmt tölum Flóttamannastofnunar Sameinuðu þjóðanna. Flestir þeirra hafa flúið átök í Sómalíu, Miðafríkulýðveldinu, Nígeríu, Suður-Súdan og Búrúndí.   Á leiðtogafundinum í Addis var Moussa Faki Mahamat utanríkisráðherra Tjad kjörinn yfirmaður framkvæmdastjórnar Afríkusambandsins. Hann tekur við af Nkosazana Dlami-Zuma frá Suður-Afríku.

Forseti Gíneu, Alpha Conde, hefur tekið við sem forseti Afríkusambandsins af Idris Deby, forseta Tjad. Beiðni Marokkó um aðild að sambandinu var samþykkt á fundinum í Addis.

Africa most affected by refugee crisis/ AfricaRenewal

Chad's Moussa Faki Mahamat elected AU Commission chair/ GGA
African Union Expresses Concern About US Immigration Ban/ VOA