25 september 2025
/
1299/2025. Úrskurður frá 25. september 2025
Hinn 25. september 2025 kvað úrskurðarnefnd um upplýsingamál upp svohljóðandi úrskurð nr. 1299/2025 í máli ÚNU 25040004.
Kæra, málsatvik og málsmeðferð
Með erindi, dags. 30. mars 2025, kærði […] til úrskurðarnefndar um upplýsingamál að Garðabær hefði ekki afgreitt gagnabeiðni hans í kjölfar úrskurðar nr. 1250/2025 frá 18. febrúar 2025. Með úrskurðinum var lagt fyrir Garðabæ að taka til nýrrar meðferðar og afgreiðslu beiðni kæranda um aðgang að PDF-skjali sem hefði að geyma yfirlit úr málaskrá sveitarfélagsins yfir mál og gögn sem vörðuðu dóttur kæranda.
Kæran var kynnt Garðabæ með erindi, dags. 16. apríl 2025, og skorað á sveitarfélagið að afgreiða beiðnina innan tilgreinds frests. Ef Garðabær hygðist ekki afgreiða beiðnina eða ef afgreiðslan fæli í sér að ekki yrði orðið við beiðninni, í heild eða að hluta, mæltist úrskurðarnefndin til þess að nefndinni yrði send umsögn um málið innan sama frests.
Með erindi, dags. 29. apríl 2025, upplýsti Garðabær úrskurðarnefndina að fyrirhugaður væri fundur með kæranda í lok maímánaðar. Af þeim sökum myndi afgreiðsla erindisins frestast. Með erindi, dags. 2. júní 2025, upplýsti Garðabær um að fundur hefði verið haldinn 28. maí 2025 með kæranda og eiginkonu hans. Samdægurs hefði kæranda verið sent erindi þess efnis að búið væri að birta yfirlit úr málaskrá sveitarfélagsins yfir mál skráð á kennitölu dóttur kæranda. Í nokkrum þeirra mála sem tilgreind væru í yfirlitinu hefði verið strikað yfir nöfn annarra barna.
Með erindi, dags. 4. júní 2025, óskaði úrskurðarnefndin afstöðu kæranda til þess hvort hann hefði hug á að málinu yrði haldið áfram hjá nefndinni í ljósi þess að nú væri búið að afgreiða beiðni kæranda. Með erindi, dags. 9. júní 2025, upplýsti kærandi að hann hefði nú fengið aðgang að umbeðnum gögnum, en því miður vantaði í þau. Kærandi hefði sent erindi til sveitarfélagsins og spurt hvernig sveitarfélagið hygðist uppfylla skyldur sínar og afhenda öll þau gögn sem kærandi ætti rétt á að fá afhent.
Með erindi, dags. 23. júní 2025, gaf úrskurðarnefndin Garðabæ færi á að koma á framfæri athugasemdum og rökstuðningi fyrir þeirri ákvörðun að afmá tilgreindar upplýsingar úr gögnunum sem afhent voru kæranda. Í erindi, dags. 3. júlí 2025, vísaði Garðabær til þess að útstrikanir í afhentum gögnum hefðu byggst á takmörkunarákvæði 3. mgr. 14. gr. upplýsingalaga, nr. 140/2012. Búið væri að afhenda kæranda öll skjáskot úr málaskrá Garðabæjar sem upphaflega hefðu orðið til vegna máls hjá úrskurðarnefndinni sem lauk með úrskurði nr. 1150/2023. Garðabær teldi sig hafa teygt sig eins langt og mögulegt væri til að koma til móts við athugasemdir í úrskurðum nefndarinnar sem vörðuðu þetta mál. Skólagöngu dóttur kæranda hefði lokið fyrir fjórum árum. Garðabær hefði fyrir löngu afhent kæranda öll þau gögn sem málið varðaði og réttur hans næði til.
Með erindi, dags. 8. júlí 2025, gaf úrskurðarnefndin kæranda kost á að koma á framfæri athugasemdum um málið í ljósi viðbragða Garðabæjar. Með erindi, dags. 20. júlí 2025, upplýsti kærandi nefndina að hann væri raunar ekki að setja út á að strikað hefði verið yfir upplýsingar í þeim gögnum sem honum voru afhent. Hins vegar vantaði enn gögn í málaskrá Garðabæjar og því teldi kærandi að Garðabær þyrfti að útskýra með tæmandi hætti hvaða gögn hefðu verið undanskilin við afgreiðslu, ásamt ástæðu þess.
Niðurstaða
Grundvöllur kæru í máli þessu var sá að Garðabær hefði ekki afgreitt beiðni kæranda um gögn í kjölfar þess að úrskurðarnefnd um upplýsingamál vísaði beiðni kæranda til Garðabæjar til nýrrar meðferðar og afgreiðslu með úrskurði nr. 1250/2025 frá 18. febrúar 2025. Í kjölfar fundar kæranda og Garðabæjar í lok maí var beiðnin afgreidd og kæranda afhent þau gögn sem hann hafði óskað eftir. Þar sem beiðnin hefur nú verið afgreidd er ljóst að grundvöllur kæru til nefndarinnar er ekki lengur til staðar. Í vissum tilvikum sker úrskurðarnefndin efnislega úr um rétt til aðgangs að gagni, þótt kæra í máli hafi borist nefndinni á þeim grundvelli að beiðni hafi ekki verið afgreidd. Í þessu máli liggur hins vegar fyrir að kærandi gerir ekki athugasemd við hvernig Garðabær afgreiddi beiðnina. Það er því ekki ástæða fyrir úrskurðarnefndina til að skera efnislega úr um rétt hans til aðgangs að gagninu.
Við meðferð þessa máls hjá úrskurðarnefndinni hefur kærandi komið því á framfæri að hann telji ljóst af þeim yfirlitum úr málaskrá sem honum voru afhent að fyrir liggi gögn hjá sveitarfélaginu sem ekki séu tilgreind á yfirlitunum. Úrskurðarnefndin telur að þessi athugasemd feli í sér sjálfstætt álitamál sem standi ekki í tengslum við þá beiðni sem var tilefni kæru til nefndarinnar í málinu. Ekki liggur fyrir að Garðabær hafi tekið afstöðu til þessa álitamáls eða tekið ákvörðun vegna þess sem sé kæranleg til úrskurðarnefndarinnar. Að framangreindu virtu verður kæru í málinu vísað frá úrskurðarnefndinni.
Úrskurðarorð
Kæru […], dags. 30. mars 2025, er vísað frá úrskurðarnefnd um upplýsingamál.
Trausti Fannar Valsson, formaður
Hafsteinn Þór Hauksson
Sigríður Árnadóttir