Mál nr.. 806/2026-Úrskurður

Úrskurðarnefnd velferðarmála

Mál nr. 806/2025

Miðvikudaginn 25. mars 2026

A

gegn

Tryggingastofnun ríkisins

Ú R S K U R Ð U R

Mál þetta úrskurða Rakel Þorsteinsdóttir lögfræðingur, Eva Dís Pálmadóttir lögfræðingur og Kristinn Tómasson læknir.

Með kæru, dags. 11. desember 2025, kærði B félagsráðgjafi f.h. A, til úrskurðarnefndar velferðarmála ákvörðun Tryggingastofnunar ríkisins frá 11. september 2025 um upphafstíma örorkulífeyris.

I.  Málsatvik og málsmeðferð

Með umsókn, dags. 13. ágúst 2025, sótti kærandi um örorkulífeyri og tengdar greiðslur frá 1. ágúst 2023. Með bréfi Tryggingastofnunar, dags. 11. september 2025, var umsókn kæranda samþykkt frá 1. júlí 2025.

Kæra barst úrskurðarnefnd velferðarmála 11. desember 2025. Með bréfi, dags. 5. janúar 2026, óskaði úrskurðarnefnd eftir greinargerð Tryggingastofnunar ríkisins ásamt gögnum málsins. Með bréfi, dags. 29. janúar 2026, barst greinargerð stofnunarinnar og var hún send kæranda til kynningar með bréfi úrskurðarnefndar, dags. 3. febrúar 2026. Athugasemdir og viðbótargögn bárust frá kæranda með bréfi, dags. 18. febrúar 2026, og voru þær sendar Tryggingastofnun ríkisins til kynningar með bréfi úrskurðarnefndar, dags. 23. febrúar 2025. Efnislegar athugasemdir bárust ekki.

II.  Sjónarmið kæranda

Í kæru kemur fram að kærandi hafi með umsókn 13. ágúst 2025 sótt um örorkulífeyri frá 1. ágúst 2023. Í bréfi Tryggingastofnunar ríkisins, dags. 11. september 2025, komi fram að kærandi hafi uppfyllt skilyrði um örorkulífeyri frá 1. júlí 2025 og að upphafstíminn hafi verið miðaður við þegar staðfest hafi verið að möguleg frekari meðferð og endurhæfing væri fullreynd. Í bréfum, dags. 11. og 22. september 2025, komi ekki fram hvaða gögn hafi legið til grundvallar. Samkvæmt upplýsingum frá Tryggingastofnun í tölvupósti 26. nóvember 2025 hafi ákvörðunin verið byggð á svörum kæranda við spurningalista vegna færniskerðingar, sem hún hafi þurft aðstoð við að fylla út, greinargerð félagsráðgjafa, dags. 26. júní 2025, og læknisvottorði, dags. 23. júní 2025.

Í gögnum málsins komi ekki fram á hverju ákvörðun um upphafstíma örorkumatsins hafi verið byggð, þ.e. hvenær endurhæfingu hafi lokið og hún hafi verið talin fullreynd.

Kærandi hafi til margra ára glímt við mjög þungan vímuefnavanda eins og fram komi í gögnum málsins. Allar sjúkdómsgreiningar í læknisvottorði kæranda séu tengdar lyfjafíkn. Kærandi hafi áður sótt um örorkulífeyri með umsóknum 20. mars 2023 og 5. febrúar 2024 sem hafi verið synjað á þeim forsendum að endurhæfing væri ekki fullreynd, með bréfum dags. 12. apríl 2023 og 15. febrúar 2024. Kærandi hafi aldrei fengið greiddan endurhæfingarlífeyri en hún hafi ekki verið í ástandi til að vera í endurhæfingu sökum mikils vímuefnavanda. Kærandi hafi ítrekað reynt meðferðarúrræði og hafi ítrekað farið í meðferð vegna mikils fíknivanda. Eins og fram komi í greinargerð félagsráðgjafa, dags. 26. júní 2025 hafa „margar spítalainnlagnir og meðferðir verið reyndar í gegnum tíðina en þrátt fyrir mikla viðleitni hefur árangur ekki náðst þar sem meðferðarheldni og úthald er lítið vegna veikinda.“

Í athugasemdum kæranda, dags. 18. febrúar 2026, kemur fram að í greinargerð Tryggingastofnunar komi fram að upphafstími örorkulífeyris ætti að vera 1. júlí 2025 þar sem ekki hafi verið nefnt tímamark óvinnufærni í læknisvottorði, sem hafi fylgt umsókn, dags. 23. júní 2025. Stofnunin hafi því talið rétt að miða tímamarkið við þá skoðun sem læknisvottorðið hafi verið byggt á, þannig að upphafstími sé fyrsti dagur næsta mánaðar. Ef borin séu saman þau læknisfræðilegu gögn sem hafi fylgt umsókn 20. mars 2023 við þau gögn sem hafi fylgt með umsókn um örorku 13. ágúst 2025 og hafi verið samþykkt 11. september 2025 sé ljóst að engin breyting hafi orðið á aðstæðum kærandi frá umsókn hennar 20. mars 2023.

Þar sem kærandi hafi sótt um tvö ár aftur í tímann og engin efnislegur munur sé á læknisvottorðum hefði Tryggingstofnun átt að miða gildistíma örorkumatsins við 1. ágúst 2023 eða tvö ár aftur í tímann frá umsókn. Stofnunin sé með eldri gögn um kæranda, læknisvottorð, dags. 11. apríl 2024 og 31. mars 2023, þar sem fram komi að hún hafi glímt við alvarlegan fíknvanda til margra ára og hafi ítrekað reynt meðferðir á C án árangurs. Af gögnum málsins sé ljóst að hún hafi árum saman verið of veik til að geta stundað endurhæfingu.

Með vísan í framangreint verði að telja að Tryggingastofnun hafi tekið ákvörðun um að miða tímamark við óvinnufærni án þess að nægar upplýsingar um tímamark óvinnufærni hafi legið fyrir og þannig brotið rannsóknarreglu stjórnsýslulaga sem kveði á um að stjórnvald skuli sjá til þess að mál sé nægjanlega upplýst áður en ákvörðun sé tekin í því. 

III.  Sjónarmið Tryggingastofnunar ríkisins

Í greinargerð Tryggingastofnunar ríkisins kemur fram kæra varði umsókn um örorkulífeyri sem hafi verið samþykkt með bréfi, dags. 22. september 2025, með gildistíma frá 1. júlí 2025. Gerð sé athugasemd við að matið nái ekki lengra aftur í tímann.

Umsókn kæranda um örorkulífeyri hafi borist 13. ágúst 2025 og því verði farið um hana eftir lögum nr. 100/2007 um almannatryggingar eins og þau hafi verið fyrir 1. september 2025.

Upphafstími örorkulífeyris miðist við þann tíma þegar umsækjandi sé metinn til a.m.k. 75% örorku til langframa vegna læknisfræðilega viðurkenndra sjúkdóma eða fötlunar, sbr. 1. mgr. 25. gr. laga um almannatryggingar.

Tryggingstofnun meti upphafstíma örorkulífeyris sem sé matskennd stjórnvaldsákvörðun sem m.a. sé byggð á læknisfræðilegu mati.

Greiðslur örorkulífeyris séu reiknaðar frá fyrsta degi næsta mánaðar eftir að greiðsluréttur sé fyrir hendi, sbr. 1. mgr. 32. gr. laga um almannatryggingar. Þó skuli greiðslur aldrei ákvarðaðar lengra aftur í tímann en tvö ár frá því að Tryggingastofnun berist umsókn og nauðsynleg gögn til að taka ákvörðun um rétt til greiðslna og fjárhæð þeirra, sbr. 4. mgr. 32. gr. sömu laga.

Heimilt sé að setja það skilyrði að umsækjandi gangist undir sérhæft mat á möguleikum til endurhæfingar og taki þátt í viðeigandi endurhæfingu áður en til örorkumats komi, sbr. 2. mgr. 25. gr. laga um almannatryggingar og 7. gr. laga nr. 99/2007 um félagslega aðstoð. Það þýði að endurhæfing þurfi að vera fullreynd áður en örorkumat fari fram. Reglugerð nr. 379/1999 um örorkumat fjalli nánar um framkvæmd örorkumats og skilyrði fyrir greiðslu örorkulífeyris.

Málið varði upphafstíma örorkulífeyris. Kærandi sé greind með fíknisjúkdóma (F19.2 og F11) og hafi sótt um örorkulífeyri tvö ár aftur í tímann, frá 1. ágúst 2023.

Læknar Tryggingastofnunar hafi talið rétt að samþykkja umsókn um örorkulífeyri, en hafi hins vegar talið að upphafstími örorkulífeyris ætti að vera 1. júlí 2025. Niðurstaðan sé byggð á læknisvottorði sem hafi fylgt umsókn, dags. 23. júní 2025. Í lið 14 í læknisvottorðinu sé hakað við að kærandi sé óvinnufær, en ekki sé nefnt tímamark óvinnufærni. Talið hafi verið rétt að miða tímamark óvinnufærni við þá skoðun sem læknisvottorðið sé byggt á, s.s. 23. júní 2025, þannig að upphafstími sé fyrsti dagur næsta mánaðar.

Taka verði tillit til þess að umsókn um örorkulífeyri hafði verið synjað 15. febrúar 2024 á þeim grundvelli að endurhæfing væri ekki fullreynd. Í synjunarbréfinu segi: „Umsækjandi hefur ekki fengið endurhæfingarlífeyri hjá Tryggingastofnun. Glímir við alvarlegan fíknivanda og mun vera á biðlista eftir því að komast inn á C. Nauðsynlegt er að láta reyna á frekari meðferð og endurhæfingu m.a. í ljósi ungs aldurs umsækjanda.“

Í tilvikum fíknisjúkdóma sé jafnan mjög á reiki hvenær endurhæfing teljist fullreynd. Ekki hafi verið talið nægjanlegt að sýna fram á að umsækjendur geti ekki stundað endurhæfingu sökum fíknar, því að gera megi kröfu um að þeir reyni að ná tökum á fíkn sinni til að stunda tilhlýðilega endurhæfingu.

Kærandi hafi sótt um endurhæfingarlífeyri í kjölfar synjunar 2024. Í læknisvottorði sem hafi fylgt þeirri umsókn sé eftirfarandi tekið fram í samantekt: „Alvarlegur fíknsjúkdómur verið til staðar lengi og óvíst hvort hún muni ná sér upp úr því. Er í skaðaminnkandi úrræði SÁÁ og á biðlista eftir meðferð á C.“ Kæranda hafi verið synjað um endurhæfingarlífeyri á eftirfarandi grundvelli: „Við skoðun máls þykja ekki rök fyrir að meta endurhæfingartímabil þar sem virk starfsendurhæfing telst vart vera í gangi eins og er. Greiðslur endurhæfingarlífeyris taka ekki eingöngu mið af því tímabili sem viðkomandi er óvinnufær heldur þarf starfsendurhæfing að vera hafin. Umsækjandi uppfyllir því ekki skilyrði fyrir veitingu endurhæfingarlífeyris sbr. 7. gr. laga nr. 99/2007, um félagslega aðstoð.“

Synjun um endurhæfingarlífeyri hafi þannig ekki orsakast af mati um að endurhæfing væri fullreynd heldur á því að virk starfsendurhæfing hafi ekki verið talin hafa verið í gangi með fullnægjandi hætti.

Það sé því ljóst að Tryggingastofnun hafi ekki getað miðað við annan upphafstíma en dagsetningu læknisskoðunar í vottorði sem hafi fylgt umsókn 13. ágúst 2025. 

Í ljósi alls framangreinds sé niðurstaða Tryggingastofnunar sú að afgreiðslan á umsókn kæranda sé í senn lögmæt og málefnaleg. Fyrir nefndinni fari stofnunin þannig fram á staðfestingu á ákvörðun sinni frá 11. september síðastliðnum um að samþykkja örorkulífeyri frá 1. júlí 2025.

IV.  Niðurstaða

Mál þetta varðar ákvörðun Tryggingastofnunar ríkisins frá 11. september 2025 þar sem umsókn kæranda um örorkulífeyri var samþykkt varanlega frá 1. júlí 2025. Kærandi óskar eftir greiðslum frá 1. ágúst 2023.

Samkvæmt 1. mgr. 55. gr. laga um almannatryggingar skal sækja um allar greiðslur samkvæmt þeim lögum. Örorkulífeyrir reiknast frá fyrsta degi næsta mánaðar eftir að greiðsluréttur er fyrir hendi samkvæmt 1. mgr. 32. gr. laganna. Samkvæmt 4. mgr. 32. gr. skulu greiðslur aldrei ákvarðaðar lengra aftur í tímann en tvö ár frá því að umsókn og önnur gögn, sem nauðsynleg eru til að unnt sé að taka ákvörðun um rétt til greiðslna og fjárhæð þeirra, berst Tryggingastofnun.

Af framangreindu má ráða að örorkulífeyrir skal reiknaður frá fyrsta degi næsta mánaðar eftir að greiðsluréttur er fyrir hendi en þó aldrei lengra aftur í tímann en tvö ár frá því að umsókn og önnur nauðsynleg gögn berast Tryggingastofnun ríkisins. Við mat á upphafstíma örorkumats kæranda lítur úrskurðarnefnd velferðarmála til þess frá hvaða tíma kærandi uppfyllti skilyrði 75% örorku. Þegar úrskurðarnefndin metur hvort skilyrði örorku séu uppfyllt aftur í tímann horfir úrskurðarnefndin til þess hvers eðlis sjúkdómur eða fötlun viðkomandi er. Margs konar líkamleg fötlun er þess eðlis að hún kemur fram strax við fæðingu eða til dæmis við slys þannig að viðkomandi uppfyllir ótvírætt skilyrði örorku. Í öðrum tilvikum geta veikindi eða fötlun verið þess eðlis að hún sé hægt versnandi eða breytileg frá einum tíma til annars, svo sem ýmis andleg veikindi og hrörnunarsjúkdómar. Úrskurðarnefndin horfir einnig til þess hvort fyrir liggja samtímagögn, svo sem læknisvottorð eða mat annarra sambærilegra sérfræðinga, sem séu það ítarleg og skýr að byggja megi á þeim mat á örorku.

Samkvæmt þágildandi 2. málsl. 2. mgr. 25 gr. laga um almannatryggingar er heimilt að setja það skilyrði að viðkomandi gangist undir sérhæft mat á möguleikum til endurhæfingar og viðeigandi endurhæfingu áður en til örorkumats kemur, sbr. þágildandi 7. gr. laga nr. 99/2007 um félagslega aðstoð.

Eins og áður hefur komið fram var kærandi talinn uppfylla skilyrði varanlegs örorkulífeyris með örorkumati, dags. 11. september 2025, frá 1. júlí 2025. Örorkumatið er byggt á læknisvottorði, D, dags. 23. júní 2025, þar sem greint er frá eftirfarandi sjúkdómsgreiningum:

„MENTAL AND BEHAVIOURAL DISORDERS DUE TO MULTIPLE DRUG USE AND USE OF OTHER PSYCHOACTIVE SUBSTANCES - DEPENDENCE SYNDROME

FÍKNIHEILKENNI AF VÖLDUM ÓPÍUMNOTKUNAR“

Um fyrra heilsufar segir:

„Drug use from the age of X, starting with smoking hashish and then injecting himself with contalgin. The following diagnoses are in the doctor's letter from C ??2022:

Diagnostic codes were not found in History's code system:

- Mental and behavioral disorders due to use of opioids, dependence syndrome (F11.2 , ICD-10)

F15.2 - Mental and behavioral disorders due to use of other stimulants, including caffeine, dependence syndrome

- Mental and behavioral disorders due to use of other stimulants, including caffeine, dependence syndrome (F15.2 , ICD-10)

F12.2 - Mental and behavioral disorders due to use of cannabinoids, dependence syndrome

- Mental and behavioral disorders due to use of cannabinoids, dependence syndrome (F12.2 , ICD-10)

F14.2 - Mental and behavioral disorders due to use of cocaine, dependence syndrome

- Mental and behavioral disorders due to use of cocaine, dependence syndrome (F14.2 , ICD-10)

F13.2 - Mental and behavioral disorders due to the use of sedatives or hypnotics, dependence syndrome

- Mental and behavioral disorders due to use of sedatives or hypnotics, dependence syndrome (F13.2 , ICD-10) 2022-12-.“

Um heilsuvanda og færniskerðingu segir:

„A is a X-year-old woman.

Homeless, substance abuse for many years, difficult childhood, tried treatment at C multiple times.

She is applying for disability on the basis of addiction.

currently lives in assisted living.

She is currently completely unable to work and is not capable of completing rehabilitation. It is unlikely that this will change in the coming years as the situation is now.“

Í lýsingu læknisskoðunar segir:

„comes with mentor from assisted living.

doesnt speak much, mentor speaks mostly.

looking on the floor and on her phone most of meeting, no eye contact.

no complaints, no pain or other symptoms.“

Í vottorðinu kemur fram að kærandi sé óvinnufær og að ekki megi búast við að færni aukist. Í frekara áliti á vinnufærni og horfum á aukinni færni segir:

„She is completely unable to work due to addiction and mental health problems.“

Einnig liggur fyrir læknisvottorð E, dags. 4. mars 2024, sem kærandi lagði fram með umsókn um endurhæfingarlífeyri. Í vottorðinu er greint frá eftirfarandi sjúkdómsgreiningum:

„Mental and behavioural disorders due to multiple drug use and use of other psychoactive substances - Dependence syndrome

Fíkniheilkenni af völdum ópíumnotkunar

Lyfjafíkn“

Í samantekt segir:

„Núverandi vinnufærni: Hún hefur enga vinnufærni vegna fíknsjúkdóms

Framtíðar vinnufærni: Óljóst hvort hún muni ná vinnufærni aftur, ef það gerist eru líklegast a.m.k. 2 ár í það.

Samantekt: Alvarlegur fíknsjúkdómur verið til staðar lengi og óvíst hvort hún muni ná sér uppúr því. Er í skaðaminnkandi úrræði SÁÁ og á biðlista eftir meðferð á C.“

Í tillögu að meðferð segir:

„Er í skaðaminnkandi úrræði SÁÁ og fær daglega methadone skammta þar. Er á biðlista eftir meðferð á C. Fékk synjun á beiðni um örorkubætur og því sótt um endurhæfingarlífeyri.“

Í læknisvottorði F, dags. 16. mars 2023, kemur fram að kærandi sé óvinnufær og að ekki megi búast við að færni aukist. Um heilsuvanda og færniskerðingu segir meðal annars:

„Heimilisleysi, vímuefnaneysla til margra ára, erfið æska, reynt meðferð hjá C margoft en ekki náð að klára meðferð, er nú á biðlista eftir því að komast þar inn.

Sótt var um örorku á grundvelli fíknsjúkdóms.

Henni var nýlega úthlutað félagslegri íbúð eftir að hafa verið heimilislaus í mörg ár. Býr ein í félagslegri íbúð […]. Hún er í skaðaminnkandi meðferð hjá SÁÁ og sækir daglega methadon skammta þar. Hún var nýlega í mánuð á C og fékk meðferð við fíknisjúkdómi. Verið í neyslu í mörg ár en undanfarin ár verið í skaðaminnkandi meðferð á vegum SÁÁ og gengið betur. Hún fellur reglulega en er ekki lengur í daglegri neyslu. Farið að ganga betur hjá henni og hún er farin að sýna meiri áhuga og motivation til að breyta lífi sínu. Er á bótum hjá féló en óskað eftir umsókn um örorkubætur. Hún er algjörlega óvinnufær eins og er og ekki heldur fær um að sinna endurhæfingu. Ekki líkur á því að það breytist á næstu árum eins og staðan er núna.“

Í bréfi G, félagsráðgjafa, dags. 26. júní 2025, segir:

„A á langa sögu um mikla félagslega erfiðleika, áföll, alvarlegan vímuefnavanda og heimilisleysi. Mikil vinnsla hefur verið í hennar máli hjá félagsþjónustunni til marga ára og þar áður hjá barnavernd. Á þessu tímabili hefur verið reynt að styðja við A og markvisst unnið að því að auka getu hennar til að sinna virkni og viðhalda stöðuleika í lífi hennar. Hún hefur fengið fjárhagsaðstoð til framfærslu samfellt frá árinu 2012 og reglulega skilað inn læknisvottorði sem staðfestir óvinnufærni.

A glímdi við heimilisleysi til margra ára og var þá ýmist í H eða dvaldi í ótryggum aðstæðum þar sem öryggi hennar var verulega ógnað. Hún fékk úthlutaðri í íbúð í húsnæðisúrræði Reykjavíkurborgar […] árið 2023. Húsnæðið er ætlað konum með langvarandi og fjölþættan vanda þar sem íbúar njóta stuðning starfsfólks allan sólarhringinn. Hún hefur alla tíð haft lítið sem ekkert stuðningsnet í kringum sig og hefur síðustu ár verið í litlum samskiptum við fjölskyldu sína, […].

A byrjaði að nota vímuefni þegar hún var X ára og glímir í dag við þungan vímuefnavanda. Hún hefur ítrekað tekið þátt í fjölbreyttum meðferðar- og endurhæfingarúrræðum með það að markmiði að bæta líðan og auka virkni. Margar spítalainnlagnir og meðferðir hafa verið reyndar í gegnum tíðina en þrátt fyrir mikla viðleitni hefur árangur ekki náðst þar sem meðferðarheldni og úthald er lítið vegna veikinda.

Löng saga um heimilisleysi og ítrekuð alvarleg áföll hafa haft mikil áhrif á andlega heilsu A og getu hennar til að taka virkan þátt í samfélaginu. Mikil áfallastreita og hamlandi kvíði gerir það að verkum að hún ræður illa við félagslegar aðstæður. Eins og fram hefur komið hefur ítrekað verið reynt að styðja hana í virkni og endurhæfingu án árangurs. Það er því mat u.r. að endurhæfing hafi verið fullreynd til í tilfelli A og fyrirséð að frekari meðferðir eða úrræði muni ekki leiða til annarrar niðurstöðu. U.r. styður því heilshugar umsókn hennar um örorku.“

Mál þetta varðar kröfu um afturvirkar greiðslur örorkulífeyris. Með örorkumati Tryggingastofnunar ríkisins, dags. 11. september 2025, var kæranda metinn örorkulífeyrir frá 1. júlí 2025. Kærandi krefst þess að upphafstíminn verði ákvarðaður frá 1. ágúst 2023.

Úrskurðarnefnd velferðarmála, sem meðal annars er skipuð lækni, leggur sjálfstætt mat á öll gögn málsins. Fyrir liggur að kærandi hefur ekki fengið greiddan endurhæfingarlífeyri og að Tryggingastofnun taldi að kærandi uppfyllti læknisfræðileg skilyrði örorku þegar stofnunin tók kærða ákvörðun, dags. 11. september 2025. Tryggingastofnun miðaði upphafstíma varanlegs örorkumats kæranda við 1. júlí 2025 með þeim rökum að í læknisvottorði, dags. 23. júní 2025, komi fram að kærandi sé óvinnufær án frekari tilgreiningar og að kærandi hafi ekki fengið greiddan endurhæfingarlífeyri.

Í bréfi G félagsráðgjafa, dags. 26. júní 2025, kemur meðal annars fram að kærandi eigi langa sögu um mikla félagslega erfiðleika, áföll, alvarlegan vímuefnavanda og heimilisleysi. Hún hafi byrjað að nota fíkniefni X ára gömul og hafi notið fjárhagsaðstoðar frá árinu 2012. Þá segir í læknisvottorði F, dags. 16. mars 2023, að kærandi sé algjörlega óvinnufær og ekki fær um að sinna endurhæfingu. Úrskurðarnefnd velferðarmála telur ljóst af gögnum málsins að kærandi hafi verið óvinnufær í mörg ár, meðal annars vegna alvarlegs vímuefnavanda. Auk þess má ráða af framangreindum gögnum að mörg ár séu síðan starfsendurhæfing reyndist óraunhæf. Úrskurðarnefndin telur því ljóst að kærandi uppfyllti læknisfræðileg skilyrði fyrir greiðslum örorkulífeyris mun fyrr en 1. júlí 2025.   

Samkvæmt 1. mgr. 32. gr. laga um almannatryggingar reiknast örorkubætur frá fyrsta degi næsta mánaðar eftir að greiðsluréttur er fyrir hendi. Þó skulu greiðslur aldrei ákvarðaðar lengra aftur í tímann en tvö ár frá því að umsókn og önnur gögn, sem nauðsynleg eru til að unnt sé að taka ákvörðun um rétt til greiðslna og fjárhæð þeirra, berst Tryggingastofnun, sbr. 4. mgr. 32. gr. laganna. Fyrir liggur að umsókn kæranda um örorkulífeyri barst Tryggingastofnun 13. ágúst 2025 og því telur úrskurðarnefndin að upphafstími örorkumats kæranda skuli vera 1. september 2023, sbr. 32. gr. laganna, enda uppfyllti kærandi þá þegar læknisfræðileg skilyrði örorkulífeyris.

Með vísan til þess, sem rakið hefur verið hér að framan, er ákvörðun Tryggingastofnunar ríkisins frá 11. september 2025 um upphafstíma örorkumats felld úr gildi. Upphafstími örorkumatsins skal vera 1. september 2023.

Ú R S K U R Ð A R O R Ð

Ákvörðun Tryggingastofnunar ríkisins í máli A, er felld úr gildi. Upphafstími örorkumatsins skal vera 1. september 2023.

F.h. úrskurðarnefndar velferðarmála

 

Rakel Þorsteinsdóttir