Mál nr. 503/2025-Úrskurður

 

Úrskurðarnefnd velferðarmála

Mál nr. 503/2025

Fimmtudaginn 11. desember 2025

A

gegn

Sjúkratryggingum Íslands

Ú R S K U R Ð U R

Mál þetta úrskurða Kári Gunndórsson lögfræðingur, Eva Dís Pálmadóttir lögfræðingur og Kristinn Tómasson læknir.

Með kæru, dags. 14. ágúst 2025, kærði B lögmaður, f.h. A, til úrskurðarnefndar velferðarmála drátt á afgreiðslu Sjúkratrygginga Íslands á umsókn hans um bætur úr sjúklingatryggingu.

I. Málsatvik og málsmeðferð

Kærandi sótti um bætur úr sjúklingatryggingu með umsókn sem barst Sjúkratryggingum Íslands 7. september 2023.

Kæra barst úrskurðarnefnd velferðarmála 14. ágúst 2025. Með bréfi, dags. 20. ágúst 2025, óskaði úrskurðarnefnd eftir greinargerð Sjúkratrygginga Íslands ásamt gögnum málsins. Greinargerð stofnunarinnar barst með bréfi, dags. 3. september 2025, og var hún send lögmanni kæranda til kynningar með bréfi úrskurðarnefndar, dags. 4. september 2025. Athugasemdir bárust frá lögmanni kæranda með bréfi, dags. 5. september 2025, og voru þær sendar Sjúkratryggingum Íslands til kynningar með bréfi, dags. 9. september 2025. Viðbótargreinargerð barst frá Sjúkratryggingum Íslands með bréfi, dags. 22. september 2025. Hún var send lögmanni kæranda til kynningar með bréfi úrskurðarnefndar, dags. 23. september 2025. Frekari athugasemdir bárust ekki.

II. Sjónarmið kæranda

Kærandi fer fram á að úrskurðað verði að óhæfileg töf hafi orðið á afgreiðslu málsins hjá Sjúkratryggingum Íslands og að hafi málið ekki enn verið tekið til meðferðar hjá stofnuninni að úrskurðað verði að Sjúkratryggingum Íslands beri skylda til þess að taka málið til meðferðar.

Í kæru er greint frá því að kærandi byggi kröfu sína á að óhæfileg töf hafi orðið á afgreiðslu málsins hjá Sjúkratryggingum Íslands. Málið hafi verið tilkynnt til stofnunarinnar þann 7. september 2023. Fyrirspurnarbréf og ítrekanir hafi verið sendar 29. september 2023, 10. desember 2024 og 15. apríl 2024. Engum þessara bréfa hafi verið svarað.

Ekki þurfi að rökstyðja það nánar að Sjúkratryggingar Íslands hafi ekki farið að lögum í þessu máli hvað þessi atriði málsins varði. Þessi töf og svarleysi sé vitaskuld ekki í samræmi við reglu stjórnsýsluréttar um málshraða og regluna um svarskyldu stjórnvalda.

Kærandi byggi á að afgreiðsla málsins geti með engum hætti verið í samræmi við meginreglu 9. gr. stjórnsýslulaga nr. 37/1993 og svarreglu stjórnsýsluréttar.

Um rökstuðning fyrir því að Sjúkratryggingar Íslands eigi að taka málið til meðferðar sé vísað til matsgerðar C bæklunarskurðlæknis, dags. 4. nóvember 2024, þar sem segi meðal annars:

„Tekið skal fram, að í þumalfingri hvers manns eru þrjú bein. Eitt af þessum beinum í hægri þumalfingri tjónþola brotnaði í slysi 23.6.2022.“ Reynt hafi verið að láta brotið gróa með aðgerðum á Landspítala, en það hafi ekki tekist, samanber eftirfarandi.

Á bls. 5 í matsgerðinni sé lýst niðurstöðu röntgenmyndar en þar segi: Í basi á os metacarpus I er ótilfært intraarticulert skábrot ulnart.“

Röntgenmyndin hafi verið tekin 28. júní 2022. Þetta sé brotið sem hafi orðið í slysi þann 23. júní 2022.

Á bls. 6 í matsgerðinni segi að þann 30. júní 2022 hafi verið gerð aðgerð á göngudeild bæklunarskurðdeildar. Brotið hafi verið fest með pinnum. Gifs. Áætlaður gifstími sé fimm vikur. Tekið er fram að aðgerðarlýsing hafi ekki fengist um aðgerðina 30. júní 2022.

Á bls. 7 í matsgerðinni sé færsla frá 26. júlí 2022 þar sem segi: X ára maður með 3 og hálfs vikna gamla Bennet fracturu sem hafi verið pinnuð af D. Kemur nú vegna þess að annar pinninn hafi runnið út og á röntgenmynd sjáist að hinn sé brotinn.

Á bls. 7 í matsgerðinni segi í færslu frá 4. ágúst 2022 að sérstaklega athyglisverð við röntgenmyndir sem teknar hafi verið þann dag, og sambærilegt hafi sést á síðustu myndum, sé að annar pinninn sem hafi leitað út sé brotinn og sitji hér enn í trapezium og aðeins óljóst sé af myndum að dæma hvort hann sitji innan eða utan CMC liðarins.

Á bls. 9 í matsgerðinni segi þann 9. september 2022 að gerð hafi verið aðgerð vegna Bennets brots hjá kæranda 30. júní 2022. Pinnin hafi síðan brotnað, hafi verið tekinn og hlutinn sem eftir hafi verið inni hafi verið látinn eiga sig þar sem hann hafi legið inni í trapezium.

Röntgenmynd hafi sýnt að pinninn liggi inni í beininu, alveg við liðkantinn á CMC: I liðnum. Sneiðmynd hafi verið tekin sem sýni að þar séu komnar beinbreytingar volart sem samrýmst geti slitgigt og svona irritation.

Á bls. 10 í matsgerðinni komi fram að 15. september 2022 hafi verið gerð staurliðsaðgerð á hægri þumli. Gerð hafi verið artrodesu á Carpomertacarpal lið I (CMC lið). Í vottorði E segi að staurliðsaðgerðin hafi verið gerð þar sem beinendar hafi ekki gróið saman.

Á bls. 13 í matsgerð komi fram í bréfi frá F bæklunarskurðlækni 11. maí 2023 að því miður sé arthrodesan ekki gróin og hann sjái eiginlega engan annan möguleika en að gera aðgerð aftur á þessu og reyna að gera það sem fyrst.

Á bls. 14 í matsgerð komi fram að þann 28. júní 2023 hafi verið gerð aðgerð og gerð hafi verið ný arthrodesa. Þann 14. ágúst 2023 komi fram að brotið hafi ekki gróið.

Á bls. 15 í matsgerð segi þann 25. október 2023 að fram komi á myndum að brotið sé enn ógróið.

Á bls. 15 og 16 í matsgerðinni segi í færslu frá 30. apríl 2024 að fram komi á myndum að brotið sé enn ógróið.

Í athugasemdum kæranda við greinargerð Sjúkratrygginga Íslands segir að þar komi fram að kærandi hafi tilkynnt meintan sjúklingatryggingaratburð þann 7. september 2023. Samkvæmt greinargerðinni hafi ekki annað verið gert í málinu en að biðja um sjúkraskrá frá Landspítala, sem sé ekki tímafrekt verk. Ekki hafi verið meira gert á tveimur árum, en það gangi vitaskuld ekki. Hér sé um að ræða mikla óvirðingu við þann sjúkling, sem sé að leita réttar síns, sem sé stjórnarskrárvarinn.

Fram komi í greinargerð Sjúkratrygginga Íslands að málið hafi verið sent til læknis, sem gefa myndi álit í málinu. Ekki sé upplýst um hvaða læknir það sé, en að það geti tekið nokkurn tíma að bíða eftir álitinu.

Síðan fari málið til mats hjá „fagteyminu“ fræga, sem aldrei sé upplýst hverjir skipi, fyrr en mál þessi séu komin fyrir dóm. Þar séu mál yfirleitt í hálft ár eða lengur.

Einnig sé augljóst að hér sé um mikinn kostnað fyrir ríkið að ræða og ákveðnir aðilar fái háar fjárhæðir fyrir vinnu sína hjá Sjúkratryggingum Íslands, oftast læknar. Þá sé einnig augljóst að þeir geti ekki verið hlutlausir matslæknar. Vinna þeirra verði samkvæmt þeim að koma Sjúkratryggingum Íslands til góða og vera stofnuninni í hag.

Þessi mál taki yfirleitt meira en þrjú ár hjá Sjúkratryggingum Íslands. Það gefi auga leið að með þessu séu réttindi viðkomandi sjúklings fótum troðin.

Að bíða þurfi þrjú ár eða oftast lengur eftir niðurstöðu Sjúkratrygginga Íslands um það hvort um bótaskyldu samkvæmt 2. gr. laga nr. 111/2000 sé að ræða, þegar fyrningartíminn sé t.d. fjögur ár geti ekki gengið og sé ólíðandi. Einnig verði að horfa til þess í þessu sambandi að þak sé á bótum Sjúkratrygginga Íslands og oft komi til að stefna þarf íslenska ríkinu til vara. Verði það oft mjög erfitt vegna þessa kerfis, sem virðist sett upp með ákveðinn tilgang í huga.

Þessi framkvæmd sé gróft brot á málshraðareglu stjórnsýslulaga og stjórnsýsluréttar og vitaskuld andmælaréttinum og upplýsingaréttinum og brot á réttmætisreglunni og lögmætisreglunni.

Einnig hvíli leynd yfir afgreiðslunni og framkvæmd mála. Ljóst sé að hér sé um að ræða geðþóttaákvörðun Sjúkratrygginga Íslands sem verði að vinda ofan af.

III. Sjónarmið Sjúkratrygginga Íslands

Í greinargerð Sjúkratrygginga Íslands segir að kærandi hafi sótt um bætur úr sjúklingatryggingu samkvæmt þágildandi lögum nr. 111/2000 með umsókn sem hafi borist stofnuninni þann 7. september 2023. Kæra varði málshraða hjá stofnuninni, en umsókn kæranda um bætur úr sjúklingatryggingu hafi ekki verið afgreidd.

Þann 7. september 2023 hafi borist tölvupóstur frá lögmanni kæranda með umsókn um bætur úr sjúklingatryggingu auk fylgigagna. Stofnunin hafi birt bréf, dags. 11. september 2023, í gagnagátt lögmanns og réttindagátt kæranda þar sem fram hafi komið að umsókn um bætur úr sjúklingatryggingu væri móttekin ásamt því að gerð hafi verið grein fyrir málsmeðferð hjá stofnuninni. Í bréfinu hafi jafnframt verið óskað eftir undirritaðri umsókn til þess að unnt væri að hefja gagnaöflun og hafi hún borist frá lögmanni kæranda degi síðar. Þann 19. desember 2023 hafi Sjúkratryggingar Íslands óskað eftir gögnum frá Landspítala, annars vegar greinargerð meðferðaraðila og hins vegar afrit af færslum úr sjúkraskrá. Afrit af færslum úr sjúkraskrá frá Landspítala hafi borist stofnuninni þann 27. maí 2024 og greinargerð meðferðaraðila þann 12. febrúar 2025.

Þegar umbeðin gögn hafi borist hafi gagnaöflun verið lokið og þann 21. mars 2025 hafi mál kæranda verið sent til læknis til yfirferðar. Læknir hafi skilað minnisblaði vegna málsins þann 29. maí 2025 og bíði málið þess nú að vera tekið fyrir á fundi fagteymis Sjúkratrygginga Íslands sem skipað sé læknum og lögfræðingum stofnunarinnar.

Í 1. mgr. 9. gr. stjórnsýslulaga komi fram að ákvarðanir í málum skuli teknar svo fljótt sem unnt sé. Í 4. mgr. 9. gr. segi að dragist afgreiðsla máls óhæfilega sé heimilt að kæra það til þess stjórnvalds sem ákvörðun í málinu verði kærð til. Við mat á því hvenær telja beri að mál hafi dregist óhæfilega beri að líta til þess hve langan tíma afgreiðsla sambærilegra mála taki almennt.

Fram kemur að umsóknir um bætur úr sjúklingatryggingu hafi verið á bilinu 200 - 250 talsins ár hvert. Hver umsókn um bætur úr sjúklingatryggingu krefjist mikillar vinnu, gagnaöflunar, rannsóknar lækna og lögfræðinga og ritunar ákvörðunar. Velta þurfi við öllum steinum svo mál teljist rannsakað með fullnægjandi hætti. Því miður sé það svo að málsmeðferðartími sé almennt langur þegar komi að umsóknum um bætur samkvæmt lögum um sjúklingatryggingu. Bið eftir ákvörðun um bótaskyldu sé að jafnaði tólf til átján mánuðir frá því gagnaöflun sé lokið. Sérstaklega umfangsmikil mál gæti dregist lengur. Bið eftir mati á örorku sé að jafnað tólf til átján mánuðir frá ákvörðun bótaskyldu. Þessar upplýsingar komi fram á heimasíðu Sjúkratrygginga Íslands.

Að mati Sjúkratrygginga Íslands sé ekki unnt að fallast á að mál kæranda hafi dregist óhóflega. Fyrir liggi að umsókn kæranda hafi borist Sjúkratryggingum Íslands þann 7. september 2023, í kjölfarið hafi gagnaöflun byrjað, sem hafi lokið þegar greinargerð meðferðaraðila hafi borist, þann 12. febrúar 2025. Telji Sjúkratryggingar Íslands rétt að benda á að gagnaöflun geti tekið langan tíma og velti það á þeim heilbrigðisstofnunum sem kallað sé eftir gögnum frá, hversu fljótt gögn berist. Sjúkratryggingar Íslands reyni eftir fremsta megni að ýta á eftir því að gögnin berist, með ítrekunum, en engu að síður geti oft verið talsverð bið eftir gögnum. Í máli kæranda sé ljóst að það hafi tekið nokkurn tíma að fá umbeðin gögn frá Landspítala en stofnunin hafi sent ítrekun á Landspítala fjórum sinnum í tölvupósti, þann 21. maí 2024, 11. júlí 2024, 18. október 2024 og 8. janúar 2025.

Þegar gagnaöflun ljúki séu málin send til yfirferðar læknis og séu málin send til læknis í þeirri röð sem þau berast og fari biðin eftir fjölda þeirra mála sem bíði þess að vera yfirfarin af lækni. Rúmlega mánuði eftir að gagnaöflun hafi lokið hafi mál kæranda verið sent til yfirferðar læknis og um það bil tveimur mánuðum síðar hafi hann skilað minnisblaði vegna málsins. Mál kæranda bíði þess nú að vera tekið fyrir á fundi fagteymis. Mál í sjúklingatryggingu séu misjöfn og geti verið mikill munur á umfangi þeirra. Sjúkratryggingar Íslands hafi litið svo á að rétt sé að afgreiða þau mál sem taka þurfi fyrir fund fagteymis í þeirri röð sem þau berist, óháð umfangi málsins. Málið verði tekið fyrir á fundi fagteymis svo unnt sé að taka ákvörðun um bótarétt sem standist kröfu stjórnsýslulaga um fullnægjandi rannsókn og rökstuðning. Ákvörðun um bótaskyldu sé tekin á fundi fagteymisins, sem skipað sé læknum og lögfræðingum Sjúkratrygginga Íslands, þar sem minnisblað læknis sé haft til hliðsjónar ásamt öðrum gögnum málsins. Að mati stofnunarinnar hafi mál kæranda ekki dregist óhóflega hjá stofnuninni og sé í samræmi við afgreiðslu sambærilegra mála.

Í kæru komi fram að lögmaður kæranda hafi sent stofnuninni fyrirspurnarbréf og ítrekanir en að engum af þessum bréfum hafi verið svarað. Sjúkratryggingar Íslands bendi á að stofnuninni hafi borist erindi frá lögmanni kæranda með ýmsum leiðum, s.s. í gagnagátt, tölvupósti og bréfpósti, og verði ekki annað séð en að fyrirspurnum lögmanns hafi verið svarað í hvert skipti.

Þann 18. desember 2023 hafi borist tölvupóstur frá lögmanni kæranda með viðhengi og hafi meðal annars verið að óska eftir upplýsingum um stöðu máls. Stofnunin hafi svarað lögmanni degi síðar og hafi hann verið upplýstur um að málið væri tilbúið í gagnaöflun sem ætti að hefjast á allra næstu dögum. Þá myndi berast afrit af gagnabeiðnum inn á gagnagátt umboðsmanns og réttindagátt kæranda. Afrit af gagnabeiðni til Landspítala hafi verið birt í gáttum umboðsmanns og umsækjanda þann 19. desember 2023.

Þann 30. september 2024 hafi borist tölvupóstur frá lögmanni kæranda þar sem óskað hafi verið eftir upplýsingum um stöðu máls. Þá hafi borist erindi með bréfpósti og verið móttökustimplað þann 1. október 2024, og hafi þar einnig verið óskað eftir upplýsingum um hvar málið væri statt. Erindum þessum hafi verið svarað með tölvupósti til lögmanns þann 4. október 2024 þar sem fram hafi komið:

„Vegna fyrirspurnar um stöðu máls 10107 sem barst í pósti þann 01.10. sl. frá þér þá er staðan sú að málið er enn í gagnaöflun og búið að ítreka beiðni um greinargerð frá LSH tvisvar sinnum og við förum að ítreka í þriðja sinnið.“

Þann 15. apríl 2024 hafi borist annað erindi frá lögmanni kæranda í gegnum gagnagátt. Með erindinu hafi verið óskað eftir upplýsingum um hvar málið væri statt. Sama erindi hafi borist með bréfpósti og verið móttökustimplað þann 23. apríl 2025. Þá hafi einnig borist erindi í gegnum samskiptakerfi Sjúkratrygginga Íslands (Zendesk) þann 15. apríl 2025 þar sem lögmaður hafi sent stofnuninni gögn málsins og einnig óskaði eftir upplýsingum um stöðu máls. Stofnunin hafi svarað þessum erindum í gegnum Zendesk þann 23. apríl 2025 þar sem fram hafi komið:

„Mál 10107 er þannig statt nú að það er nýlega farið í yfirferð hjá lækni og ekki hægt að segja til um það nákvæmlega hve langan tíma læknirinn tekur í það – þegar því er lokið tekur við bið eftir að vera tekið fyrir hjá Fagteymi en þar er nokkuð löng bið, a.m.k. einhverjir mánuðir.“

Í viðbótargreinargerð Sjúkratrygginga Íslands segir að í athugasemdum kæranda sé því haldið fram að ekkert hafi annað verið gert í málinu til dagsins í dag en að biðja um sjúkraskrá frá Landspítala. Stofnunin vilji því benda á, eins og fram hafi komið í fyrri greinargerð stofnunarinnar, að búið sé að afla sjúkraskrárgagna frá Landspítala auk greinargerðar. Þar að auki hafi málið verið sent til yfirferðar læknis. G bæklunarlæknir hafi útbúið minnisblað í málinu sem hafi borist stofnuninni þann 28. maí 2025.

Málið bíði þess nú að vera tekið fyrir á fundi fagteymis, þar sem tekin sé ákvörðun um bótaskyldu og verði minnisblað haft til hliðsjónar ásamt öðrum gögnum málsins. Sem stjórnvald taki Sjúkratryggingar Íslands ákvörðun um bótaskyldu á fundi fagteymis og bindi þar minnisblað eða önnur gögn ekki hendur stofnunarinnar. Sjúkratryggingar Íslands hafi litið svo á að rétt sé að afgreiða þau mál sem taka þurfi fyrir fund fagteymis, í þeirri röð sem þau berast, óháð umfangi málsins. Sjálfsagt sé að veita upplýsingar um hverjir hafi setið fund fagteymis þegar fundur hafi farið fram en að venju sé fundur fagteymis skipaður læknum og lögfræðingum stofnunarinnar.

IV. Niðurstaða

Mál þetta varðar afgreiðslu Sjúkratrygginga Íslands á umsókn kæranda um bætur úr sjúklingatryggingu sem barst Sjúkratryggingum Íslands 7. september 2023. Afgreiðsla málsins er kærð á grundvelli 4. mgr. 9. gr. stjórnsýslulaga nr. 37/1993.

Í 1. mgr. 9. gr. stjórnsýslulaga kemur fram að ákvarðanir í málum skulu teknar svo fljótt sem unnt er. Í 4. mgr. 9. gr. segir svo að dragist afgreiðsla máls óhæfilega sé heimilt að kæra það til þess stjórnvalds sem ákvörðun í málinu verður kærð til.

Samkvæmt gögnum málsins var sótt um bætur úr sjúklingatryggingu með umsókn sem barst Sjúkratryggingum Íslands 7. september 2023. Sjúkratryggingar Íslands óskuðu eftir gögnum frá Landspítala og bárust afrit af færslum úr sjúkraskrá frá Landspítala 27. maí 2024 og greinargerð meðferðaraðila 12. febrúar 2025 og var þá gagnaöflun lokið. Þann 21. mars 2025 var málið sent lækni til yfirferðar og skilaði hann minnisblaði þann 29. maí 2025. Málið bíður þess að vera tekið fyrir á fundi fagteymis Sjúkratrygginga Íslands. Fagteymið er skipað læknum og lögfræðingum stofnunarinnar og tekur ákvörðun um bótaskyldu.

Samkvæmt því, sem rakið hefur verið hér að framan liðu rúmlega þrír mánuðir frá því umsókn barst Sjúkratryggingum Íslands þar til Sjúkratryggingar Íslands óskuðu eftir gögnum frá Landspítala. Þá barst sjúkraskrá rúmlega fimm mánuðum eftir að umsókn barst Sjúkratryggingum Íslands og greinargerð meðferðaraðila barst stofnuninni þegar tæplega fjórtán mánuðir voru liðnir frá þeim tíma. Þegar öll gögn málsins lágu fyrir þann 12. febrúar 2025 leið rúmur mánuður þar til málið var sent lækni Sjúkratrygginga Íslands til yfirferðar og mats á bótaskyldu og hann útbjó síðan minnisblað í málinu rúmlega tveimur mánuðum eftir það. Frá því að minnisblað læknisins lá fyrir eru liðnir rúmlega sex mánuðir án þess að málið sé afgreitt. Nú eru liðnir um tíu mánuðir frá því að öll gögn höfðu borist í málinu og 27 mánuðir frá því að umsókn barst Sjúkratryggingum Íslands þann 7. september 2023.

Samkvæmt upplýsingum í greinargerð Sjúkratrygginga Íslands tekur afgreiðsla sambærilegra mála hjá stofnuninni almennt tólf til átján mánuði frá því að gagnaöflun er lokið en í greinargerðinni er ekki að finna upplýsingar um hver heildarafgreiðslutími slíkra mála sé að jafnaði. Í bréfi stofnunarinnar til lögmanns kæranda, dags. 11. september 2023, er tilgreint að búast megi að jafnaði við að niðurstaða um bótaskyldu liggi fyrir innan tólf til átján mánaða frá því að umsókn berst. Ljóst er að niðurstaða liggur ekki enn fyrir tíu mánuðum eftir að gagnaöflun lauk og 27 mánuðum eftir að umsókn um bætur úr sjúklingatryggingu barst stofnuninni. Að mati úrskurðarnefndarinnar getur meðalmálsmeðferðartími sambærilegra mála einn og sér ekki verið viðmið við mat á því hvort afgreiðsla máls hafi dregist óhæfilega heldur þarf að fara fram sjálfstætt mat þar sem litið er til atvika máls, eðli þess og umfangs, sem og hvort um mikilsverða hagsmuni aðila sé að ræða.

Í ljósi þess að rúmlega þrír mánuðir liðu frá því að umsókn barst og þar til Sjúkratryggingar Íslands óskuðu eftir gögnum frá Landspítala, tæplega fjórtán mánuðir liðu síðan þar til öll umbeðin gögn bárust, rúmur mánuður leið þar til málið var sent lækni til yfirferðar, rúmlega tveir mánuðir liðu þar til læknir gerði minnisblað í málinu og rúmlega sex mánuðir eru liðnir eftir það og málið hefur ekki enn verið afgreitt, telur úrskurðarnefnd að afgreiðsla málsins hafi dregist óhæfilega og að afgreiðsla þess hafi því ekki verið í samræmi við 1. mgr. 9. gr. stjórnsýslulaga. Það breytir engu um þá niðurstöðu að hinn langa málsmeðferðartíma megi rekja til mikils fjölda umsókna um bætur úr sjúklingatryggingu, sem krefjist mikillar vinnu, gagnaöflunar, rannsóknar lækna og lögfræðinga og ritunar ákvörðunar.

Þar sem mál lýtur að því hvort afgreiðsla Sjúkratrygginga Íslands á umsókn kæranda um bætur úr sjúklingatryggingu hafi dregist óhæfilega telur úrskurðarnefndin ekki tilefni til að fjalla um önnur málsrök kæranda, s.s. hvort brotið hafi verið gegn andmælarétti, upplýsingarétti, réttmætisreglu og lögmætisreglu, en slík atriði geta eftir atvikum komið til skoðunar hjá úrskurðarnefndinni í kærumáli vegna hinnar endanlegu stjórnvaldsákvörðunar.

Það er því niðurstaða úrskurðarnefndar velferðarmála að dráttur á afgreiðslu Sjúkratrygginga Íslands í máli kæranda vegna umsóknar hans um bætur úr sjúklingatryggingu sé ekki í samræmi við málshraðareglu 9. gr. stjórnsýslulaga nr. 37/1993. Lagt er fyrir Sjúkratryggingar Íslands að hraða afgreiðslu málsins.

 

Ú R S K U R Ð A R O R Ð

Dráttur á afgreiðslu Sjúkratrygginga Íslands í máli A, vegna umsóknar hans um bætur úr sjúklingatryggingu, er ekki í samræmi við málshraðareglu 9. gr. stjórnsýslulaga nr. 37/1993. Lagt er fyrir Sjúkratryggingar Íslands að hraða afgreiðslu máls kæranda.

F.h. úrskurðarnefndar velferðarmála

Kári Gunndórsson