Nr. 611/2024 Úrskurður

Hinn 13. júní 2024 er kveðinn upp svohljóðandi

úrskurður nr. 611/2024

í stjórnsýslumáli nr. KNU24050001

 

Endurtekin umsókn og beiðni um frestun réttaráhrifa í máli [...]

I.       Málsatvik

Með úrskurði kærunefndar útlendingamála nr. 399/2024, dags. 18. apríl 2024, staðfesti kærunefnd [TRSK1]útlendingamála ákvörðun Útlendingastofnunar, dags. 31. október 2023, um að taka umsókn einstaklings er kveðst heita [...], vera fæddur [...] og vera ríkisborgari Palestínu (hér eftir kærandi), um alþjóðlega vernd á Íslandi ekki til efnismeðferðar og vísa honum frá landinu. Niðurstaða kærunefndar var birt kæranda 19. apríl 2024.

Hinn 29. apríl 2024 barst kærunefnd endurtekin umsókn kæranda. Kærandi lagði ekki fram greinargerð í málinu, en með tölvubréfi sama dag lagði kærandi fram tvö læknisvottorð um þá ófætt barn sitt. Upplýsingar um málsmeðferð í máli kæranda bárust kærunefnd frá stoðdeild ríkislögreglustjóra 2. maí 2024, Vinnumálastofnun 3. maí 2024 og Útlendingastofnun 6. og 28. maí 2024. Viðbótargögn bárust 16. maí 2024 frá kæranda og 28. maí 2024 frá Útlendingastofnun.

Endurtekin umsókn kæranda byggir á 35. gr. a laga um útlendinga nr. 80/2016. Þá krefst kærandi þess að réttaráhrifum úrskurðar kærunefndar útlendingamála verði frestað.

II.        Málsástæður og rök kæranda

Í tölvubréfi umboðsmanns kæranda dags. 29. apríl 2024 kemur fram að samkvæmt úrskurði kærunefndar, sem hafi verið birtur honum 19. apríl 2024, hafi kæranda verið gert að yfirgefa landið og snúa aftur til Grikklands þar sem hann sé með alþjóðlega vernd, en eiginkona hans sé með alþjóðlega vernd og dvalarleyfi hér á landi. Kærandi vísar til þess að yfirgefi hann Ísland og fari aftur til Grikklands þurfi hann að skilja eiginkonu sína og ungabarn eftir hér á landi. Barn kæranda og eiginkonu hans fæddist [...]. Við meðferð málsins lagði kærandi fram tvö læknisvottorð frá Heilsugæslunni Miðbæ, dags. 24. apríl 2024, bréf heimaþjónustuljósmóður, dags. [...] og fæðingarvottorð barns síns, dags. [...], sem staðfesti að kærandi sé faðir þess.

III.      Niðurstaða kærunefndar útlendingamála

1. Endurtekin umsókn samkvæmt 1. mgr. 35. gr. a laga um útlendinga

Samkvæmt 1. mgr. 35. gr. a laga um útlendinga skal endurtekinni umsókn vísað frá. Þó skal taka endurtekna umsókn til meðferðar að nýju ef umsækjandi er staddur hér á landi og nýjar upplýsingar liggja fyrir í máli hans sem leiða til þess að sýnilega auknar líkur séu á því að fallist verði á fyrri umsókn hans skv. 24. gr. laganna.

Samkvæmt upplýsingum um málsmeðferð í máli kæranda sem bárust kærunefnd frá stoðdeild ríkislögreglustjóra 2. maí 2024, Vinnumálastofnun 3. maí 2024 og Útlendingastofnun 6. og 28. maí 2024 er kærandi að öllum líkindum staddur á landinu og því fyrra skilyrði 35. gr. a laga um útlendinga uppfyllt.

Kærandi byggir endurtekna umsókn sína á því að mál hans skuli tekið til efnismeðferðar þar sem ný gögn og upplýsingar liggi fyrir í málinu. Kærandi lagði fram endurtekna umsókn 29. apríl, en barn kæranda fæddist [...]. Meðfylgjandi endurupptökubeiðni kæranda eru tvö læknisvottorð frá Heilsugæslunni Miðbæ, dags. 24. apríl 2024, þar sem m.a. kemur fram að í ómskoðunum á meðgöngu hafi barn kæranda verið greint með fæðingargalla og verið talið að það myndi þurfa aukna læknisfræðilega aðstoð eftir fæðingu þess. Auk þess mæli læknisvottorðin fyrir um að ekki eigi að vísa kæranda úr landi þar sem brottvísun hans kunni að hafa skaðleg áhrif á andlega og líkamlega líðan móður og barns þar sem aðstæður fjölskyldunnar séu erfiðar. Í bréfi, undirrituðu af heimaþjónustuljósmóður, dags. [...], kemur m.a. fram að barn kæranda þurfi á læknisaðstoð að halda vegna meðfædds galla og ljóst sé að eiginkona kæranda geti ekki séð ein um barnið. Ljósmóðir mótmæli fyrirhugaðri brottvísun kæranda og telji barnið þurfa á föður sínum að halda og að kærandi eigi rétt á að vera hjá fjölskyldu sinni. Meðal gagna sem kærunefnd bárust frá Útlendingastofnun er göngudeildarnóta sérfræðings í bæklunarskurðlækningum, dags. [...], sem kærandi lagði fram hjá stofnuninni. Þar kemur fram að barnið hafi verið greint með klumbufætur í móðurkvið sem hafi valdið kæranda og eiginkonu hans áhyggjum og streitu á meðan á meðgöngunni stóð. Umrædd greining hafi valdið álagi og mikilvægt fyrir kæranda að vera áfram hér á landi og styðja við eiginkonu sína. Í göngudeildarnótunni kemur fram að barnið hafi fæðst heilbrigt og án fæðingargalla

Með tölvubréfi kærunefndar, dags. 3. júní 2024, var kærandi upplýstur um misræmi í þeim heilsufarsgögnum sem kærandi lagði fram með endurtekinni umsókn hjá nefndinni varðandi fæðingargalla barnsins og framangreindri göngudeildarnótu sérfræðings í bæklunarskurðlækningum sem nefndinni barst frá Útlendingastofnun eftir fæðingu þess. Kæranda var gefinn frestur til að koma að andmælum í samræmi við 13. gr. stjórnsýslulaga til og með 4. júní 2023. Engin andmæli bárust frá kæranda.

Framangreind heilsufarsgögn sýna að barn kæranda er fætt heilbrigt og þarf ekki á læknisaðstoð að halda vegna fæðingargalla eins og fram kom í endurtekinni umsókn kæranda til kærunefndar. Verða umrædd heilsufarsgögn ekki talin vera nýjar upplýsingar sem gefa tilefni til þess að fallast á endurtekna umsókn kæranda. Framlögð gögn varðandi barn kæranda breyta þannig ekki fyrra mati kærunefndar um að synja kæranda um alþjóðlega vernd. Í úrskurði kærunefndar í máli kæranda frá 18. apríl 2024 hefur þegar verið tekin afstaða til þess að kærandi ætti von á barni.

Þar sem kærandi er handhafi alþjóðlegrar verndar í Grikklandi bendir ekkert til annars en að kærandi geti nýtt rétt sinn til komu og tímabundinnar dvalar hér á landi á grundvelli 20. gr. laga um útlendinga í því skyni að dvelja tímabundið hér á landi og halda tengslum við barn sitt. Þá eru engar formlegar hindranir á því að kærandi og barn hans geti sameinast annars staðar en hér á landi, s.s. í viðtökuríki. Þá ítrekar kærunefnd það sem kemur fram í úrskurði nefndarinnar frá 18. apríl 2024 um framlagningu dvalarleyfisumsóknar á grundvelli 70. gr. laga um útlendinga, að uppfylltum skilyrðum ákvæðisins. Kærunefnd vísar jafnframt til 3. mgr. 51. gr. laganna varðandi frávik frá reglunni um að vera staddur utan landsteinanna við framlagningu umsóknarinnar ef ríkar sanngirnisástæður mæla með því. Þar sem barn kæranda sé nú fætt getur kærandi enn fremur óskað eftir fjölskyldusameiningu á grundvelli 3. mgr. 45. gr. laga um útlendinga. Af framangreindu er ljóst að í lögum um útlendinga er mælt fyrir um úrræði fyrir einstaklinga sem eru í sambærilegri stöðu og kærandi til að öðlast rétt til dvalar og vera í samvistum með fjölskyldu sinni hér á landi. Kærunefnd tekur þó fram að með þessum leiðbeiningum tekur nefndin enga afstöðu til þess hvort kærandi uppfylli skilyrði slíkra leyfa.

Það er mat kærunefndar að framangreindar upplýsingar í máli kæranda leiði ekki til þess að sýnilega auknar líkur séu á að fallist verði á fyrri umsókn kæranda samkvæmt 1. mgr. 35. gr. a laga um útlendinga og telur kærunefnd því skilyrði ákvæðis 35. gr. a laga um útlendinga ekki vera uppfyllt.

Að framangreindu virtu er endurtekinni umsókn kæranda vísað frá.

1. Krafa um frestun réttaráhrifa samkvæmt 3. mgr. 35. gr. a laga um útlendinga 

Samkvæmt 3. mgr. 35. gr. a laga um útlendinga skal endurtekinni umsókn beint að því stjórnvaldi sem tók þá ákvörðun sem leitað er endurskoðunar á og frestar hún ekki réttaráhrifum þeirrar ákvörðunar. Því stjórnvaldi sem hefur endurtekna umsókn til skoðunar er þó heimilt að fresta réttaráhrifum fyrri ákvörðunar, enda hafi umsækjandi óskað eftir því þegar hin endurtekna umsókn var lögð fram og sýnt fram á brýna nauðsyn þess að fresta framkvæmd.

Þar sem endurtekinni umsókn kæranda er vísað frá telur nefndin ekki ástæðu til að fresta réttaráhrifum á meðan umsókn er til meðferðar. Að framangreindu virtu er kröfu kæranda um frestun réttaráhrifa á ákvörðun Útlendingastofnunar hafnað.

 

Úrskurðarorð:

 

Endurtekinni umsókn kæranda er vísað frá.

Kröfu kæranda um frestun réttaráhrifa er hafnað.

 

The appellant’s subsequent application is dismissed.

The appellant’s request to suspend the implementation of the decision is denied.

 

F.h. kærunefndar útlendingamála,

 

Valgerður María Sigurðardóttir, varaformaður.