Mælaborð um aðgerðir í geðheilbrigðismálum

Heilbrigðisráðuneytið vinnur að framkvæmd aðgerðaáætlunar í geðheilbrigðismálum fyrir árin 2023–2027, sem byggir á samþykktri stefnu í geðheilbrigðismálum til ársins 2030. Í aðgerðaáætluninni eru skilgreindar 27 aðgerðir sem miða að því að efla geðheilbrigðisþjónustu, auka aðgengi og stuðla að heildstæðri og notendamiðaðri þjónustu. Til að auka gagnsæi og aðgengi að upplýsingum um framgang aðgerðanna hefur ráðuneytið sett upp mælaborð geðheilbrigðismála. Mælaborðið veitir yfirsýn yfir stöðu verkefna, helstu mælikvarða og framvindu og er ætlað almenningi og fagfólki sem vilja fylgjast með þróun í málaflokknum.

• Aðgerðir í geðheilbrigðismálum - mælaborð

Mikilvægt er að líta á aðgerðaáætlunina sem heildstæða og samþætta, þar sem aðgerðir tengjast og hafa áhrif hver á aðra, bæði innan einstakra áhersluþátta og á milli þeirra. Markvisst innleiðingarferli liggur til grundvallar í aðgerðaáætluninni og verður aðgerðum komið til framkvæmda í áföngum. Viðameiri aðgerðir byggja á hefðbundnu flæði verkefna og er þeim gjarnan skipt upp í undirbúning, framkvæmd, mat og eftirfylgd.

Þróunaraðgerðum, þar sem unnið er nánar með flókin úrlausnarefni á borð við hlutverk, verkefni, samfellu og samhæfingu innan geðheilbrigðisþjónustu sem og við aðra velferðarþjónustu, er forgangsraðað. Þá er fjölgun fagfólks og bætt mönnun grundvöllur þess að hægt sé að ráðast í frekari þróun og nauðsynlegar breytingar í geðheilbrigðismálum. Aðgerðir sem lúta að geðrækt, forvörnum og snemmtækum inngripum hjá börnum og ungu fólki, sem og aukin aðkoma notenda að skipulagi og starfi geðheilbrigðisþjónustunnar, eru einnig í forgangi til framkvæmda.