Sendiherra Íslands gagnvart Kúbu afhendir trúnaðarbréf

Jörundur Valtýsson afhenti í dag trúnaðarbréf sitt sem sendiherra Íslands gagnvart Kúbu með aðsetur í New York. Athöfnin fór fram í fastanefnd Kúbu gagnvart Sameinuðu þjóðunum og var í formi rafræns fundar með forseta Kúbu, Miguel Díaz-Canel Bermúdez.

Á fundinum voru rædd tvíhliða samskipti Íslands og Kúbu, m.a. á sviðum flugmála og ferðaþjónustu á tímum heimsfaraldurs og samstarf í sjávarútvegi og sjálfbærri auðlindanýtingu. Einnig voru málefni á vettvangi Sameinuðu þjóðanna reifuð, þ.m.t. auðlinda- og loftslagsmál og mannréttindi.