Mál nr. 356/2025-Úrskurður

Úrskurðarnefnd velferðarmála

 

Mál nr. 356/2025
Mánudaginn 18. ágúst 2025

A

gegn

umboðsmanni skuldara

 

ÚRSKURÐUR

Mál þetta úrskurða Kári Gunndórsson lögfræðingur, Björn Jóhannesson lögfræðingur og Eva Dís Pálmadóttir lögfræðingur.

Þann 6. júní 2025 barst úrskurðarnefnd velferðarmála kæra A. Kærð var ákvörðun umboðsmanns skuldara, sem tilkynnt var með bréfi, dags. 30. maí 2025, þar sem umsókn kæranda um greiðsluaðlögun var synjað.

I. Málsatvik og málsmeðferð

Kærandi, sem er fæddur X, lagði fram umsókn um greiðsluaðlögun 20. mars 2025. Með bréfi, dags. 2. maí 2025, var kæranda tilkynnt að við vinnslu á umsókn hans hefðu komið í ljós atriði sem leitt gætu til synjunar umsóknar um greiðsluaðlögun. Með bréfinu var kæranda veitt færi á að leggja fram skýringar og gögn áður en ákvörðun um afgreiðslu umsóknar yrði tekin. Skýringar bárust frá kæranda með tölvupóstum 5., 11. og 27. maí 2025. Með ákvörðun umboðsmanns skuldara, dags. 30. maí 2025, var umsókn kæranda synjað á grundvelli k-liðar 1. mgr. 6. gr. laga um greiðsluaðlögun einstaklinga nr. 101/2010 (lge.).

Kæra barst úrskurðarnefnd velferðarmála 6. júní 2025. Með bréfi, dags. 11. júní 2025, óskaði úrskurðarnefndin eftir greinargerð umboðsmanns skuldara. Greinargerð umboðsmanns barst með bréfi, dags. 23. júní 2025 og var hún send kæranda til kynningar með bréfi, dags. 25. júní 2025. Frekari athugasemdir bárust ekki.

 

II. Sjónarmið kæranda

Kærandi gerir ekki sérstakar kröfur í málinu en skilja verður kæru hans svo að þess sé krafist að ákvörðun umboðsmanns skuldara um að synja honum um heimild til að leita greiðsluaðlögunar verði felld úr gildi.

Í kæru kemur fram að kærandi sé ósáttur við synjun umboðsmanns skuldara. Kærandi kveður sumt [í hinni kærðu ákvörðun] eigi ekki við rök að styðjast. Þá sé hann búinn að vera að bíða í rúmlega ár eftir að mál hans yrði tekið fyrir og sé búinn að sýna allan þann stuðning sem honum sé frekast unnt.

Til dæmis sé ekki tekið tillit til þess að bifreið hans hafi verið skemmd og þurfti kærandi að standa straum af því, og fari allflestir peningar hans í það hvort sem hann sé á G eða ekki. Kærandi kveðst bara hafa verið að leita sé sér að lífi þar sem hann gæti mögulega lifað af og safnað sér fyrir til dæmis tönnum en það sé ekkert tekið tillit til þess.

Einnig hafi kæranda verið ráðlagt að aðhafast ekkert þótt hann ætti einhverja aura afgangs sem hafi verið örsjaldan.

Einnig sé ekki tekið tillit til þess að á öllum þessum tíma hafi kærandi verið meiri partinn á Íslandi þótt svo að hann hafi farið til G yfir veturinn.

Kærandi telur að synjun umboðsmanns hafi ekki verið nógu vel unnin þar sem það sé ekkert tillit tekið til útgjalda sem séu mun meiri en gera megi ráð fyrir.

Einnig sé vegið að kæranda með það að hann beri við veikindum, en það sé bara svo að hann sé öryrki og hafi ekki haft neitt auka.

Þó svo að það standi í öllum þessum útreikningum að kærandi hafi haft einhverja þúsundkalla "afgangs" þá hafi það ekki verið svo. Kærandi hafi verið með fjölskyldu á þessum tíma og kona hans hafi ekkert geta unnið vegna veikinda.

Kærandi óskar þess að þetta verði endurskoðað og kveðst telja að það sé margt í synjun umboðsmanns sem ekki standist í dag.

 

III. Sjónarmið umboðsmanns skuldara

Í hinni kærðu ákvörðun umboðmanns skuldara segir:

„I. Forsendur:

Þann 20. mars 2025 barst umboðsmanni skuldara umsókn umsækjanda um greiðsluaðlögun einstaklinga, sbr. lög um greiðsluaðlögun einstaklinga, nr. 101/2010 (lge.).

Sá einstaklingur getur leitað greiðsluaðlögunar sem sýnir fram á að hann sé eða verði um fyrirsjáanlega framtíð ófær um að standa í skilum með fjárskuldbindingar sínar. Er þá miðað við að hann geti ekki eða eigi í verulegum erfiðleikum með að standa við fjárskuldbindingar sínar um fyrirséða framtíð með tilliti til eðlis skuldanna, eigna og fjárhagslegra og félagslegra aðstæðna hans að öðru leyti.

Við mat á því hvort veita skuli heimild til greiðsluaðlögunar ber umboðsmanni skuldara einkum að kanna hvort fyrir liggi þær aðstæður sem geta komið í veg fyrir að greiðsluaðlögun verði heimiluð, sbr. 6. gr. laganna.

Við mat á umsókn umsækjanda komu b- og k-liðir 6. gr. lge. til skoðunar og var umsækjanda sent fyrirspurnarbréf þann 2. maí sl. Í b-lið 6. gr. lge. er kveðið á um að synja skuli um heimild til greiðsluaðlögunar, nema sérstakar aðstæður séu íyrir hendi, ef fyrirliggjandi gögn gefa ekki nægilega glögga mynd af því hvernig fjárhagur skuldara hefur verið, hver fjárhagur skuldara er við vinnslu umsóknar eða hver sé væntanleg þróun fjárhag hans á tímabili greiðsluaðlögunar. Í k-lið 6. gr. lge. er kveðið á um að synja skuli um heimild til greiðsluaðlögunar, nema sérstakar aðstæður séu fyrir hendi, ef skuldari hefur á ámælisverðan hátt látið undir höfuð leggjast að standa við skuldbindingar sínar eftir því sem honum var framast unnt. Með sérstökum aðstæðum er einkum vísað til veikinda, erfiðra félagslegra aðstæðna eða eftir atvikum hás aldurs skuldara.

Svör við fyrirspurnarbréfi bárust frá umsækjanda þann 5. og 11. maí sl. Þá bárust frekari svör þann 27. maí sl. eftir að umsækjanda var sendur tölvupóstur með spurningum í tengslum við svör sem höfðu þegar borist frá honum.

Samkvæmt fyrirliggjandi gögnum voru uppgefnar tekjur umsækjanda á tekjuárinu 2023 samtals að fjárhæð 4.474.914 kr. eða að meðaltali 372.910 kr. á mánuði. Áætlaður framfærslukostnaður umsækjanda á tekjuárinu 2023 var 157.905 kr. á mánuði. Framfærslukostnaður umsækjanda samanstendur af helminguðu framfærsluviðmiði umboðsmanns skuldara fyrir barnlaust par. Líkt og tekið var fram í fyrirspurnarbréfi sem umsækjanda var sent þann 2. maí sl. var vakin athygli á því að þrátt fyrir að innborganir á árinu 2023 sem spurt var um í bréfinu væru ekki tekjur og aðeins væri horft til uppgefinna tekna og framfærsluviðmiða á Íslandi þá væri greiðslugeta samt sem áður 129.320 kr. að meðaltali á mánuði á árinu 2023. Í ljósi þess að umsækjandi kvaðst í svari þann 5. maí sl. ekki kannast við að tekjur hafi komið frá Húsnæðis- og mannvirkjastofnun árið 2023 þar sem hann hefði ekki leigt húsnæði á Íslandi í langan tíma þá er vert að vekja athygli á því að þær upplýsingar eru sóttar beint í skattframtal fyrir tekjuárið 2023. Auk þess er horft til þess að umsækjanda er aðeins reiknaður helmingur af því til tekna eða 3620 kr.

Greiðslugeta	2023
Tekjur skv. Staðgreiðsluskrá	4.354.913
Verktaka skv. Framtali	50.000
TR skattfrjálsar tekjur	66.381
Húsnæðisbætur 1/2 skv. framtali (7620 kr.)	3.620
Seðlainnborganir úti á G
Seðlainnborganir inn i reikning hjá Landsbankanum
B
C
D
E einn rekstraraðila D
F, fyrrum rekstraraðili D
Samtals tekjur	4.474.914
Framfærslukostnaður 1/2 (157.905 kr. x 12)	1.894.860
Svigrúm UMS 1/2 ((12.632 kr. x 121/2)	75.792
Húsaleiga 1/2 miðað við greitt á Íslandi frá sept til des + G	864.940
Rafmagn/Hiti
Tryggingar (4500 kr. x 12)	54.000
Útvarpsgjald	20.200
Gjald framkvæmdasj. aldr.	13.284
Samtals framfærslukostn.	2.923.076
Áætluð greiðslugeta '23	1.551.838
Mánaðarlega '23	129.320

Í fyrirspurnarbréfi sem umsækjanda var sent þann 2. maí sl. var tekið fram að umboðsmaður skuldara hefði heimild til að samþykkja umsókn, þrátt fyrir að synjunargrundvöllur lægi fyrir, ef sérstakar aðstæður væru fyrir hendi. Vísaði embættið til þess að í umsókn umsækjanda um aðstoð vegna fjárhagsvanda hafi hann m.a. borið fyrir sig veikindi sem ástæðu greiðsluerfiðleika og óskaði embættið því eftir upplýsingum um hvort að veikindi væru ástæða þess að hann hefði ekki greitt af skuldum í samræmi við greiðslugetu á árunum 2024 og 2023. Ef veikindi væru ástæða óskaði embættið eftir því að umsækjandi legði fram gögn því til stuðnings. Í tölvupósti sem barst 5. maí sl. tók umsækjandi fram að hann hefði ekki verið að bera fyrir sig veikindi á einn né annan hátt vegna skuldastöðu sinnar heldur að hann væri öryrki á örorkubótum sem hafi ekki dugað til að framfleyta honum. Þá tók umsækjandi fram í svörum sínum að ekki hafi verið tekið tillit til útgjalda sem hann hafi þurft að standa straum af. Í fyrirspurn sem umsækjanda var send þann 26. maí sl. var honum gefið tækifæri á að sýna fram á aukin útgjöld. Svar barst frá umsækjanda þann 27. maí sl. þar sem hann tók fram að hann gæti ekki sýnt fram á aukin útgjöld með beinum hætti.

Í svari umsækjanda frá 11. maí sl. kom fram að hann keypti bifreið á G fyrir tveimur árum að fjárhæð 15.000 €. Hann greiddi 4000 € við kaupin en tók svo lán til fjögurra ára vegna eftirstöðva og greiðir mánaðarlega 250 €. Umsækjandi kvaðst hafa notað allan sinn sparnað til þess að kaupa bifreiðina. Þá greinir hann frá því að hann hafi dvalið um tíma á Íslandi og ákveðið að leigja bifreiðina út til einstaklings á meðan á dvöl hans stæði á Íslandi. Þann 10. september hafi leigjandi bifreiðarinnar sent honum skilaboð um að hann hefði lent í slysi og bifreiðin skemmst við það. Umsækjandi kveðst þurfa að standa straum af verulegum viðgerðakostnaði vegna tjónsins. Með hliðsjón af fjárhagsstöðu umsækjanda og vanskilum á skuldbindingum hans á Íslandi, þykir ekki réttlætanlegt að taka þennan útgjaldalið til greina.

Af þeim svörum sem bárust frá umsækjanda vegna innborgana má ráða að hluti þeirra fjármuna árið 2023 sem spurt var um hafi verið tekjur. Hins vegar hafa svör umsækjanda verið óskýr um hvaða hluti þeirra teljist til tekna, sérstaklega hvað varðar greiðslur frá D og seðlainnborganir. Í svörum frá umsækjanda þann 5. maí sl. kom fram að millifærslur frá D árin 2023-2025 væru tilkomnar vegna þess að hann væri skráður fyrir rafmagnsreikningi á D sem hann hafi greitt og því væri um að ræða endurgreiðslu frá félaginu. Í frekari svörum þann 27. maí sl., varðandi fyrirspurn um seðlainnborganir, greindi umsækjandi frá því að hann keypti flugmiða til Íslands árið 2023 sem D endurgreiddi honum. Einnig tók umsækjandi fram að hann hafi notað sitt eigið greiðslukort í versluninni M og fengið endurgreitt frá D í nokkrum greiðslum sem til væru færslur um. Þess ber að geta að í ofangreindum útreikningi á greiðslugetu árið 2023 er ekki tekið tillit til þeirra innborgana sem bárust inn á reikning umsækjanda heldur er aðeins horft til uppgefinna tekna.

Þá er vert að vekja athygli á því að miðað við opinberar upplýsingar er framfærslukostnaður alla jafna lægri á G en á Íslandi en ofangreindir útreikningar á framfærslukostnaði miðast við íslensk framfærsluviðmið. Samkvæmt umsækjanda hefur hann skipst á að vera á Íslandi og G síðastliðin tvö ár. Telja má því að greiðslugeta umsækjanda hafi verið hærri en samkvæmt meðfylgjandi útreikningum. Sé tekið tillit til innborgana sem spurt var útí í fyrirspurnarbréfi þann 2. maí sl. þá hefur greiðslugeta umsækjanda árið 2023 verið 234.879 kr. að meðaltali á mánuði eða enn hærri.

 

Reiknuð greiðslugeta að teknu tilliti til innborgana sem telja má tekjur

Greiðslugeta	2023
Tekjur skv. staðgreiðsluskrá	4.354.913
Verktaka	50.000
TR skattfrjálsar tekjur	66.381
Húsnæðisbætur 1/2 skv. framtali (7620 kr.)	3.620
Seðlainnborganir úti á G	467.790
Seðlainnborganir inn á reikning hjá Landsbankanum	202.500
B.	174.885
C.
D.	131.532
E einn rekstraraðila D	170.000
F, fyrrum rekstraraðili D	100.000
Samtals tekjur	5.721.621
Framfærslukostnaður 1/2 (157.905 kr. x 12)	1.894.860
Svigrúm UMS 1/2 ((12.632 kr. x 121/2)	75.792
Húsaleiga 1/2 miðað við greitt á Íslandi frá sept til des + G	844.940
Rafmagn/Hiti
Tryggingar (4500 Kr. x 12)	54.000
Útvarpsgjald	20.200
Gjald í framkvæmdasj. alfr.	13.284
Samtals framfærslukostn.	2.903.076
Áætluð greiðslugerð '23	2.818.545
Mánaðarlega '23	234.879

Það er því mat embættisins að umsækjandi greiddi ekki af skuldbindingum sínum tekjuárið 2023 þrátt fyrir að hafa haft greiðslugetu til þess og hefur ekki lagt fram skýringar né gögn sem skýra ástæðu þess.

II. Niðurstaða

Umsækjanda var sent fyrirspurnarbréf, dags. 2. maí sl. og var í bréfinu gerð grein fyrir mikilvægi þess að skýra þar til greind álitaefni og leggja fram gögn auk þess sem tölvupóstur var sendur með frekari spurningum þann 26. maí sl. Telur embættið sig hafa veitt umsækjanda færi á að andmæla fyrirsjáanlegri synjun umsóknar um greiðsluaðlögun, sbr. 13. gr. stjórnsýslulaga nr. 37/1993, með greindu ábyrgðarbréfi og einnig að svör sem bárust með tölvupóstum þann 5., 11. og 27. maí sl., breyti engu um niðurstöðu málsins. Er það mat embættisins að synja beri umsókninni á grundvelli k-liðar 6. gr. laga um greiðsluaðlögun einstaklinga nr. 101/2010“

 

Í greinargerð umboðsmanns skuldara kemur fram að kærandi hafi lagt inn umsókn um greiðsluaðlögun þann 20. mars 2025. Í hinni kærðu ákvörðun hafi núverandi fjárhagsstaða kæranda verið rakin auk annarra upplýsinga sem málið varði. Við meðferð málsins hafi komið í ljós atvik sem hafi þótt geta leitt til synjunar um heimild til greiðsluaðlögunar. Því hafi kæranda verið sent ábyrgðarbréf, dags. 2. maí 2025, þar sem honum hafi verið boðið að leggja fram frekari gögn í málinu og láta álit sitt í ljós. Viðbrögð kæranda hafi borist með tölvupóstum dags. 5., 11. og 27. maí 2025. Með ákvörðun dags. 30. maí 2025 hafi kæranda verið synjað um greiðsluaðlögun með vísan til k-liðar 6. gr. lge. Um málsatvik og forsendur vísist að öðru leyti til hinnar kærðu ákvörðunar.

Umboðsmanni skuldara beri við mat á umsókn að líta til þeirra aðstæðna sem geti komið í veg fyrir að greiðsluaðlögun verði heimiluð, sbr. 6. gr. lge.

Í hinni kærðu ákvörðun sé ítarlegur rökstuðningur fyrir synjun umsóknar kæranda um greiðsluaðlögun, með vísan til k-liðar 6. gr. lge. Í hinni kærðu ákvörðun hafi verið farið yfir atvik málsins og hvernig þau hafiheimfærst undir umrætt ákvæði 6. gr. lge.

Viðbrögð umboðsmanns skuldara við framkomnum athugasemdum kæranda

1. Ekki tekið tillit til útgjalda vegna bifreiðar:

Líkt og rakið sé í hinni kærðu ákvörðun keypti kærandi að hans sögn bifreið fyrir 15.000 €. Hann greiddi 4.000 € út og tók svo lán til fjögurra ára fyrir eftirstöðvum. Bifreiðin hafi svo skemmst eftir slys. Líkt og rakið sé í framangreindri ákvörðun teljist ekki réttlætanlegt að taka tillit til þessa útgjaldaliðar með hliðsjón af fjárhagsstöðu kæranda og vanskilum hans á Íslandi sem rekja megi aftur til ársins 2018.

2. Ekki tekið tillit til kostnaðar vegna tanna:

Þann 26. maí [2025] hafi kæranda verið sendur tölvupóstur þar sem honum hafi m.a. verið gefið tækifæri á að leggja fram gögn sem sýndu fram á útlagðan kostnað vegna tannviðgerða eða kostnaðaráætlun vegna fyrirhugaðra viðgerða. Kærandi hafi svarað þann 27. maí [2025] þar sem hann hafi sagst ekki vera kominn með kostnaðaráætlun fyrir tannviðgerðum.

3. Ekki tekið tillit til þess að hann hafi verið meiripartinn á Íslandi:

Þess beri að geta að framfærsluviðmið í útreikningum á greiðslugetu hafi tekið mið af framfærsluviðmiðum á Íslandi en ekki G. Þá beri að geta þess að í svari með tölvupósti frá kæranda þann 5. maí, sem vísað sé til í synjunarbréfi, hafi kærandi ekki kannast við að hafa fengið tekjur frá Húsnæðis- og mannvirkjastofnun þar sem hann hafði ekki leigt húsnæði á Íslandi í langan tíma. Samkvæmt skattframtali fyrir tekjuárið 2023 hafi leigugreiðslur á Íslandi verið greiddar frá 1. september til og með 31. desember 2023, samtals að fjárhæð 960.000 kr. Að auki hafi verið tekið fram í fyrirspurnarbréfi þann 2. maí [2025] að ef upplýsingar um tekjur og mánaðarleg útgjöld væru ekki réttar væri óskað eftir upplýsingum og gögnum því til staðfestingar. Engar frekari athugasemdir né gögn hafi borist frá kæranda.

 

4. Ekki tekið tillit til útgjalda:

Kæranda hafi verið veitt tækifæri á að leggja fram gögn sem sýndu fram á aukin útgjöld sem hann hafi vísað til í svari hans með tölvupósti þann 5. maí [2025]. Svar hafi borist frá kæranda þann 27. maí [2025] þar sem hann kvaðst ekki geta sýnt fram á aukin útgjöld.

5. Vegið að kæranda með því að hann beri fyrir sig veikindum:

Hvað þennan lið varðar er vísað til fyrirspurnarbréfs sem kæranda var sent þann 2. maí [2025] þar sem tekið hafi verið fram að í umsókn hans um aðstoð vegna fjárhagsvanda hafi hann sjálfur merkt við að ástæður greiðsluerfiðleika væru m.a. vegna veikinda. Hafi kæranda því verið veitt tækifæri á að veita upplýsingar um hvort að það væri ástæða fyrir því að hann hefði ekki greitt af skuldbindingum sínum. Vísist frekar til þessa liðar á blaðsíðu átta í fyrirspurnarbréfinu frá 2. maí sl.

6. Var með fjölskyldu á þessum tíma og eiginkona veik:

Þess beri að geta að samkvæmt skattframtali fyrir tekjuárið 2023 hafi hjónin ekki verið með nein börn á framfæri á því ári. Líkt og að framan greini sé reiknuð greiðslugeta fyrir tekjuárið 2023 byggð á framfærsluviðmiðum á Íslandi og miðist við helminguð framfærsluviðmið umboðsmanns skuldara fyrir barnlaust par. Líkt og skattframtal beri með sér virðist hjónin hafa dvalið á Íslandi frá 1. september 2023 til og með 31. desember s.á. og taki leigugreiðslur mið af fyrirliggjandi upplýsingum. Líkt og að framan greini hafi kæranda verið veitt tækifæri á að veita upplýsingar studdum gögnum ef upplýsingar um tekjur og mánaðarleg útgjöld væru ekki réttar. Engar frekari athugasemdir né gögn hafi en að framan greini, þ.e. athugasemd varðandi greiðslur frá Húnsæðis- og mannvirkjastofnun.

Með vísan til forsendna hinnar kærðu ákvörðunar fari umboðsmaður skuldara fram á hún verði staðfest

IV. Niðurstaða

Ákvörðun umboðsmanns skuldara byggist á k-lið 1. mgr. 6. gr. lge.

Samkvæmt k-lið 1. mgr. 6. gr. lge. skal synja um heimild til greiðsluaðlögunar, nema sérstakar ástæður séu fyrir hendi, ef skuldari hefur á ámælisverðan hátt látið undir höfuð leggjast að standa við skuldbindingar sínar eftir því sem honum var framast unnt.

Kærandi sótti um heimild til að leita greiðsluaðlögunar 20. mars 2025.

Í athugasemdum með frumvarpi til lge. segir að regla f-liðar 2. mgr. 6. gr. lge., nú k-liðar 1. mgr. 6. gr. lge., eigi við um þau tilvik er skuldari greiðir ekki af skuldbindingum sínum, þrátt fyrir að geta það að einhverju leyti. Greiðslugeta er til dæmis fyrir hendi þegar skuldari hefur laun eða aðrar tekjur sem eru hærri en mánaðarlegur framfærslukostnaður þannig að hann á fjármuni aflögu til að greiða af skuldum sínum.

Í málinu liggur fyrir að á þeim tíma er kærandi sótti um heimild til greiðsluaðlögunar í maí 2025 var meirihluti skuldbindinga hans í vanskilum, þ.m.t. nokkur lán sem kærandi tók árið 2018. Samkvæmt gögnum málsins var mánaðarleg greiðslugeta kæranda að meðaltali jákvæð um 129.320-234.879 krónur á árinu 2023. Þrátt fyrir jákvæða greiðslugetu á þeim tíma nýtti kærandi ekki fjármunina til þess að standa við skuldbindingar sínar.

Gera verður þá kröfu til einstaklinga, sem glíma við svo verulega fjárhagserfiðleika að íhlutunar sé þörf, að þeir dragi úr útgjöldum sem ætla megi að hægt sé að komast hjá eða fresta og noti þá fjármuni sem þeir hafa til að greiða af skuldum sínum. Ekki verður annað ráðið af gögnum málsins en að kæranda hafi verið unnt að greiða af skuldum sínum á framangreindu tímabili.

Í bréfi umboðsmanns skuldara til kæranda, dags. 2. maí 2025, var óskað eftir nánari upplýsingum og gögnum frá kæranda, til að unnt væri að taka afstöðu til afgreiðslu umsóknar hans um greiðsluaðlögun. Í bréfinu kom fram að í umsókn kæranda hefði komið fram að greiðsluvandi hans væri tilkominn vegna veikinda og því óskaði embættið eftir upplýsingum um hvort þau veikindi væru ástæða þess að kærandi hafi ekki greitt af skuldum sínum í samræmi við greiðslugetu á framangreindu tímabili, sbr. k-lið 6. gr. lge. Ef svo væri óskaði umboðsmaður skuldara eftir læknisvottorði eða öðrum haldbærum gögnum því til stuðnings. Í svari kæranda til umboðsmanns skuldara, dags., 5. maí 2025, koma fram að kærandi væri ekki að bera fyrir sig veikindi heldur að hann væri öryki á örorkubótum sem hafi ekki dugað honum til framfærslu. Með vísan til þessa er ljóst að ekki eru ástæður fyrir hendi í máli kæranda sem teljast sérstakar í skilningi 1. mgr. 6. gr. lge.

Að þessu virtu er það mat úrskurðarnefndarinnar að þær aðstæður sem lýst er í k-lið 1. mgr. 6. gr. lge. eigi við og að þær komi í veg fyrir að greiðsluaðlögun verði heimiluð samkvæmt lge. þar sem kærandi hafi á ámælisverðan hátt látið undir höfuð leggjast að standa við skuldbindingar sínar eftir því sem honum var framast unnt.

Í ljósi þess, er að framan greinir, er ákvörðun umboðsmanns skuldara um að synja umsókn kæranda um greiðsluaðlögun staðfest.

 

 

 

 

 

 

 

 

ÚRSKURÐARORÐ

Ákvörðun umboðsmanns skuldara um að synja umsókn A, um heimild til að leita greiðsluaðlögunar, er staðfest.

F.h. úrskurðarnefndar velferðarmála

Kári Gunndórsson