Mál nr. 110/2025 - Úrskurður

KÆRUNEFND HÚSAMÁLA

ÚRSKURÐUR

uppkveðinn 2. mars 2026

í máli nr. 110/2025

A

gegn

B

 

Kærunefndina skipa í þessu máli Auður Björg Jónsdóttir lögmaður, Þorvaldur Hauksson lögmaður og Eyþór Rafn Þórhallsson verkfræðingur. 

Aðilar málsins eru:

Sóknaraðili: A

Varnaraðilar: B

Krafa sóknaraðila er að viðurkennt verði að varnaraðilum beri að greiða leigu vegna tímabilsins 10.-31. júlí 2025.

Varnaraðilar krefjast þess að kröfu sóknaraðila verði hafnað.

Eftirtalin gögn voru lögð fyrir kærunefnd:

Kæra sóknaraðila, dags. 21. ágúst 2025.

Greinargerð varnaraðila, dags. 26. ágúst 2025.

Athugasemdir sóknaraðila, dags. 2. september 2025.

Athugasemdir varnaraðila, dags.  13. september 2025.

I. Helstu málsatvik og ágreiningsefni

Aðilar gerðu tímabundinn leigusamning frá 10. júlí 2025 til 31. ágúst 2025 um leigu varnaraðila á íbúð sóknaraðila að C. Ágreiningur er um kröfu sóknaraðila um að varnaraðilar greiði leigu vegna tímabilsins 10.-31. júlí 2025.

II. Sjónarmið sóknaraðila

Sóknaraðili kveður aðila hafa undirritað leigusamninginn 3. júlí 2025. Varnaraðilar hafi samþykkt að leigja íbúðina í júlímánuði á þeirri forsendu að greiða 220.000 kr. fyrir þann mánuð og síðan 330.000 kr. fyrir ágúst. Þrátt fyrir samþykki og undirritun leigusamningsins hafi þau ákveðið samdægurs eftir afhendingu að hætta við leiguna á grundvelli ófullnægjandi ástands íbúðarinnar. Þau hafi talið að íbúðin væri óhrein og húsgögnin notuð en þau hafi valið að leigja íbúðina með húsgögnum. Aldrei hafi þó verið sagt að húsgögnin væru ný eða ónotuð en þau hafi verið í góðu lagi og í nákvæmlega sama ástandi og þegar íbúðin hafi verið sýnd í gegnum Whatsapp 29. júní 2025. Þá hafi sóknaraðila tekist að takmarka tjón sitt með því að koma íbúðinni í útleigu á ný frá 1. ágúst 2025.

III. Sjónarmið varnaraðila

Varnaraðilar kveðast hafa uppgötvað þegar þau hafi mætt í íbúðina að kvöldi 10. júlí 2025 að þvagblettir væru á rúminu og sófinn blettóttur. Þau hafi þegar farið fram á að sóknaraðili myndi skipta dýnunni út eða að þau fengju endurgreitt. Sóknaraðili hafi fengið myndir sendar og síðan mætt í íbúðina og staðfest að dýnan og sófinn væru ónothæf. Hann hafi neitað að skipta dýnunni út en beðið um bankaupplýsingar og kennitölu varnaraðila og í framhaldinu endurgreitt tryggingarféð og helming leigu vegna júlímánaðar eða 110.000 kr. Hann hafi síðan upplýst að hann hygðist halda eftirstöðvum leigunnar eftir, eða 110.000 kr., vegna riftunar á samningnum. Varnaraðilar hafi ekki mótmælt því þrátt fyrir að hafa ekki gist eina nótt í íbúðinni.

Þegar sóknaraðili hafi sýnt þeim húsgögnin í gegnum Whatsapp hafi þau samþykkt að leigja íbúðina með húsgögnum en gert ráð fyrir því að þau væru nothæf. Þeim hafi hreinlega boðið við rúminu og sófanum. Þau hafi fundið aðra íbúð 16. júlí en fram að því hafi þau þurft að gista á nokkrum mismunandi stöðum með tilheyrandi kostnaði. Þau hafi ekki lagt inn kæru vegna þeirrar fjárhæðar sem sóknaraðili hafi haldið eftir.

Varnaraðilar hafi treyst því að sóknaraðili kæmi ekki til að með að leigja þeim íbúð í téðu ástandi. Þau hafi sagt við sóknaraðila að ef hann myndi skipta út dýnunni gætu þau séð um að þrífa restina af íbúðinni en hann hafi valið að endurgreiða þeim tryggingarféð og hluta leigunnar. Krafa sóknaraðila sé ósanngjörn. Þau hafi þurft að greiða fyrir hótel á meðan þau hafi verið að leita að annarri íbúð. Þá hafi það ekki átt að taka langan tíma að koma íbúðinni aftur í leigu miðað við leigumarkaðinn hér.

IV. Athugasemdir sóknaraðila

Í athugasemdum sóknaraðila segir að húsgögn sem hafi fylgt íbúðinni hafi verið nýtt af fyrri leigjendum án athugasemda. Það að á dýnunni hafi verið blettir hafi ekki breytt því að hún hafi verið í nothæfu ástandi. Varnaraðilar hafi krafist riftunar skömmu eftir afhendingu en engin skilyrði riftunar hafi verið uppfyllt. Sóknaraðili hafi ekki samþykkt að varnaraðilar yrðu undanþegin greiðslu leigu fyrir júlímánuð eða að greiðsla að fjárhæð 110.000 kr. væri lok mála. Hann hafi áskilið sér rétt til að sækja frekari greiðslur yrði tjón hans meira vegna vanefnda varnaraðila. Hann hafi þegar gripið til aðgerða til að auglýsa íbúðina á ný og fundið leigjanda frá 1. ágúst.

V. Athugasemdir varnaraðila

Í athugasemdum varnaraðila segir að það sé alvarleg heilsufaráhætta fólgin í því að leiga húsgögnin í þessu ástandi þar sem þetta sé ekki frábrugðið óhreinu almenningssalerni. Ítrekað sé að varnaraðilar hafi fyrst lagt til að sóknaraðili myndi skipta dýnunni út en hann hafi hafnað því og sjálfur valið að rifta samningnum. Hann hafi millifært tryggingarféð og hluta leigunnar sjálfviljugur. 

VI. Niðurstaða           

Varnaraðilar tóku íbúðina á leigu frá 10. júlí 2025, en þau eru búsett erlendis og höfðu aðeins skoðað hana í gegnum myndsímtal. Þau höfðu þegar greitt tryggingarfé og leigu að fjárhæð 220.000 kr. vegna tímabilsins 10.-31. júlí 2025 er þau fengu eignina afhenda. Eftir að þau komu í íbúðina að kvöldi 10. júlí 2025 gerðu þau þegar athugasemdir við ástand hennar og fóru fram á að rúmdýnunni yrði skipt út eða að þau fengju endurgreitt. Rafræn samskipti aðila þetta kvöld sýna að sóknaraðili lagði til að hann myndi endurgreiða þeim tryggingarféð og leiguna en héldi eftir leigu vegna tímabilsins 1.-10. júlí þar sem hann hefði haldið íbúðinni fyrir þau. Komust þau að samkomulagi um þetta og framkvæmdi sóknaraðili millifærsluna þegar um kvöldið. Engir fyrirvarar voru á þessu samkomulagi og gerði sóknaraðili fyrst frekari kröfu á hendur varnaraðilum með kæru sinni í máli þessu. Telur kærunefnd að sóknaraðili sé bundinn af téðu samkomulagi og því engin efni til að fallast á kröfu hans í málinu.

Í 7. mgr. 85. gr. húsaleigulaga er kveðið á um að úrskurðir kærunefndar húsamála séu bindandi gagnvart málsaðilum og sæti ekki kæru til æðra stjórnvalds. Málsaðilum sé heimilt að bera úrskurði nefndarinnar undir dómstóla innan átta vikna frá því að úrskurður sé kveðinn upp og frestast þá réttaráhrif hans uns dómur fellur.

 

 

ÚRSKURÐARORÐ:

Kröfu sóknaraðila er hafnað.

 

Reykjavík, 2. mars 2026

 

 

Auður Björg Jónsdóttir

 

 

Þorvaldur Hauksson                                 Eyþór Rafn Þórhallsson