Mælti fyrir frumvarpi um eingreiðslu í desember sem beinist sérstaklega að tekjulægstu lífeyrisþegunum

Inga Sæland, félags- og húsnæðismálaráðherra, hefur mælt fyrir frumvarpi sem felur í sér eingreiðslu í desember til þeirra sem fengið hafa greiddan örorkulífeyri, hlutaörorkulífeyri, ellilífeyri eða fengið sjúkra- og endurhæfingargreiðslur á árinu 2025. Það sama á við um þá sem fengu á árinu greiddan endurhæfingarlífeyri samkvæmt lögum um félagslega aðstoð.

Í frumvarpinu er gert ráð fyrir breytingu frá fyrirkomulaginu sem verið hefur undanfarin ár á eingreiðslunni til að hún komi betur til móts við þá sem eru tekjulægstir. Gert er ráð fyrir að full eingreiðsla verði 73.390 kr og undanþegin skatti, auk þess sem hún leiðir ekki til skerðingar á öðrum greiðslum.

Til viðbótar við eingreiðsluna fá allir ofangreindir hópar desemberuppbót á grundvelli reglugerðar. Þannig er um tvær greiðslur í desember að ræða fyrir þau tekjulægstu:

• Hefðbundna desemberuppbót sem greidd er 1. desember.
• Sérstaka eingreiðslu sem Inga Sæland hefur nú mælt fyrir. Eingreiðslan er stundum kölluð jólabónusinn og beinist nú sérstaklega að tekjulægstu hópum lífeyrisþega. Lagt er til að hún verði greidd í síðasta lagi 15. desember nk.

Í framsöguræðu sinni í þinginu sagði ráðherra að með frumvarpinu væri tryggt að þeir sem minnst hefðu á milli handanna nytu raunverulegs ávinnings. „Þeir sem þurfa mest á því að halda fá mest.“

Áætlað að 37.400 manns fái eingreiðsluna

Í stefnuyfirlýsingu ríkisstjórnarinnar segir meðal annars að gripið verði til aðgerða til að lyfta greiðslum almannatrygginga til tekjulægri lífeyrisþega. Frumvarpið er liður í þeim aðgerðum.

• Áætlað er að um 37.400 einstaklingar fái sérstöku eingreiðsluna í desember.
• Þar af fá 17.000 einstaklingar óskerta eingreiðslu en hana fær tekjulægsta fólkið. Örorkulífeyrisþegar eru þar fjölmennastir eða um 8.600.
• Áætlað er að um 4.300 ellilífeyrisþegar fái óskerta eingreiðslu. Fjöldinn er álíka í hópi sjúkra- og endurhæfingarlífeyrisþega.