Fjölgun lögreglumanna eykur öryggi almennings

Dómsmálaráðherra kynnti í upphafi árs áform sín um að fjölga lögreglumönnum um fimmtíu þegar á þessu ári. Markmið ráðherra með aukningunni var að efla löggæslu í landinu og tryggja öryggi almennings ásamt öryggi lögreglumanna.

Ríkisstjórnin samþykkti tillögu ráðherra þann 3. febrúar sl. Ákvörðun ráðherra var byggð á þeirri staðreynd að heildarfjöldi starfandi lögreglumanna hefur ekki haldist í hendur við fólksfjölgun í landinu, stórfellda aukningu á komum ferðamanna til landsins né heldur hvað varðar breytt landslag afbrota.

Aukið öryggi almennings í fyrirrúmi

Fjölgun lögreglumanna er í takt við stefnuyfirlýsingu ríkisstjórnarinnar þar sem segir að unnið verði að því að auka öryggi almennings og fjölga lögreglumönnum á kjörtímabilinu.

Árið 2024 voru alls 795 lögreglumenn við störf á Íslandi, að frátöldum nemum og héraðslögmönnum. Brottfall innan lögreglu er umtalsvert og hefur aukist á undanförnum árum. Ráðherra hyggst láta greina ástæður brottfalls innan lögreglunnar og leita leiða til að snúa þeirri þróun við.

„Það er frumskylda stjórnvalda að tryggja öryggi fólks í landinu og mikilvægt að bregðast við bæði brottfalli innan lögreglunnar og þeim breytingum sem blasa við í afbrotum. Við ætlum að efla löggæslu í landinu og fjölgun í stéttinni er liður í því,“ segir Þorbjörg S. Gunnlaugsdóttir, dómsmálaráðherra.

Embætti	Hlutfall fjölda íbúa	Fjöldi per 10.000 íbúa
Lögreglan á höfuðborgarsvæðinu	64%	13,3
Lögreglan á Suðurlandi	8%	24,6
Lögreglan á Suðurnesjum	8%	39,1
Lögreglan í Vestmannaeyjum	1%	31,5
Lögreglan á Austurlandi	3%	29,8
Lögreglan á Norðurlandi eystra	8%	25,0
Lögreglan á Norðurlandi vestra	2%	30,1
Lögreglan á Vestfjörðum	2%	36,4
Lögreglan á Vesturlandi	5%	26,4

Taflan hér að ofan sýnir stöðuna í upphafi árs 2025, fyrir fjölgun lögreglumanna. Hún sýnir hlutfall fjölda íbúa og fjölda lögreglumanna per. 10 þúsund íbúa eftir lögregluembættum. 

Skipting aukinna stöðugilda var ákveðin með tilliti til hlutfalls starfandi lögreglumanna á hverja tíu þúsund íbúa í hverju umdæmi ásamt verkefnastöðu embættanna. Þá var einnig horft til málaþunga embættanna, þróunar undanfarin misseri, auk hlutfalls hegningarlagabrota. T.a.m. eru um 70-80% slíkra brota framin á höfuðborgarsvæðinu. Á landsbyggðinni var lögð áhersla á styttri viðbragðstíma lögreglu.

Lagt var til að stöðugildum yrði fjölgað um land allt og var skiptingin eftirfarandi:

Embætti	Aukin stöðugildi
Ríkislögreglustjóri	2
Lögreglan á höfuðborgarsvæðinu	28
Lögreglan á Suðurlandi	4
Lögreglan á Suðurnesjum	3
Lögreglan í Vestmannaeyjum	0
Lögreglan á Austurlandi	2
Lögreglan á Norðurlandi eystra	6
Lögreglan á Norðurlandi vestra	1
Lögreglan á Vestfjörðum	2
Lögreglan á Vesturlandi	2

Lögreglustjórar hvers embættis annast daglega stjórn og rekstur í sínu umdæmi og bera ábyrgð á framkvæmd lögreglustarfa innan þess og ráðstafa því stöðugildum í sínu umdæmi.

Dómsmálaráðherra heimsótti Lögregluna á höfuðborgarsvæðinu í júní sl.

Metaðsókn í nám í lögreglufræði

Samhliða fjölgun stöðugilda um land allt ákvað dómsmálaráðherra að auka fjölda þeirra sem fá inngöngu í nám við lögreglufræði. Metfjöldi umsókna bárust og 96 nýnemar hófu nám við skólann í haust. Auk nýnema haustsins hófu um 80 nemendur síðara námsárið. Alls verða því um 176 nemendur í námi í lögreglufræðum í vetur, bæði á fyrra og seinna ári, og má gera ráð fyrir að það skili sér í metfjölda brautskráðra næstu árin.

Þetta er mikilvægur liður í því að fjölga menntuðum lögreglumönnum hjá lögregluembættum landsins.