Baráttan fyrir launajafnrétti á heimsvísu

Alþjóðlegi jafnlaunadagurinn var í dag, 18. september, en tilurð hans má rekja til ályktunar Íslands sem lögð var fram í mannréttindaráði Sameinuðu þjóðanna árið 2018 og fylgt eftir með ályktun allsherjarþings Sameinuðu þjóðanna ári síðar.

Það eru alþjóðasamtökin um launajafnrétti (EPIC) sem standa fyrir deginum sem hefur það markmið að vekja athygli á aðgerðum sem stuðla að launajafnrétti og hvetja til frekari aðgerða svo markmiði um um jöfn laun fyrir jafnverðmæt störf verði náð, í samræmi við heimsmarkmið Sameinuðu þjóðanna.

„Við Íslendingar getum verið stolt af því að hafa átt þátt í því að koma þessum degi á, og vekja þannig athygli á þessu mikilvæga baráttumáli á heimsvísu,“ segir Þorgerður Katrín Gunnarsdóttir utanríkisráðherra. „Þó að Ísland hafi vissulega góða sögu að segja þegar kemur að jafnréttismálum, þá er baráttunni hvergi nærri lokið. Því miður sjáum við bakslag víða um heim - jafnvel í löndum sem hafa staðið framarlega þegar kemur að kynjajafnrétti. Það er víða mikið verk óunnið en við höldum áfram að tala fyrir okkar gildum hvar sem við komum og hvikum hvergi frá þeim.”

Í tilefni dagsins stóð fastanefnd Íslands gagnvart mannréttindaráðinu í Genf fyrir sameiginlegri yfirlýsingu í yfirstandandi haustlotu ráðsins sem studd var af fjölda ríkja en í yfirlýsingunni var mikilvægi launajafnréttis ítrekað.

Ísland var kjörið til setu í mannréttindaráði Sameinuðu þjóðanna til þriggja ára, 2025 til 2027, í kosningum sem fram fóru á allsherjarþingi Sameinuðu þjóðanna haustið 2024. Í mannréttindaráðinu beitir Ísland sér fyrir varðstöðu og aukinni samstöðu um mannréttindi á heimsvísu og leggur sérstaka áherslu á kynjajafnrétti, málefni hinsegin fólks, réttindi barna, og tengsl umhverfismála og mannréttinda.