Nr. 810/2024 Úrskurður

KÆRUNEFND ÚTLENDINGAMÁLA

 

Hinn 28. ágúst 2024 er kveðinn upp svohljóðandi

úrskurður nr. 810/2024

í stjórnsýslumáli nr. KNU24070195

 

Beiðni [...] um endurupptöku

 

I.          Málsatvik og málsmeðferð

Með úrskurði kærunefndar útlendingamála nr. 626/2024, dags. 19. júní 2024, var staðfest ákvörðun Útlendingastofnunar, dags. 2. janúar 2024, um að synja umsókn [...], fd. [...], ríkisborgara Sýrlands (hér eftir kærandi), um dvalarleyfi á grundvelli sérstakra tengsla við landið, sbr. 78. gr. laga um útlendinga nr. 80/2016. Niðurstaða kærunefndar var birt fyrir kæranda 20. júní 2024.

Kærandi óskaði eftir endurupptöku málsins með tölvubréfi til Útlendingastofnunar, dags. 2. júlí 2024. Hinn 11. júlí 2024 framsendi Útlendingastofnun beiðnina ásamt fylgigögnum til kærunefndar, sbr. 2. mgr. 7. gr. stjórnsýslulaga nr. 37/1993.

Beiðni kæranda um endurupptöku byggir á 1. mgr. 24. gr. stjórnsýslulaga nr. 37/1993.

II.            Málsástæður og rök kæranda

Ráða má af beiðni kæranda um endurupptöku samkvæmt 1. mgr. 24. gr. stjórnsýslulaga að hún telji að ákvörðun í máli hennar hafi verið byggð á ófullnægjandi eða röngum upplýsingum um málsatvik, auk þess sem að atvik hafi breyst verulega frá því úrskurður kærunefndar var kveðinn upp. 

Í endurupptökubeiðni vísar kærandi til alþjóðlegrar verndar föður síns á Íslandi og kveðst kærandi búa ein í Sýrlandi við hættulegar aðstæður eftir að móðir hennar og systkini fluttu til Íslands. Í ákvörðun Útlendingastofnunar, dags. 2. janúar 2024, hafi verið vísað til tryggrar framfærslu en með endurupptökubeiðni sinni leggi kærandi fram ráðningarsamning og umsókn um atvinnuleyfi, hvort tveggja dags. 15. janúar 2024.

III.        Niðurstaða kærunefndar útlendingamála

Samkvæmt 1. mgr. 24. gr. stjórnsýslulaga á aðili máls rétt á því að mál hans verði tekið upp á ný ef ákvörðun hefur byggst á ófullnægjandi eða röngum upplýsingum um málsatvik eða íþyngjandi ákvörðun um boð eða bann hefur byggst á atvikum sem breyst hafa verulega frá því að ákvörðun var tekin.

Með úrskurði nr. 626/2024, dags. 19. júní 2024, staðfesti kærunefnd útlendingamála ákvörðun Útlendingastofnunar um að synja umsókn kæranda um dvalarleyfi á grundvelli sérstakra tengsla við landið, sbr. 78. gr. laga um útlendinga. Kærunefnd komst að þeirri niðurstöðu að aðstæður kæranda væru ekki þess eðlis að henni yrði veitt dvalarleyfi á grundvelli sérstakra tengsla við landið, sbr. 1 og 4. mgr. 78. gr. laga um útlendinga. Var þá einkum horft til þess að kærandi væri fullorðinn einstaklingur sem hefði verið búsett í heimaríki alla sína ævi. Hún væri heilsuhraust, vinnufær og hafi stundað háskólanám í heimaríki. Þar að auki leit nefndin m.a. til þess að ekkert benti til þess að umönnunarsjónarmið önnur en framfærsla mælti með veitingu dvalarleyfis. Við meðferð málsins á kærustigi hafði kærandi lagt fram ráðningarsamning við fyrirtækið [...] en kærunefnd taldi ekki unnt að leggja hann til grundvallar í málinu þar sem efnisatriði samningsins skorti að töluverðu leyti, svo sem varðandi ráðningartíma og laun. Með beiðni sinni um endurupptöku lagði kærandi fram ráðningarsamning við sama fyrirtæki þar sem bætt hefur verið úr framangreindum annmörkum.

Kærunefnd telur að leggja megi þann skilning í beiðni kæranda að hún byggi endurupptökubeiðni sína á því að ákvörðun í máli hennar hafi byggt á ófullnægjandi og röngum upplýsingum um málsatvik og hins vegar að atvik hafi breyst verulega frá því að ákvörðun var tekin í máli hans, sbr. 1. og 2. tölul. 1. mgr. 24. gr. laga um útlendinga.

Kærunefnd hefur farið yfir beiðni kæranda um endurupptöku ásamt þeim fylgiskjölum sem liggja fyrir. Endurupptakan byggist einkum á framfærslusjónarmiðum sem kærandi telur bætt úr með tilliti til fyrirliggjandi ráðningarsamnings.

Í úrskurði kærunefndar í máli kæranda, dags. 19. júní 2024, komst nefndin að þeirri niðurstöðu að skilyrði fyrir veitingu dvalarleyfis á grundvelli sérstakra tengsla við landið væru ekki uppfyllt, sbr. 1. og 4. mgr. 78. gr. laga um útlendinga. Fyrri ráðningarsamningur kæranda var meðal fylgigagna sem kærunefnd fjallaði um við úrlausn málsins. Þrátt fyrir það grundvallast fyrri niðurstaða nefndarinnar einkum og sér í lagi á takmörkuðum tengslum kæranda við landið, sbr. 78. gr. laga um útlendinga. Í ljósi framangreinds telur nefndin að ráðningarsamningur kæranda, dags. 15. janúar 2024, hafi ekki slík áhrif að niðurstaða nefndarinnar yrði önnur, hefði hann legið fyrir við úrlausn málsins. Þá liggja ekki fyrir gögn sem benda til breytinga á aðstæðum kæranda gagnvart skilyrðum 78. gr. laga um útlendinga.

Að teknu tilliti til þeirra gagna sem kærandi hefur lagt fram við meðferð endurupptökumálsins hjá kærunefnd og þess sem að framan er rakið er það mat kærunefndar að ekkert bendi til þess að atvik málsins hafi breyst svo verulega að tilefni sé til að endurupptaka fyrri úrskurð nefndarinnar. Í ljósi framangreinds er það jafnframt niðurstaða kærunefndar að ekki sé hægt að fallast á að úrskurður kærunefndar útlendingamála hafi byggst á ófullnægjandi eða röngum upplýsingum um málsatvik, sbr. 1. og 2. tölul. 1. mgr. 24. gr. stjórnsýslulaga.

Að öllu framangreindu virtu er kröfu kæranda um endurupptöku málsins því hafnað.

 

 

 

Úrskurðarorð:

Kröfu kæranda um endurupptöku er hafnað.

The request of the appellant to re-examine the case is denied.

 

 

Valgerður María Sigurðardóttir

 

 

 

Sandra Hlíf Ocares                                                                          Gunnar Páll Baldvinsson