Rafræn viðskipti rædd í Xiamen

William Freyr Huntingdon-Williams, staðgengill sendiherra Íslands í Peking, ferðaðist til Xiamen-borgar í Fujian-héraði í suðvestur Kína á dögunum á árlega viðskipta- og fjárfestingarráðstefnu CIFIT sem haldin var af CIECC (China International Electronic Commerce Center).

Xiamen er hafnarborg með mikla áherslu á sjóflutninga. Á ráðstefnunni tók William m.a. þátt í hringborðsumræðum um rafræn viðskipti og netverslun (e. E-commerce) og ræddi um viðskiptasamband Íslands og Kína hvað þessi mál varðar. Þá voru jafnframt rædd ýmis viðskiptatækifæri sem felast í þessum viðskiptum og hvernig hægt væri að bregðast áskorunum af völdum COVID-19 heimsfaraldursins.

Aðrir þátttakendur í hringborðsumræðunum voru fulltrúar nokkurra Evrópuríkja, Mið-Asíuríkja, fulltrúar Fujian-héraðs og Xiamen-borgar sem og fulltrúar kínverskra fyrirtækja á svæðinu á sviði netverslunar.