08 september 2025
/
Fullbókað í hluta dagskrár komandi Umhverfisþings – biðlistar opnir
Mikill áhugi er á Umhverfisþingi sem haldið verður í Silfurbergi í Hörpu dagana 15. og 16. september. Skráning var opin öllum og hófst þann 15. ágúst 2025 og var auglýst á vef Stjórnarráðsins og Facebook. Nú er orðið fullbókað í vinnustofurnar Verndum líffræðilega fjölbreytni og Fyrsta loftslagsstefna Íslands sem haldnar verða 16. september, en tekið er við nöfnum á biðlista. Áfram er hins vegar hægt að skrá sig til þátttöku í dagskrá þingsins 15. september, sem og í pallborðsumræðum um málefni hafsins að morgni 16. september.
Þetta er fjórtánda Umhverfisþingið sem haldið er og er þingið umfangsmeira en undanfarin ár. Meginþemu þingsins verða líffræðileg fjölbreytni, loftslagsmál og hafið.
Með þinginu vill Jóhann Páll Jóhannsson, umhverfis-, orku- og loftslagsráðherra efla samtal við almenning, félagasamtök og hagaðila um umhverfismál, með áherslu á framangreind þemu. Því er skráning opin öllum. Umhverfisþingi er ætlað að ná fram uppbyggilegu samtali um viðfangsefni þingsins og skapa grundvöll að framhaldsvinnu stjórnvalda í málaflokkunum. Dagskráin verður því að meginstefnu til í formi vinnustofa, en þar að auki verða fyrirlestrar og pallborðsumræður. Þann 15. september verður vinnustofa skipulögð af aktívistum, sem mun fjalla um áhrifamátt samtalsins og hvernig við eflum samráð stjórnvalda við almenning í loftslagsmálum.
Aðalfyrirlesari þingsins, er Thomas Halliday, fornlíffræðingur, steingervingafræðingur og höfundur bókarinnar Otherlands, sem hefur í rannsóknum sínum beint athyglinni að því hvernig jörðin hefur náð sér eftir síðustu fjöldadauða. Í erindi sínu Hope and the Great Dying fjallar Halliday um að loftslagbreytingarnar sem við stöndum frammi fyrir í dag eru ekki þær einu sem jörðin hefur staðið frammi fyrir. Atburðir fyrri tíma hafa margir hverjir haft skelfilegar afleiðingar fyrir líf á jörðu. Loftslagsbreytingar sem áttu sér stað fyrir 250 milljónum ára ullu til að mynda versta fjöldadauða sögunar, er 95% þeirra tegunda sem þá byggðu jörðina þurrkuðust út. Það kann að vera freistandi að nota þessa atburði fortíðar til að spá fyrir um fyrirsjáanlegar hörmungar í náinni framtíð, en að hve miklu leyti er það rétt? Hvað getum við lært af fortíðinni til að bjarga framtíðinni?
Þá mun Ingibjörg Þórðardóttir eiga samtal við Höllu Tómasdóttur, forseta Íslands, um mikilvægi umhverfis- og loftslagsmála. Umhverfis-, orku- og loftslagsráðherra mun afhenda náttúruverndarviðurkenningu Sigríðar í Brattholti og enn er opið fyrir skráningu í vinnustofunni Áhrifamáttur samtals sem skipulögð er af loftslagsaktívistum, þar sem fara fram umræður um það hvernig efla megi samráð og samtal um loftslagsmál.
Fjöldi innlendra og erlendra sérfræðinga taka þátt í pallborðsumræðum um málefni hafsins, sem fram fara að morgni 16. september. Þetta eru þau:
- Dr. Chris McOwen, sjávarlíffræðingur hjá Umhverfisstofnun Sameinuðu þjóðanna (UNEP).
- Samantha Robb, lögfræðingur í hafréttardeild Ocean Vision Legal. Hún hefur bakgrunn í alþjóðarétti, alþjóðlegum hafrétti og mannréttindarétti.
- Dr. Sian Prior, sjávarlíffræðingur. Prior hefur starfað fyrir og veitt ráðgjöf til fjölda umhverfisverndar- og hafverndarhópa, m.a. Clean Arctic Alliance.
- Rui Martins, héraðsstjóri hafmála á Azoreyjum (Regional Director for Ocean Affairs).
- Dr. Guðbjörg Ásta Ólafsdóttir forstöðumaður rannsóknarseturs Háskóla Íslands á Vestfjörðum.
- Dr. Snorri Sigurðsson, líffræðingur og sviðsstjóri náttúruverndar, Náttúrufræðistofnun.
- Björn Helgi Barkarson, umhverfisfræðingur og skrifstofustjóri umhverfis-, orku- og loftslagsráðuneytinu.
- Dr. Snjólaug Árnadóttir, dósent og doktor í hafrétti við Háskólann í Reykjavík.
- Hrefna Karlsdóttir, sérfræðingur hjá Samtökum fyrirtækja í Sjávarútvegi, í fiskveiðistjórn og samningum við erlend ríki.
- Dr. Freydís Vigfúsdóttir, líffræðingur og sérfræðingur í umhverfis-, orku- og loftslagsráðuneytinu.