Endurskoðuð stefna stjórnvalda gegn peningaþvætti og fjármögnun hryðjuverka

Dómsmálaráðherra birti í dag endurskoðaða stefnu stjórnvalda ásamt áætlun um frekari aðgerðir í baráttunni gegn peningaþvætti, fjármögnun hryðjuverka og fjármögnun og útbreiðslu gereyðingarvopna.

Með þessu leitast stjórnvöld við að styrkja varnir samfélagsins gegn alþjóðlegri glæpastarfsemi. Aðgerðirnar eru tíu talsins og stuðla að auknu trausti á íslenskt efnahagslíf, verja hagsmuni neytenda og tryggja að Ísland sé áfram í fararbroddi í alþjóðlegu samstarfi gegn þessum alvarlegu ógnum.

Ráðherra kynnti stefnuna og aðgerðaráætlunina á fundi ríkisstjórnarinnar fyrr í vikunni.

„Það er einhugur í ríkisstjórninni um þessar áherslur. Skipulögð glæpastarfsemi nærist á peningaþvætti og þess vegna er þessi barátta ekki bara tæknilegt eftirlitsmál heldur lykilatriði í því að uppræta alvarlega ógn við öryggi Íslendinga. Með þessu sendum við skýr skilaboð; Ísland verður ekki athvarf fyrir glæpahópa sem reyna að nýta sér fjármálakerfið til að fela ólögmætan gróða,“ segir Þorbjörg S. Gunnlaugsdóttir, dómsmálaráðherra.

Stefnan og aðgerðaáætlunin hafa verið undirbúnar af stýrihópi dómsmálaráðherra, sem hefur það lögbundna hlutverk að vinna að samhæfingu aðgerða stjórnvalda vegna varna í málaflokknum.

Þrjú lykilmarkmið stjórnvalda

Endurskoðuð stefna stjórnvalda leggur nú sérstaka áherslu á þrjú lykilmarkmið, þ.e. að tryggja endurheimt ávinnings, takast á við áhættu tengda reiðufé og bregðast við áskorunum vegna sýndareigna. 

Aðgerðaáætlun stýrihópsins, sem byggir á áhættumati ríkislögreglustjóra frá árunum 2023 og 2025, leggur til afmarkaðar aðgerðir, annars vegar til að draga úr því sem metið hefur verið sem veruleg eða mikil áhætta og hins vegar til að auka skilvirkni stjórnvalda. Aðgerðirnar taka jafnframt mið af stefnu stjórnvalda, auk þróunar og skuldbindinga á alþjóðavettvangi.

Aðgerðir gegn peningaþvætti, fjármögnun hryðjuverka og fjármögnun og útbreiðslu gereyðingarvopna:

• Stefna stjórnvalda
• Aðgerðaáætlun