Málþing um samkeppnishæfni og umhverfi

Gunnar Snorri Gunnarsson, sendiherra Íslands í Peking, og Pétur Yang, viðskiptafulltrúi sendiráðsins, sóttu málþing um samkeppnishæfni og umhverfimál í borgarhéraðinu Hulunbuir í norðurhluta Innri-Mongólíu.

Gunnar Snorri flutti ávarp og minnti í því á mikilvægi þess að hlúa að náttúrunni og sjálfbærni, enda væru slíkar aðgerðir undirstaða þess að áframhaldandi nýting náttúruauðlinda geti átt sér stað. Í ávarpinu minnti sendiherrann einnig á þá reynslu og þekkingu sem Íslendingar hafa aflað sér við nýtingu náttúruauðlinda og mikilvægi slíkrar nýtingar fyrir efnahag og velferð þjóðarinnar.

Að málþinginu loknu átti sendiherrann fund með viðskiptaráði héraðsins en íslenskir aðilar hafa átt í viðskiptum í Hulunbuir um nokkurt skeið. Íslenska fyrirtækið Marel hefur t.am. útbúið kjötvinnsluaðstöðu þar á nokkrum stöðum, auk þess sem íslensk fyrirtæki hafa komið að rannsóknum á nýtingu jarðhita í héraðinu.

Þá nýtti sendiherrann einnig tækifærið og heimsótti bændur og fyrirtæki á sviði landbúnaðar frá Hulunbuir .