Fundi varnarmálaráðherra NATO lokið

Fundi varnarmálaráðherra Atlantshafsbandalagsins lauk í Brussel í dag. 

Meginefni fundarins var umræða um framlög ríkjanna til varnarmála, og eftirfylgni ákvarðana sem teknar voru á leiðtogafundi bandalagsins í Brussel 11.-12. júlí sl. um  breytingar á herstjórnarkerfi bandalagsins, fælingu og varnir og málefni Rússlands.

Fundað var í vinnuhópi um kjarnavopn (Nuclear Planning Group), NATO-Georgíunefndinni og með utanríkismálastjóra ESB, auk varnarmálaráðherra Finnlands og Svíþjóðar, um samstarf NATO og ESB og uppbyggingarverkefni við suðurjaðar bandalagsins.

Loks kynntu fulltrúar hollenskra yfirvalda niðurstöður rannsóknar á rússneskri netárás á Efnavopnastofnunina (OPCW) í Haag.  Fastafulltrúi Íslands gagnvart Atlantshafsbandalaginu, Anna Jóhannsdóttir, sat fundinn fyrir Íslands hönd.